六九遊行(六):衝與唔衝,就係一場世代鬥爭

無神論者的巴別塔
Jun 10 · 6 min read

原先呢篇系列文唔係打算寫呢個題目的。但當我睇倒獨媒Tung Kwong篇訪問,見倒果句「反正點示威都無用,我不如死咗佢,最好一槍啪過來。」實在太過震撼,唔寫番幾句實在唔能夠原諒我自己。

其實當日我響現場所見,響遊行之後參與下半場衝擊抗爭嘅,絕大部份都係後生仔──事實上《iMoney》篇報導亦證明我無錯:警方凌晨搜查358人入面,16至25歲佔81%。

自從魚蛋革命之後,好多人以為梁天琦入獄、黃台仰流亡經已嚇怕咗班出黎亂衝亂撞嘅後生仔,但其實佢地根本無驚過──因為對於自己未來前境完全感到絕望嘅人,根本已輸到無嘢好驚。我永遠都記得當日魚蛋革命響警方開始鎮壓果陣,我曾經遞過口罩比一個擲緊磚頭嘅後生仔同佢講:「喂你至少都拎個口罩蒙住塊面,保護一下自己丫!」

然後佢一手撥開我之後講嘅答案我呢一世都唔會忘記:「唔撚駛!行開啦,因為我已無嘢好輸!」

但呢種躁動,一班本身已有啲家底、或者至少有份唔錯收入嘅中產、又或者正滿懷希望想攀附上社會中上層嘅準中產黎講,又點會明呢?佢地成日以為呢班後生仔係白痴仔,唔係白痴點解唔正正經經搵番份工 (老蕭名句:而家後生仔,響KFC搵份萬三四嘅工,其實唔難,點解要搞到去擲磚)、搵番兩個錢防身,而走去破壞呢場眾志成城、以良好秩序為驕傲嘅民主運動?

點解佢地要咁用咁痴線嘅方法去嘗試改變社會?咪臭係因為你班老嘢幾十年黎唔長進嘅抗爭,搞到今時今日呢個地步囉!跟住你班老屎忽問:「你咁叻不如你示範下點做」丫嘛,咁佢地咪衝囉!然後呢,然後班死老鬼就一係話佢地係收共產黨錢、專破壞遊行形象嘅鬼,一係就話佢地係比人利用,人地叫你衝你就真係衝幕後黑手早就拍拍屁股走人蠢過隻閪,係比收錢做鬼更不如,只係一粒愚蠢、用完即棄嘅真心膠。

結果果堆乜撚嘢「我地老一輩無盡責任、對年輕一輩唔住」,其實全部都係假仁假義嘅門面說話。

然後當我凌晨四五點睇倒何韻詩響Facebook話自己興奮到成晚訓唔著,「內心仲鬼咁Hyper」,我當堂係呆撚咗,你自己唔係成日話都係被迫害嘅一群黎咩?唔係響奧斯陸用全英語發言,強調自己係「香港人」架咩,點解可以對遊行不過結束咗唔夠兩個鐘頭後發生嘅事一無所知,又或者其實知道但覺得唔係自己人唔需要理,心情依舊Hyper?原來後生仔響絕望之下以近乎自毀嘅方法向極權衝擊,響何韻詩心目中只係一個平行時空?

點解又有一個成日話自己係世代鬥爭受害者嘅KOL,到第日訓醒咗之後都好似完全唔知發生乜事咁,只一味回味自己遊行嘅時候噓人點威點威?當你講出口果句「Thank You Hongkonger」嘅時候,有無諗過有班後生只想同你講句「多撚謝哂」?

講到尾,一個被政治迫害嘅歌手始終仍然係歌手,生活始終無憂。一個打緊份幾萬蚊月薪優差嘅KOL所謂「世代鬥爭」,可能只係要由助理講師升職教授之路難行啲而已。當佢地認同和理非遊行先值得回味一刻,經已變成老屎忽嘅一份子,真正嘅「世代鬥爭失敗者」嘅怨恨對佢地黎講,當然不值一哂。

結果衝與唔衝,當然係一個世代鬥爭。有人各打50大板話無論後生一輩屌尻老屎忽唔幫手衝擊,又或者老屎忽話後生一輩亂衝係鬼其實都唔啱,但講呢番說話嘅人有無諗過,老屎忽起碼響香港享受過一段安穩嘅時代,後生一輩則由一出世就面對呢個猶如爛屎般嘅世界,而佢地好大部份係永遠都唔會獲得同上一輩、甚至何韻詩同KOL果個水平嘅生活水平。

其實係遊行之後,我曾經寫咗句:

//問:點解成日遊行講黎講去都係人數?

答:因為除咗人數之外,遊完行根本再無任何嘢自己可以控制得到//

結果經已比班遊行友瘋狂圍插,又話咩「講呢啲嘢有何意義?眾人皆醉你獨醒你最叻」、「你又有何高見?」、「你咁叻你咪搞革命囉」,Facebook Page亦立刻持續掉粉。

企響功利角度,無論呃Like定呃Clap,批判老屎忽呢個題目都係極度倒米兼不智。但又係果句,當見倒「反正點示威都無用,我不如死咗佢」之後,內心實在久久不能自已。唔為呢個世代發聲,豈非變成我最討厭果班老屎忽?少少Like同Clap,我仲蝕得起!

延伸閱讀:

    無神論者的巴別塔

    Written by

    相信巴別塔存在的人,其實都是真心相信神的人