Member preview

任志剛話加息就可以打擊樓價?啱嘅,對於大陸人同富爸爸黎講

即係我經已好厭倦啲人響傳媒亂噏,話咩期待高息環境快啲來臨好打擊樓價,但意想唔到嘅係「金融國師」任志剛竟然跟住癲,夠膽死話「希望息高D、令樓市無咁癲」、又話地產商提供一成至成半按揭係將「二手買家推向一手市場」云云。

首先,加息當然好大機會令樓價下挫,但原因唔係令啲樓平咗,而係令供樓成本高咗,將原本僅僅夠通過壓力測試嘅弱勢買家淘汰。無錯,因為咁需求量的確因此而下跌,但問題係加息之後嘅附加成本你負唔負擔得起先?負擔唔起,就算跌左你咪一樣買唔起,關尻你線咩。

咁邊啲人會受惠於加息呢?當然就係果啲有錢到可以一炮過嘅買家,換言之即係揮金如土嘅大陸人同埋富爸爸。前者連買家印花稅果15%都唔撚理照掃,加息根本唔關佢事;至於富爸爸比錢仔女買樓好多時都係一炮過或者比咗七八成樓價,等仔女供少少就得,加息之後因為樓價跌咗,比仔女買樓筆錢見駛咗,所以按揭成數可以再低啲,最尾可能除笨有精,所以日等夜等加息嘅人,真係想錯你嘅心啦!

可能有人會講「咁加息令樓價跌、租都會跌家嘛,租客點樣有著數掛」,老實講我就真係唔肯定。因為租金係基於供求關係,加息並無改變到房屋供應量同租盤數量,理論上係唔會郁倒租金,咩「樓價對租金有指標性作用」、「樓價跌咗令業主可以提出更有競爭力租金」,我同樣可以話「加息令供樓成本上升,所以除非好似當年金融風暴咁比你「任一招」搞彎哂成個香港嘅金融業搞到無人對香港再有希望,否則任志剛話「加息=港人享有有尊嚴嘅居住環境」純粹只係尻噏。

至於任總又責怪地產商鑽漏洞推出變相九成/九成半按揭,大佬地產商咁進取都要承擔業主斷供嘅風險架,怪只怪你地金管局收緊二按成數扭曲市場囉。同埋好撚搞笑嘅係當初任總仲做緊金管局總裁果陣,就係一手一腳生咗「按揭證券公司」呢舊怪物出黎,借「按揭保險計劃」包攬哂首置二按業務,既然你覺得地產商搞變相九成、九成半按揭咁差,咁不如執七咗間「按揭證券公司」佢啦。

One clap, two clap, three clap, forty?

By clapping more or less, you can signal to us which stories really stand out.