【而家應唔應該買樓系列】點解中產難買樓?一個真實個案
Sep 5, 2018 · 4 min read

原本繼上一篇〈香港仲有無平樓賣?〉講完香港其實仲有平樓賣之後,下一篇應該係寫〈而家應唔應該買樓?〉,但由於拖下拖下,結果又比我聽多咗啲故仔想插隊分享,其中一個就係最緊撞倒一位舊同學嘅中產買樓故事。
首先而家響香港好諷刺嘅係,明明中產階級字面上嘅意思係響社會嘅中層咁解,但而家你家庭月入無十萬八萬都真係唔好意思叫自己中產,偏偏去到呢個收入門檻經已係全香港最有錢果5%人口。正正因為收入咁高,我成日都對「中產都買唔倒樓」好不以為然,認為呢班友只係唔肯接受現實,遷就下買番啲平樓而已,並唔係「買唔起樓」。
正如前面講,咁我新近就撞番個舊同學,佢而家響政府做,加埋老婆份糧家庭月入應該都有十萬多啲;最正嘅地方係之前住嘅九龍塘宿舍有成差唔多一千呎,但不幸嘅地方係佢地只限住十年,而家終於夠期。

