物理博土嘅閱讀計畫

#好好學習天天向上

夜闌人靜,正係俾思想沈澱嘅時候。身為學術搬運工同底層助教,未免經常被各種瑣碎事情困身,勞碌而不知道為何。有時候逼自己諗多啲、反思多啲,計劃甚至 FF 中長期未來嘅自己,未嘗不可。

點樣先可以學而時習之,不亦樂乎呢?咁我動機係有嘅,想學嘅嘢都好多;但係點樣先學得有效率同愉快,咁就大有學問啦。

Everest 我嘅夢想係,推進 molecular neuroscience 之餘,融合自己對 machine learning 同埋生物學嘅理解。最近讀到某本寫俾物理博士生嘅 biophysics 教科書,裡面提到分子尺度嘅擾動(亦即係隨機性)對細胞嘅影響,甚至點樣反倒過來被利用做 information processing。從大腦取得演算法嘅靈感,係 machine learning 嘅活躍研究方向之一;與此同時部份神經科學家亦利用深度學習模型,擴充佢哋對大腦具體功能嘅了解。正如 Yuval Noah Harari 所講,人工智能同精密生物學係二十一世紀舉足輕重嘅發展;我好有興趣睇下自己可不可以係裡面扮演一個(小)角色。

現實暫時看似好骨感 — 畢竟,博士三年班嘅小薯仔知識有限。但路係一步一步走出來嘅:等我羅列未來半年要睇嘅書同要學嘅嘢,然後就一頁一頁咁向自己嘅夢想進發。(雖然,世界太精彩,預左會走歪。)

  1. 基本嘅 neurobiology。如果因為認唔出專業名詞而睇唔明論文,咁好無謂。好彩,已經搵到適合我呢啲生物學白癡嘅教科書 ^_^
  2. 統計力學。自己老本行一定要深入理解。睇完神級教科書 Modern Classical Physics 之後,算係入到門啦。配合埋下個學習讀嘅 softmatter (biomembrane) physics ,理論加實踐 go go go!
  3. 概率論,同佢延伸嘅 stochastic processes。探索分子尺度嘅擾動,必須用到呢啲數學工具。想學呢啲數學,van Kampen 嘅聖經一定要讀。
  4. Machine learning。暫時係從商界工作嘅角度去學嘅;唔知日後會唔會走理論路線?

係咁先,我去訓啦。