從為城寨花膠護航歪論探討,如何進行一場反黑為白的公關戰?

其實陶君行劉細良抹黑杜汶澤都非常明顯,呢個亦可以話係一個典型「無得救」嘅公關災難案例。但其實「無得救」之中都仲係可以救,只要你唔怕臉紅用盡歪理轉移視線就得,以下就用班黃屍響護航過程中用嘅幾招示範比大家睇:

第一招:無限放大已知事實

首先陶君行劉細良徐少驊三人入面,徐少驊係唯一一個反對杜汶澤已被收買嘅主持,原因我已多次強調,因為佢自己就係以前因為收共產黨錢而反佔中嘅真實個案。基本上從來無人講過徐少驊有老屈,甚至可以話係眾人共識 (當然亦有人會話佢袖手旁觀係平庸之惡),但就係有班黃屍不停重覆又重覆「大家要睇清楚,其實徐少驊並無抹黑」。

點解要將啲已知事實無限放大?除咗將一樣無關痛癢嘅事實沖淡更重要嘅抹黑事實之餘,亦營造一種「以偏概全」嘅錯覺。

第二招:將所有問題怪罪「斷章取義」

城寨一集節目成三個鐘,要評論當然就只能剪輯關鍵部份上黎討論,再早全片照DUP咪即係「盜版」?但SPIN DOCTOR就會不停強調「其實條片只反映部份事實,睇哂條片先可以知道全部真相」。

問題係99%嘅人都唔會蠢到為咗「找尋真相」傻到真係走去聽哂成集節目,於是SPIN DOCTOR就可以用呢樣作為藉口,將「斷章取義」嘅權力轉移去自己手上。

第三招:擅自詮釋既定內容、強行將黑說成是白

好矛盾嘅係,話人斷章取義果班SPIN DOCTOR,其實自己就極盡斷章取義能事。佢地不停強調幾多分鐘至幾分鐘其實主持已講咗句公道說話,所以唔可以因為佢地後半嘅抹黑而否定前半嘅客觀性,又或者將一啲無關重要嘅字詞誇張成具有非常重要嘅轉折意義:

例如劉細良響陶君行講完句「戲子無情」之後再講咗句「政客一樣無情」。正常人只會覺得純粹就係一句感嘆句,但SPIN DOCTOR先會斷定「你特登剪走呢句/無聽呢句令到成段片無咗個關鍵意思」,然後就強行詮釋:「其實呢句係解劉細良唔同意杜汶澤投共、

前面果段「共產黨就係可以統一戰線,容許有人平時鬧共產黨,去到關鍵時刻撳制唔鬧馮檢基就得」呢?佢地又可以SPIN成「其實佢地只係講共產黨可以收買杜汶澤,而唔係話共產黨經已收買杜汶澤」;將之前佢地一大段嘲弄杜汶澤萬一出黎選嘅片段誇大成「其實佢地係真心想杜汶澤參選,點會走去抹黑?」……

將每一句每一段無限拆細,斷章取義然後反黑為白,然後再掉番轉頭屈放片果個先係「斷章取義」,再加幾個打手撲出黎和應話「呢啲先係理性全部分析」、「其實有全片大家可以自己走去睇」有無好熟面口?

就係中共當日由「連學運領袖都話天安門廣場無死人」,不過無講廣場外圍死咗好多人開始,逐步逐步將六四講成其實無死人/死好少人,所有要求平反六四嘅人都係被斷章取義所愚弄。

劉細良本身就以SPIN DOCTOR自居,見有「徒兒」青出於藍,豈不老懷安慰?

第四招:壯士斷臂,盡力與闖禍者切割,至此大功告成

陶君行老屈杜汶澤老婆有JOB接收錢投共,呢樣就真係無得救/暫時無得救,作為SPIN DOCTOR就要進行Damage Control:劉細良本來用共產黨容許共產黨臥底反共呢段已係死罪,但因為無陶君行咁明顯,所以係全力搶救目標。

至於為免有人遷怒飯民,當然亦要拎飯民有鬧陶君行嘅例子作為護航材料,令外人以為成件事只係某一條友失言而已,同飯民陣營無關──但長年以黎抹黑本土勇武港獨派嘅各種惡毒言論呢?飯民點解又唔會進行切割?如果你覺得「抹黑杜汶澤」條片要睇下文下理,點解抹黑老屈本土派或者親本土派人士就要用「獨立個案」看待?

雖然攤開黎睇,我諗只有最ON9嘅黃屍先會覺得劉細良可以獨善其身;但我唔會講「明眼人一睇就會明」,因為陶君行劉細良最初就係因為當全香港市民係傻嘅,所以先會明目張膽老屈呢個果個有收共產黨錢,直接抽水抽著火水。