رمضان أقبِل فالقلوب قفار!
في مثل هذا الوقت من كل عام يتجهز الناس لرمضان بشراء وتخزين الطعام والشراب والياميش وشنطة رمضان الشهيرة كلٌ على قدر ما لديه من مال لينفقه وكأننا مقبلين على أيام سنأكل فيها كما لم نأكل من قبل! سوف أكُف عن النقد وأكون أكثر إيجابية حيث أننا مقبلين على شهر له قدر عظيم عند الله يمنح الله فيه الناس فرصة ليطهروا ويزكوا أنفسهم ويرتقوا.. شهر رمضان فرصة وقد لا تأتي هذه الفرصة مرة أخرى!
- فرصة تقرب من ربنا قلباً وقالباً يعني بقلبك وبجوارحك.. زود من دعائك وعبرله عن احتياجك واشكره على نعمة واستغفره على تقصيرك.. حافظ على الفروض اللي طلبها منك وزود من النوافل وتقرب منه.. فرصة تتعرف على القرآن “كلمات الله” بقلب وعقل جديد.. ومرة أخرى خلي الدعاء ملازم ليك في كل أحوالك “فالدعاء مخ العبادة”.
- فرصة تصلح علاقتك مع عائلتك الصغيرة زوجتك ووالديك وأخواتك وتتقرب منهم وتسأل عليهم وتطمن على أحوالهم وتحسسهم إنك مهتم بيهم وبكل تفاصيلهم حتى الصغيرة في نظرك اهتم بيهم وقولهم انك بتحبهم مش عيب على فكرة!
- فرصة تتعلم خلُق الإتقان في عملك ولو انت متقن اتعلم في رمضان تتقن أكتر ولو انت مش متقن قول لنفسك ازاى تصوم طول النهار وتفطر بفلوس أخدتها وهي مش من حقك لأنك مشتغلتش بيها باتقان!
- فرصة تبطل السجائر والشيشة وتعود نفسك إنك إنت اللي بتمشيها مش هي اللي بتمشيك اللي خلاك تقدر تصوم عن السجاير 14 ساعة خليك قوى على نفسك وارمي علبة السجائر الأخيرة قبل رمضان.. وخليها لله ياعم مش لحد تاني!
- فرصة تتعلم تحس بالآخرين من الفقراء أو الأيتام وغيرهم من الناس الكتييير اللي حواليتك اللي “تحسبهم أغنياء من التعفف” دور في أقاربك في جيرانك في الشارع بتاعكم ركز هتلاقيهم واتفق مع كام واحد وساعدوهم قدر استطاعتكم من غير ماتؤذيهم وتحسسهم إنك بتمن عليهم أو إنهم أقل منك.. ده واجبك على فكرة مش فضل منك!
- فرصة تتعلم خلُق الحلم وتهدى كده وتبطل عصبية على عائلتك وعلى أبنائك وعلى الناس في الشارع والمواصلات والشغل.. اهدى على الناس وابتسم في وجوههم وقول دايماً لما حاجة تستفزك “إني صائم” وخليك قوي على نفسك في رمضان زي ما قال النبي قوة حقيقية قوة رجالة مش بالزعيق والنرفزة والبلطجة والصوت العالي لكن الراجل الحقيقي والقوي الحقيقي “الذي يملك نفسه عند الغضب” واكتب ورقة في جيبك اكتب فيه وصية النبي “لاتغضب”.. اللي خلاك قوي وصمت كل الساعات دي مش هتقدر تمسك نفسك عند الغضب وتبقى نفذت وصية النبي ويحبك! ☺)
- فرصة تتعلم تحافظ على وقتك وعلى عمرك لأنه غالي وأكيد أكيد مش هيرجع تاني.. عمرك هو كنزك اللي ربنا منحهولك وكل ثانية بتمر منه مش هترجع تاني أبداً.. اتعلم تقسم وقتك وتبقى منظم في رمضان اكتب الحاجات اللي انت عاوز تعملها كل يوم زى العمل وورد القرآن وزريارة فلان من أقاربك اللي مزرتهوش من زمان والإتصال على فلان من أصدقائك اللي مكلمتوش من زمان وشراء كذا من الحاجات اللي زوجتك أو والدتك محتاجها علشان متنزلش وتتعب وهي صايمة وكتاب كذا اللي هتقرأه مع أبنائك وتتعلموا سوا.. وهكذا!
الحاجات دي مجرد اقراحات وأبواب ودروب الخير كثيرة بس انت تنوى..شهر رمضان فرصة بالفعل “إن لربكم في دهركم نفحات ألا فتعرضوا لها”.. متحرمش نفسك من الخير والبركة في هذا الشهر الكريم.. فقط “أروا الله من أنفسكم خيراً”!