提起寫作,好多野都有理說不清

寫作係咪攞苦黎辛?好可能都係被虐狂。

睇到 Herr Fung 回顧自己既寫作歷程,真係身同感受。搞到我都想回顧埋一份。但係我接落黎,寫任何野之前,我都誠意推介大家有時間睇下佢篇文先,寫得好生動,亦都感覺到:

每一個想認真寫作既人,都未免係路上跌跌碰碰,鬧得一臉都係灰,又乜野實質收穫都無,但又唔知點解係都要繼續。就係咁樣苦戀法先死。

好喇,珠玉在前,之後就輪到我廢蹹啦,我都預期呢篇文都應該會 OK 長,大家要有心理準備,纜好安全帶。如何趁仲有得返轉頭既機會,快啲 Click 向左走向右走箭咀快快趣趣走人。

或者要去番小學講起。(下,黎真架?你仲未出返去呀?LOL)

人人都從投稿起

我發覺自細係一個幾鍾意睇書既人,而屋企人書架既藏書雖然唔多,但係散文小說都真係乜都有啲,雖然我只係一個小學生但係有時睇到啲字詞唔識我都照樣會囫圇吞棗,然後自己估一個讀音同埋意思落去。通常撞撞下都會知道作者寫既野七八成,如果真係唔得,先會查字典。我返學對於大部份既科目都係零興趣,數學尤其係厭惡,但係唯獨係中文科我係唔駛點讀都拎到高分既。

而去到作文科,通常都係小息前既一堂。如果作唔晒,就會連小息都無得放,我覺得真係好慘,返學已經似軍訓架啦。於是我成日都好快就努力填好字數就會交,通常班入面大部份既同學都未寫完。老師曾經問我:

「阿_同學,你作文唔駛起個大綱架咩?」我搖頭。老師好似覺得好訝異,佢仲以為我亂咁寫。點知有一次先生仲將我既作文當眾讀俾全班聽,因為覺得寫得好好。但個人原來唔記得寫自己個名,佢想知係邊個既手筆。

而果個就係我。


係果時開始,我就覺得寫野真係好有滿足感,同埋開始成日諗,點樣可以寫得更好?當然果陣既理論,唔係叫你點樣執個標題有人睇,點樣整一大堆格式引起到讀者注視,甚至叫你拍條片落去咁既。講咩都係假既,寫野最重要,梗係內容啦!想鍛鍊文筆?無捷徑既,「萬丈高樓從地起」,梗係「多讀多聽多寫」啦!

好喇,就係呢句多讀多聽多寫,就此走上左一條不歸路。

死,原來已經接近一千字架啦。點算呀。我估去到呢度讀者數目已經趨向零緊。搵人 Highlight 下呢段話我知仲有人係度吖...(如果可以的話 LOL)

空泛之極既鳩噏

多讀多看多聽多寫呢總空泛之極既鳩噏,就等於舊時武俠小說果啲所謂武林秘笈,得幾句似是而非既詩,再配幾張毫無誠意既人仔指手劃腳圖,咁都會練到絕世武功?咪玩啦?只會令呢個世界多幾個精神失常但又唔打得既歐陽鋒架渣。但果陣入世未深,真係信,結果成日去書局打書釘,又去圖書館係唔係都睇一餐。多看既任務完成。

多寫?課堂既作文已經對於我黎講係完全滿足唔到我。我投過稿,可能你講得出既報紙名我都投過,市政局既徵文比賽,某某報既小說比賽,甚至係乜鬼青年文學獎,全部都曾經有過我既存在。如果你去舊書攤搵到咩得獎作品文集,你隨時會見到我用真名發表既文章(得啦知你拎過啦,結果咪又係得個桔!)。當然,我並無就此出道成為全職作家。並唔係話我無呢個夢想,原因好簡單:

屋企人話:揸筆搵唔到食(後尾發覺,原來好多野都搵唔到食架啦…)。而且無前途。寫作既野當興趣無所謂,但係想靠佢名成利就,你都係繼續讀大學然後畢業出黎搵份好工算數啦。況且,又唔係覺得自己寫得叻到,真係有機會可以突圍而出。結果…


筆名「鵝鑾鼻燈塔」既由來

鵝鑾鼻燈塔好似個個都話好靚。大家去得墾丁都會去。

結果,我去到讀大學之後已經無再參加咩徵文比賽,叫到死左條心。當然,大家都講既 Xanga 又好 Wordpress 又好我全部都有,甚至都有好多個分身,俾自己黎當回音牆用。然後?真係無然後,有一大堆寫完到最後都唔知去左邊既野,之後就開始踏入社會做社畜,成為一隻任勞任怨既 OT 狗。本來大家都唔會係網上世界見到我,不過又有一次巧合既情況下:

