Member preview

引戰文:名校星座化就是一種智力反祖現象

見倒又有KOL兜彎暗示自己中學係名校出身好X巴閉,又提番呢篇我一直好想寫嘅文章。其實自己係黎自某一間中學,有歸屬感係好自然嘅事;但有啲人就總係要將自己出身名校呢個身份「神聖化」,講到自己個學習環境同其他人好唔同,甚至誇張到好似星座咁,唔同名校出身嘅學生係會擁有唔同性格,好似「華仁仔」又乜乜乜、「男拔仔」又咩咩咩、「喇沙仔」又XXX唔同,我就真係好想作嘔。

先作利伸我自己並唔係名校出身,中學係讀一間出咗果區就無人識嘅所謂「地區名校」,但要了解名校生嘅所謂「特質」亦唔係咩難事,因為當你升到大學基本上就係一個「名校集中營」,咩名校畢業生你都會遇到,咁出身唔同名校係咪響性格上面有明顯分別?結論係無。反而男校同男女校出身嘅男仔就可能真係有少少諗法上嘅分別,但個別例子仍然好多之餘,亦唔明顯。

又以我個人經驗,講女拔萃我都算係一小半嘅權威。我一生人追過兩個女拔生,性格上呢,南轅北轍。唯一共通點就只有由於佢地都唔係好擅於表達自己,搞一大輪之後甚至連我原來已成功追倒都唔知;但我唔覺得呢個共通點係同佢地黎自同一間中學畢業有關。然後我又試過響一個有成四五個女拔萃畢業嘅Office度做,果啲話咩女拔多數好高竇同串嘴嘅特徵,卻又察覺唔倒(相反都係好平易近人),反而當時大老闆好鍾意拎佢地嘅身份黎奚落:「下?乜原來呢啲就係女萃畢業寫出黎嘅英文牙?」

咁點解某啲名校生要咁強調名校畢業嘅獨特性、堅持自己響性格特質上面就係同你班「庶民」唔同呢?其實讀名校乜乜七七大多都係廢話,但有一樣無辦法否認嘅卻係名校由於已歷史悠久成為培訓出精英嘅集中地,所以理所當然會有一個成功人士網絡,點樣透過呢個網絡識人、建立自己嘅人脈──要同人親近,只係好似一般中學嘅校友關係係做唔倒,所以先要強調自己間名校、甚至所有名校出黎嘅學生都係「與別不同」,「各有特別性格」,呢種「排他性」人際網絡先可以確立存在。

為咗搭上呢個網絡呢班「名校生」可以去到幾盡?曾經有某位出身名女校KOL提到李梓敬果陣開口埋口都提住「我師兄我師兄」,跟住我真係忍唔住問佢喂你讀女校人地讀男校,點樣係你師兄呀,跟住佢夠膽死答我:「咁大家都係拔萃畢業丫嘛!」當堂我響心入面即刻爆出一聲屌!有一輪好似男拔同協恩校長係夫婦添,你唔好話兩間學校D學生係襯家!(但我的確識得有人因為咁樣嘅關係而結婚…)

當然,呢種諗法其實都帶有功能性考慮,其實都無可厚非,問題只係將生肖、血型同星座呢種帶有迷信成份嘅性格分類,作為唔同名校學生嘅特徵?呢班名校生唔撚係學界精英黎架咩?點解響呢方面可以用啲咁弱智嘅方法黎爭取自我認同?仲有啲中學都畢咗業成十幾年仍然開口埋口提住自己邊間名校畢業走去叼光,同果啲今時今日仲提住自己係「會考狀元」有乜撚嘢分別?

咁樣唔係一種智力反祖現象,又有咩方法可以解釋得倒?

=====

外傳:講開「狀元」,話說又有某人響分享一篇醫科狀元見報新聞嘅時候好「感慨」咁話:「我又係狀元,又成日上電視,咪又係咁,其實無乜特別」,跟住我就奇怪,我好似無聽過佢會考考過九優十優喎(唔係一定有見報查得倒)後尾八番黎先知,原來佢8A1B做咗尖子,就當埋自己係狀元之一。

其實如果要講「狀元」理論上就只得一個,其餘果啲只能係榜眼探花,再之後果堆都只能叫二甲、三甲。但由於考倒10A嘅人唔多,有時可能只得9A,於是就勉勉強強叫埋9A做「狀元」。當然8A1B唔可以話讀書唔叻,但搏懵叫埋自己做狀元,就未免離譜咗啲囉……