香港大富翁

按:下文以粵語書寫。如感興趣,可聯絡作者索取白話文本。謝。

稍為對香港既社會發展有D了解,就會知道以前上位相對比依家容易:

首先,齋睇收入去論斷無用。香港最重要最重要都係資產,香港經濟發展最高峰時期係六十年代至八十年代。香港果陣岩岩經濟起飛,邊個有足夠既錢去執平地同資產邊個就係依家既富翁。大既有大既執靚地變成依家既地產商;細既有細既去買所謂藍籌屋苑依家收租收到手軟。而香港果陣作為中西交集之地,兩次都係因為強國政局動蕩而加速發展。香港係果陣絕對就係發走難財既地方。政局穩定,自由市場,就係經濟發展既利器。

香港自從開始中英談判就已經走入一條直路。英商退,華資上,李嘉誠等人因此開始得以操控財經大脈一躍成為巨富。而係八十年代末九十年代初,仲有中上層開始出現大量真空既情況。第一,英國大班要返老家,所以就算佢地唔想走都要走;第二,香港人有經濟能力既,唔少都對香港前途感到憂心而移民澳美加。呢個就係所謂既移民潮。不論係前者同後者,都為當時走唔到既人提供大量既上位機會。

有人以玩左好多盤大富翁黎形容依家既香港。的確係咁。呢個就係資本主義既玩法,資源最後一定會聚係有能力既一群身上。而更甚既係,九七回歸後香港經歷兩次大浪,一次係九七九八金融風暴,另一次就係零七零八世界次按引爆既全球金融海嘯。無能力既人,當然會因此而沒頂走上絕路。但係本錢最雄厚既人,呢D絕對係黃金機會去執平貨。

點解貧富懸殊會愈黎愈嚴重?從呢個角度一D都唔難理解。淘大二三千蚊呎果陣有人成層咁掃,但係果個一定唔係你。樓價跌足八成,一般普通人已經係驚弓之鳥,正如匯豐得番三十蚊,肯博落去既一定係有經驗同本錢既資深投資者。但唔係你地D成副身家放入去都係買得幾手到最後賺一倍都只係講真幾十萬既人。

我既判斷好簡單。香港已經風光不在,最好時代無左,依家叫水深火熱果班,並根本唔係最上層。佢地照樣半島四季國金,然後坐頭等去日本睇楓葉印印腳,對民間疾苦自然不聞不問,亦感到難以理解。當然,係人都知,絕對唔會話當初上到位係因為時勢做英雄。邊有人會將成功既因素訴諸其他野??梗係話自己果陣任勞任怨,而依家你地班友失敗係一定係唔捱得。換著係我都識咁講。

過左海就係神仙。不嬲都係咁講。right?玩Monopoly 踩地交租係你地班廢青渣。佢地一早做左銀行,係set game rules 班人。根本無得玩。


Originally published at www.vjmedia.com.hk on October 19, 2017.

One clap, two clap, three clap, forty?

By clapping more or less, you can signal to us which stories really stand out.