我唔知你有無同我一樣既感覺，或者你依家仲考慮緊做唔做(會員)。
我岩岩成為會員未夠一日，決定分享下自己呢一刻既感受。
本身我諗住係度就咁寫下文睇下文就算，一直唔付費應該唔會有所謂。但後尾發現原來有獎勵制度，只要你見到有文係寫得好，係可以俾 Clap (鼓掌)，而 Clap 係唔同 Facebook 既 Like 係可以多過一個。換句話說，呢個係一個打賞制度。雖然有人覺得，寫文係好高尚，好有文氣既事，係唔應該要以一種好似乞衣咁既方式黎要求回報，但係完全無Incentive，其實對於作者黎講，真係好難維持落去。所以我覺得呢個應該唔算係一個壞事，尤其是(得罪講句)香港好多寫作人平時都已經同乞衣無異。但問題在於：
原來你唔係付費會員的話，你就算度度文都去 9Clap，都唔會幫到個作者。換句話說，一定要自己本身都有付出(成為左會員)，你先可以幫到人，否刻都係一路賭白頭片。當然，Medium 本身既設定係你自己唔俾錢，只要你 join 左Partnership 的話，理論上你都可以將自己既文章上鎖以受惠於個打賞計劃。但正如我尋日講，呢種做法長遠而言並不可取：
即係你受人地錢就得，但人地就永遠收唔到你既錢。
咁長遠黎講你都會成為一個仆街。
做人大家都係想公平一啲。想搬離 Facebook 自然就唔想再咁樣做去剝削其他人。再睇番個 Plan：一個月$5蚊美金；一年$50蚊美金！
我知，好多人都會話自己係窮撚，呢 D 咁既閒錢，唔係我輩 Afford 得起。我想係呢度再分析一下呢個金額係咩野概念。以香港地 US$1 兌 $7.8港紙計算，即係一個月39蚊，或者係一年390元正。一個月39蚊，真係去少一兩次Starbucks 咩貢茶咩粉珠冰冰都一定係度啦。我岩岩翻查一下百X超級市場網上格價，一筒廁紙都要$64.5 兩件，一支沐浴露都係岩岩$38.9。你話車呢啲係必需品喎，咁我用過來人身份同你講聲呀：
人一生入面，精神食糧都好重要架。(好重要，大家自行默念 N 次)
所以我相信，好大部份人唔做會員，唔係因為錢既問題，而係懶既問題。如果話入左下次買張敬軒演唱會飛會易10% 平5%，肯定好多人即刻狗衝無難度。好喇，言歸正傳，當然我亦都唔可能好似 史兄 咁犀利可以期望自己收稿費收到收支平衡，其至搞回贈計劃都仲得，但係如果真係咁想為中文出力，為寫作呢行出力，俱俱幾百蚊算得係乜？更加唔好講平時大家都會去下旅行吃喝玩樂既洗貴。同埋最後一點我想提既係：
免費一個月好似得三篇付費文 Quota 真係好少，渣一聲就用晒。而當我見到好多其他既朋友都係星星文而睇唔到，我就會有少少灰。既然係咁，升級做會員，大家齊齊玩，咁樣點睇都好似開心啲。不過我都希望自己可以將要俾錢既文，同免費既文，繼續取得一個平衡既。
唔知大家既諗法又係點既呢？