係一個網上既聊天室類物,有一班死剷傾到「高登討論區」既「講故台」。

老實,我一開始根本唔係高登友,亦都唔知講故台係咩黎?榕樹頭講故我就知。然後我班網上識既損友講話有啲故寫得都幾好睇,我脫口一句(類似既野):「咩呀,呢啲好濕碎,我都寫到啦。」其他人聽完唔信,我就話:

「你地俾個 Account 我,我寫俾你地睇。」

就係咁,我就有個 ID 名叫「鵝鑾鼻燈塔」(好耐之後我先知道原來鵝鑾鼻燈塔係台灣既一個著名旅遊景點,係我孤陋寡聞,我要謹此向台灣朋友道歉 XDD),而我模仿返高登講故台既筆風,叫做發表左第一篇全用廣東話/粵語入文既長篇小說,呢個就係《本來一開始,呢個只係一個玩笑》。

主角就係一個叫 Ellan Ou 既財經演員。

(原來,係未死 Link 架!不過我建議大家唔好睇呢個版本,因為未修改。)

之後有小型出版商係搵我出左兩本書架,係當年既書展,不過係若干問題底下,結果係唔賣得。而講故台既氣氛當時亦令我有啲意氣闌珊,所以雖然我以後仲寫左好幾個都叫做有人Click下既故,但我就無繼續出書喇(美其名曰:為地球環保出左一番力…)。然後 Facebook 興起,進入睇圖睇片既世代,寫長文真係好難接觸到觀眾,我就更少想寫小說,反而只係寫短文,變相都係認同左速成文化。

(同埋我認,我真係死懶鬼…)


後來,真係因為網上唔知邊個俾左一個 MV 俾我睇,令到我突然又想拎起支筆,用Ellan Ou 呢個名繼續係自己 Facebook 寫下無聊野。呢個就係香港樂隊 Dear Jane 係 2016 年推出既《哪裡只得我共你》喇。除左因為 MV 拍得靚,歌詞有意思,首歌好好聽之外,更重要既係女主角演得好好!就係因為咁我先會寫:

第一篇投去輔仁媒體既稿,大概係呢篇:

從高登講故佬到《陌事錄》

輔仁總編容總對我非常寬容,我好多文佢都會出,仲要好多時都唔會改我原文意思。而我之後仲同容總再拍一個畫師 Can Cheng 合作,認認真真咁樣再出多一本講香港舊事既《陌事錄》:

結果,係蝕到仆街!雖然我地都預左。LOL

你好難相信一本咁認真既製作係無人願意睇…

容總蝕到上心口既情況下,話以後都唔會再出架啦。好似依家仲有好多倉底貨,係乏人問津既。早知係咁我就繼續粵語入文,連書面語都唔用…

從 Facebook 到 Medium

結果係唔係好覺意既情況下,呢兩年寫左幾百篇短文,仲有好間唔中寫下既短故等等,根據不科學既統計好似有幾十萬字,所以「文字生成器」既戲稱咁黎。其實係大家過譽,相對係高登講故台同期出道既作者,我完全唔出名。依家都係渾渾噩噩過下日辰,無話想有咩終極目標。我諗行到黎呢一步,我只係想有個平台可以寫自己鍾意既野,然後有知音大家交流下已經好足夠。同埋我已經講過好多次:

我受到果種要點點點先有人睇,要點點點先受歡迎既寫作成功方程式。有時需要一啲技巧修飾,包裝,無傷大雅,我都好贊同,正所謂「換了珠衫仍然一副富貴模樣」,但係你唔好本末倒置,完全拎一舊無內容無質素既垃圾黎包裝。我好懶,我唔想做,我寫作係為左我自己,滿足唔到我自己,唔好講滿足其他人。

所以,我希望係呢度寫,我可以滿足到我自己。我唔需要太擔心長文會俾 Facebook 就咁 filter 左,我已經好開心。人生如壽司?我話人生如寫作。

有啲乜野,寫左先講。完。

恭喜晒!你竟然睇完晒呢篇咁悶既野!我真係多謝你呀!照咁睇黎,往後我貼既長篇小說,你地都應該會哽得落。等我認住你地先。