有朋友係 Medium 問我關於粵文同書面去表達語境既問題。佢特別提到用黎描寫愛情之類既內容既時候，用粵文或者廣東話口語表達，硬係覺得怪怪咁。
首先利申：我自己唔係咩語言學或者係寫作專家，亦都對於廣東話唔係有好深刻既研究（有咩深既問題不如問返 阿擇 （Chaaak）），用口語入文只係半途出家，關於呢種問題自己都不斷係度摸索緊，但係我總係覺得，係唔係真係營造到果種浪漫或者文藝風，係書面定係口語，似乎唔係太關事，呢個只係心理關口，而最關鍵既，都係基本遣詞用字以及修辭手法。
我嘗試係呢度拋磚引玉，舉一個簡單既例子去說明：
這一天下雨了。
呢種係一般小學生都應該會識寫既寫法。如果想變得文藝一啲，例如愛情流行小說既果種手法，通常都會字眼重新排序（即係亂9咁調黎調去），或者用更多標點符號，去製造錯落既感覺：
雨，從天而降。
再黎，多半會配合人物既描寫，用類似既短句，去玩融情入景，甚至係果種「新詩」既感覺。
雨，從天而降；淚，如雨而下。哀傷，莫大於，心死。
至於，過往係課本教既文學小說鋪排，就更加要講究鋪排要精細，場景描寫要用心，講求立體同意象，花得字數寫得出，就有佢往後既用意，作者斷不會有亂咁浪費墨水之理，雖然咁樣做，會比流行小說寫得更加長，有時讀起黎會較為艱澀，需要時間咀嚼，唔鍾意既話，會覺得唔多唔少有啲矯情。
如果追溯上去，就會好似紅樓夢咁，邊個出黎著咩衫，拎咩扇，唱咩曲，作咩詩，都要逐一娓娓道來。相信大家如果有讀開現代文學研究，亦必然會讀到白先勇、張愛玲等人，邊個邊個「倒抽一口冷氣」，「隱若細不可聞」都好，都要抽出黎，逐個逐個字句都要拎出黎驗屍咁驗。
這場雨，像豪華大族擺的盛宴那樣，沸沸揚揚，彷如永無休止的一幕，狂風吹響世紀末的號角，斗大的黑雲隨歌曲瘋狂起舞，夜幕掀翻開來，雨水傾盤如下，像那賓客的急驟而暗喜的舞步，永遠沒有終點。但小曼此時，置身其中，仰起小小的面龐，失神的瞳孔，望向天空那抹遙遠而絕望的鐵灰色，歡顏早早已經沒了。斗大的雨水，打在臉頰上，不很痛，卻愀心。有一種令人鼻酸的冰冷，冷得她想避開；但愈想避開，愈避不了。況且她早分不清，那真的是雨，還是其他甚麼了。
