係 Medium 睇文既幾個小習慣

[粵] 終於又有時間俾我係度講下廢話…

仲有大概一個星期到又到冬至,然後就係聖誕節喇。

其實唔知係咪前世刺殺左欽差大臣又或者做左強盜探花賊(我就想),所以今世到呢啲所謂既假期前淡季,我就繼續忙到出血。其實,大家都 feel 到架,你知我知單眼佬都知,當搭開架巴士地鐵人流開始疏落,然後同事開始傾緊黎緊放假去邊,又或者又有人同老闆理論緊個假期要點樣駁紅字先好;而更加想死既係,到七八點打後慢慢你只係聽到自己一個人既打字聲,你就已經想開 Youtube 開始聽「誰有騎著那鹿車飛過」啦……

Facebook 愈黎愈多廢文同垃圾內容農場,相反無睇 Medium 一排好文好作者就愈黎愈多。但跟住而黎既問題當然係:太多文,睇唔晒。但係我又唔想放棄。自己都係作者,當然知道人地寫既文,一樣都係心血啦。所以今次想好慳水慳力咁樣點列一下平時點樣去消化 Medium 既文……(死)

  • 因為 Medium 對於中文既文章都係完全無 sorting 可言,所以我都唔理,盡量努力一篇一篇咁樣睇。
  • 我覺得 App 梗係會飛左啲比較耐既文章。所以我會 Click 完 All ,再睇 People,再睇 Publication。雖然係有重覆,但係咁樣好似睇得多啲。
  • 然後,只要睇到既,我既都會努力咁樣俾 Clap。
  • 有啲同好一早係 Facebook 已經識。所以有啲文有時一早已經係 Facebook 睇左然後再上返黎「返 Clap」(係我知道大家都仲要靠 Facebook,但我最近連貼 link 都懶,無人睇咪算 LOL)。
  • 所以如果有朋友見到突然我十分鐘 Clap 左你十幾篇文,唔好覺得意外。同閱讀速度完全無關。
  • Clap 既數目我好多時候都會俾10下以上。話晒都係 Clap 呀嘛,好似Facebook 咁得一下就唔好玩啦。同埋我多數會俾到個總Clap 數可以去到個位數係零。 例如38,我就會Clap 到50。
  • 但係 Medium 另一個問題係文章目錄我睇唔到自己有無 Clap 左或者 Clap左幾多!又無其他提示話自己已經睇左。
  • 我覺得呢個真係問題。因為好多時有時要 Click 左入去先發現:噢,原來睇左。希望遲啲Medium 可以係呢方面改善下。
  • Highlight function 我真係好鍾意。可以畫花人地既野,實在太開心。講笑。但其實有啲文句真係睇得出心機,唔Highlight 下都有啲過意唔去。
  • 最後我都係比較鍾意睇小說。
  • 因為話晒 Medium 都叫做一個比較鼓勵人地寫長文同睇長文既平台。小說我心入面係有Priority 既,但無奈好多時又開唔到新坑。所以我就 Save 埋一大堆,希望假期再一次過煲晒,再Clap。
  • 一講到呢度,我發現我自己仲有一大堆寫文單未找。哈哈。
  • 同埋,其實都係好睇果日開 medium 既體力同心情。如果真係好攰,有時都真係有心無力……

講住咁多先,諗到先再寫啦。天氣凍下又暖下,好多人病,祝大家身體健康,好快有個愉快既假期。