矽谷獨產嘅世界級枯枝

宋漢生
宋漢生
Jul 30, 2018 · 4 min read

上文提到《Bad Blood》一書,講醫療科技公司Theranos由神枱跌到落地底被人告行騙嘅故事,我相信曾被捧為明日之星嘅創辦人Elizabeth Holmes唔係一開始就有心佈個騙局,而係見步行步越呃越大嘅結果,源於錯誤將科研問題當成執行問題處理。硬件世界有種種物理上嘅限制,唔係用意志就一定解決得到。就連Holmes嘅偶像Steve Jobs都唔會未做到就吹住先話下一部iPod會細一半但又裝到十倍嘅歌。

Holmes到後期越呃越過份,直頭落街買人哋Siemens部機嘗試塞落個細些少嘅盒,又試過夾硬溝稀客人嘅血,結果錯漏百出,仲夠膽推銷畀軍隊在前線使用,已經係上晒魔道,不惜一切到罔顧人命,而後期籌嘅錢,已經唔可以用「吹大咗」來形容,而係呃。問題係,咁多人想呃人,點解Holmes可以呃得特別大,落叠人士包括政要到傳媒大亨,而中間一路都冇俾人踢爆?
最基礎,係Holmes嘅學歷,Stanford高材生,教授嘅愛徒。其實教授鼓勵佢創業,最初嘅題材,無後來嘅咁高難度,但唔好理,有教授口頭加持,令好多唔係呢門子嘅人信咗以後嘅所有計劃,科學上有根有據。

下一步,第一個上船坐board嘅,係有「令蘇聯冧檔嘅幕後主腦」之稱嘅前國務卿George Shultz,佢同老友Kissinger一齊撐Holmes,令後來好多人,包括高級將領同議員,都信咗Theranos。另一批,係天使及風投。有趣嘅係,參與嘅風投,都唔係不嬲投開醫療科技公司嘅基金,而不嬲投開嘅,全部都冇投,其實已經好大嘅一個警號。晚期嘅個人投資者,則包括傳媒大亨梅鐸。再另一批,係合作夥伴公司,包括巨型超市Safeway,同埋最大連鎖藥房Walgreens,呢批支持者好重要,Holmes就係攞住呢幾單大刁嘅意向書,令一眾投資者覺得好實在。

之後就喺傳媒吹風,一眾傳媒爭相捧佢,話呢個日日着黑色樽領加牛仔褲嘅後生女係女版Steve Jobs,有時你會諗,刻意到好似參加Steve Jobs模仿大賽嘅打扮,都呃到人?事實證明,又真係得。

於是乎,前高官信教授,軍佬信高官,投資者信前高官同合作夥伴,傳媒又信晒呢幾批人,就算記者周圍打聽,收到嘅料都係來自呢群人,零星嘅來自科學界嘅質疑聲音,唔足以蓋過讚美聲。呢個你信我,我信佢,佢又信番佢嘅網絡,瓜藤互纏咁,從外面根本解唔開。而對內,Theranos以極端資訊分割嘅方法營運,令到公司無人可以知道成個畫面,進一步拖延爆煲嘅一日。

其實Theranos員工以外,最有機會踢爆件事嘅,係合作夥伴公司,因為佢哋最清楚Theranos嘅進度。但係Safeway嘅CEO,不嬲出名嚴格,竟然不斷企喺Holmes嗰面,就算Theranos遲遲交唔到嘢,都反而叫自己同事唔好催得咁緊,最後因為呢個失敗嘅合作,黯然下台。有人話,佢咁信,係因為從Holmes身上,見到自己從來冇機會有嘅女兒。而Walgreens個腦就不斷諗住同死對頭CVS嘅鬥爭,絕對唔想錯過任何打贏佢嘅機會。

最後爆煲,投資者其實唔係好傷,事關風投從來投十間只求中兩間,其餘八間,都同樣屬於無回報,係呃定唔係呃,根本唔重要。梅鐸甚至用少少財技,就用呢筆投資變成扣稅,輸唔晒。最放唔低嘅,係最開初就信嘅Shultz,最後件事爆煲,關鍵吹哨人係佢個喺Theranos打工嘅孫,個孫驚阿爺臨老衰收尾,發現公司有問題之後,係咁叫阿爺注意,但阿爺不單止唔信佢,仲嫌佢阻頭阻勢,去到最後,都仲係死攬Holmes,寧願斷絕同個孫來往。

如此這般,簡單而言,每個人都將自己嘅恐懼、或希望、或遺憾、或未了願,投射到Holmes身上,包括渴望矽谷終於有女創辦人抬頭,同埋渴望Steve Jobs靈童轉世嘅大眾。最終故事嘅教訓係乜?其實冇乜好教訓,Theranos嘅唔呃人方面嘅操作同背後嘅配套環境,造就咗好多好多其他環境出唔到嘅成功公司,樹大有枯枝,冇理由倒盆水順手倒埋個B。有咁大嘅樹先可以有咁大嘅枯枝,出到間Theranos級嘅枯枝,可能係每個成日諗住點樣變成另一個矽谷嘅城市,最應該暗地希望見到嘅畫面。

原刊於蘋果日報 2018年07月26

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade