律己者寬、嚴以待人:死咬馮檢基,卻輕輕放過李卓人反口、劉小麗說謊?

【九西第二次補選系列之二】

其實飯民支持者同班KOL要死咬馮檢基係無問題,甚至乎我覺得非飯民大台支持者嘅勇武、港獨、同本土派人士係無必要特別為馮檢基辯解甚至揩脂抹粉:佢對香港曾有貢獻係不爭事實,然而佢走入中聯辦賣港、譴責勇武抗爭甚至反口唔選又選,亦同樣無得反駁。

問題不過係,既然你班飯民黃屍SET到個道德標準咁高,點解對住自己欽點嘅人選卻又雙重標準搬龍門?你話馮檢基一直以黎都收共產黨錢,但所謂「罪證」全部係公開資訊,點解過去廿幾年可以一直容許佢參與各式各樣嘅飯民協調?除咗同流合污,有其他解釋嗎?有飯民KOL扮哂中立但暗示馮檢基「未必但可能真係有收錢」,佢自己係咪都可以解釋下之前幫高鐵整色整水搞遊記打卡式PR,其實「未必但可能真係有收港鐵錢」?

類似嘅搬龍門情況實在係不勝枚舉,所以呢度只集中講兩樣嘢:你話馮檢基「唔選又選」係反口,咁李卓人當日信誓旦旦話「唔會再選」,點解又唔算反口?

至於劉小麗,當日佢話加入工黨同補選並無關係,更加唔承認李卓人因此成為咗理所當然嘅Plan B,但去到而家,幾乎所有人包括飯民大台都默認,因為李卓人同劉小麗係同一個政治組織,所以有「繼承DQ後參選權」嘅合法性,咁之前佢講嘅仲唔係大話?點解又可以完全無人追究?點解馮檢基反口講大話就咁大件事,「大台認可人士」犯上同一錯誤時卻竟然可以個個輕輕放過、甚至視而不見?

即係呢種「老豆可以話仔唔啱,但自己唔啱個仔就唔可以挑戰」嘅家長式管治,其實係完全應驗哂當初李光耀同蘇哈圖所講嘅「亞洲價值」:董建華話香港民主發展要參考新加坡、成龍話「中國人是要管的」,今日飯民主派 壟斷正統性詮釋權、不容異議者挑戰大台權威,同上面講果幾條友其實係一脈相承。而最好笑嘅卻係,一堆所謂受過社會科學、政治學訓練嘅教授、講師同博士生,卻係一面倒幫民主大台吹蕭大合奏,當最基本嘅民主價值受到自己支持嘅政客組織侵蝕,除咗落井下石兼抽水,卻係連反思都欠奉。

學術何價?只係講緊將個屎忽賣比中共、定飯民大台的分別而已。