2020DSE 數學科終極懶人包(上)

你對讀DSE數學嘅印象係咩？瘋狂操卷？做奧數難度嘅題目？學數學其實可以好有計劃，唔只得死操難操，相信可以將你溫習DSE數學時候嘅氣餒程度大大減低。

今次呢篇文章講既就係數學科既温習方式，應用既層面好廣！因為如果你有讀其他理科，例如物理、化學、經濟等等，都可以用以下介紹嘅高效溫習法去讀！

— — — -

I. 數學科會要求咩技巧？

等我地重溫一下數學嘅Syllabus，先可以知道唔同課題要以咩方式去熟習。

《數與代數》

1. 數字系統、一元二次方程、指數函數與對數函數
2. 不同函數及其圖像 (包括形狀、最大最小值)
3. 多項式 (長除法、因式分解)、解不同函數的方程
4. 變分 (正變、反變)
5. 不等式與線性規畫
6. 等差數列與等比數列及其求和法

《度量、圖形與空間》

1. 幾何學 (四邊形、線段等)、圓的基本性質
2. 三角學 (包括立體)
3. 直線方程、三角方程、圓方程
4. 軌跡

《數據處理》

1. 排列與組合
2. 概率
3. 統計及謬誤、離差的度量

我已經將類近嘅課題包含係同一範疇。要讀好咁多個課題，基本功一定要打得好，即係每一個範疇嘅頭幾1–2個課題，事關數學題目所需概念環環相扣，唔識前面，後面都唔會識。

II. 打好基本功，由初中課題開始重溫

由於數學科要求學生對科目既固有知識 (如定義Definition、方程式Formula、圖像Graphs) 非常熟悉，因此對書本上既知識既掌握尤其重要。雖然操練係學習數學科既核心，但如果你練條Formula都唔記得，又點做練習呢？操Past Paper或練習之前最好係將整個課程的教科書 (或學校筆記) 由頭到尾温習多於一次。

DSE考嘅唔只係高中課題，一啲初中略略講過嘅課題係DSE都會考核，經典例子就係base 10, base 16呢類嘅進制，又或者irrational numbers、square root乘除等等。佔分唔多但簡單易讀。

唔好因為初中數學太簡單而快睇。第一次由頭温到尾非常認真地讀，每一個部分都嘗試不斷背誦，尤其Definition同題目示範，温完一個Chapter去下一個Chapter之前確保自己對每上一個Chapter大部分內容都能夠背出黎，盡量試試背誦書上講過對於唔同題目嘅Case要點樣應對。亦都試下抽每一課最尾練習中嘅最難或者打星嘅幾題出黎做。如是者由第一個Chapter讀到尾，過程會很漫長，但回報絕對值得。

喺溫習嘅時候拎一本簿出黎，我叫做「精讀簿」，如果你有邊個課題發覺掀左兩次都背唔到所有Definition、Formula同所有題目嘅正確應對方法，又或者係做錯左書入面嘅題目，就用自己嘅文字將嗰一個Definition、Formula或者題目連同答案寫落本簿入面。記得加多一句自己文字解釋自己成日唔記得邊一個步驟、錯左咩Concept等等。

III. 攻破初中後，繼續進軍高中範圍

讀番初中數嘅重點為確認自己已完全掌握某一個課題。當你將初中課題溫至滾瓜爛熟後，就可以以同一個精讀方法去讀高中嘅教科書。只不過你今次會重點擺係讀，而唔係做題目去validate自己嘅掌握。所以如果你遇到有任何書入面嘅example係自己唔識嘅，就加番落去你本「精讀簿」。

今次溫習嘅次序係跟據我上文嘅課題次序，完成一個課題先好去讀下一個課題。而每一次溫書前都溫一次本「精讀簿」先，如果你溫多次嘅係有相同唔記得嘅地方，就用支螢光筆係本薄間低相應嘅句子。越溫得多你越會發覺你需要抄低嘅野越少，亦即係你開始熟習教科書嘅內容啦。

作者：Ivan Wong

香港中文大學環球商業學學士

Instagram專頁: @freezyffgram/FB專頁：FF教室/Youtube頻道：FF教室