要搞起LikeCoin,首先係要證明賣得出

雖然之前擔心9月之後文章再加LikeCoin Widget會被Medium採取行動,不過過咗兩日又好似乜事都無;又見倒其他Medium作者好似照常無事,所以偷雞寫多篇講LikeCoin「以身試法」,希望唔會出事啦。
上回講到LikeCoin雖然響技術層面算係相當扎實,亦展示倒將來發展嘅可能性,而幣值雖然從高峰滑落好多,其實參考咗諸如以太幣因素之後仍然可以保持樂觀;但有一個問題卻始終係會限制LikeCoin作者嘅挖礦動力,就係始終欠缺一個賣出LikeCoin嘅明確示範。
雖然Medium上面已有一個詳細教大家點樣響QRYPTOS呢個虛擬課幣交易平台上面註冊、充值同買賣,問題係好多而家LikeCoin嘅作者/挖礦者都係第一次擁有虛擬貨幣;要佢地搞清楚點樣開設第一個電子錢包、再用MetaMask或者Trust去收發LikeCoin經已唔係一件容易嘅事──就算我,都係經歷血的教訓(詳情參閱〈有關Likecoin開戶有幾點要注意的:一個價值$5714的教訓〉)先明白原來MetaMask同Trust只係你個電子錢包「條拉鏈」,而唔係真正錢包本身……
而當呢班作者/挖礦者連呢個概念都未必明白嘅時候,一啲好似理所當然嘅虛擬貨幣買賣手續其實對佢地黎講就更加難明:
例如佢地唔會知道要充值QRYTOS戶口甚至買賣LikeCoin,首先你要有以太幣以響交易時充當交易費用。而你當要用現錢買以太幣、又或者當你將LikeCoin換成以太幣後想轉番現金,亦唔係響QRYTOS上面進行,而需要搵另一個以太幣交易所申請戶口同入錢購買……呢啲嘢對於買賣開虛擬貨幣嘅人黎講可能駕輕就熟,但對於一般人諸如我黎講,卻絕對唔係容易事呢!(證據就係可能上面段嘢都可能係錯)
結果而家好多LikeCoin作者/挖礦者可能開頭好開心咁儲咗一堆幣,但好快發覺要將佢拆現並唔係一件容易事甚至無從入手,於是挖礦動力就會好快跌至0而放棄,剩番嘅可能又變成少數熟悉呢個交易過程嘅it狗/虛擬貨幣投資者,咁就好難發大黎搞。
所以如果你問我LikeCoin有咩仲未做得夠好,就係要向挖礦者解釋清楚「LikeCoin點樣可以賣得出」──其實我都曾經考慮過用折讓價向作者用現金收購LikeCoin,再幫佢地響虛擬市場賣番出去黎賺少少「手續費水腳」,不過而家似乎大家都仲係唔多Coin,太少量嘅話賣出一定蝕一大截交易成本所以價錢一定唔好,同埋我自己都仲未試過響QRYTOS正式賣出個LikeCoin,所以都係得閒試埋先搞……
不過LikeCoin營運者本身如果可以「送佛送到西」,響官方擺埋一個懶人包教作者/挖礦者點樣由乜都無去到最尾可以成功賣出LikeCoin變成現金,咁就算佢而家唔即刻做,至少佢都會對呢隻幣多咗重信心;甚至乎我諗既然派開LikeCoin,點解唔順便附送埋少量ETH,等佢地可以實際試下需要比Gas嘅遊戲或者響QRYTOS,可能都會有鼓舞作用:其實都唔駛多,0.01ETH(2.88美金)經已好夠用。
講真如果每日都派成30000LikeCoin,以0.01ETH=600LikeCoin倒其實都唔算太大負擔(當然亦唔駛人人派哂、或者每次都派咁多,條數可以慢慢計),但對於作者黎講,有咗ETH可以做各種實驗就相差好遠,甚至可以吸引更多人埋堆玩添~
無責任發言,純粹建議下,覺得有無道理都請響下面Widget拍掌5次,有興趣嘅再睇埋下面相關文章,謝謝!
延伸閱讀:
有關Likecoin開戶有幾點要注意的:一個價值$5714的教訓
因為Likecoin,繼續同Medium鬥法;兼論Likecoin易收難給的吝嗇心態
