من سلسلة أحاديث: ذكي بس مهمل
قابلت اليوم عبدالرحمن،
يعمل بخدمة التوصيل من الساعة الخامسة مساءاً بعد انتهاءه من الدوام، حتى لا يضيع الوقت سدى.
💡: شنو مجال عملك؟
👨🏻: اشتغل ببنك الانماء، وادرس بالجامعة الالكترونية محاسبة..
💡: حلو.. وهل هو المجال اللي كنت تبيه؟
👨🏻: بصراحة لا، ابوي كان يقول ازين شي اصير مهندس.. وبعد بحث لقيت انه المهندس الكيميائي يستلم راتب عالي، دخلت جامعة البترول بس ما توفقت..
💡: شكلك ذكي بس مهمل.. صح؟
👨🏻: ههههه بالضبط جبتيها
حصلت له عدة مواقف جعلته يبعد شيئاً فشيئاً عن مجال الهندسة، فأثناء تدريبه في سابك اطلع على مشكلة مالية يخوضها مدير عام بأحد الأقسام وقال..
👨🏻: كنت أتمنى أصير زيه، عمره ٣٨ ومهندس ومدير عام. بس اكتشفت ان راتبه قليل ! وقارنته بواحد اعرفه عمره ٣٤ وراتبه ٦٥ يشتغل ببنك الإنماء.
💡: اوه، يعني انت تشتغل عشان الراتب؟
👨🏻: لا يعني مدري كيف اقولك..
💡: تراك رجال وراك نفقة، طبيعي انك تشتغل عشان الراتب
👨🏻: ايه بس مو الراتب لحاله، ودي امسك منصب يعطيني المجال للتغيير.
💡: انتا قصيمي؟
👨🏻: ايه هههه لهالدرجة واضح؟
💡: ايه حيل.. عسى الله يبلغك يارب باللي فيه خير وصلاح، حط ببالك الشهادة مجرد بطاقة خضرا.. الأصل المعرفة اللي عندك واسلوبك والتزامك بالعمل.. تحس قوتك بالقدرات القيادية والادارية؟
👨🏻: مدري صراحة، بس ابي اغيّر..
💡: حلو، شعور انك ضايع.. طبيعي يمكن انت بمرحلة تحوّل بحياتك.. وانا شخصياً امر فيها، طلعت ماجستير وتخصص علمني من كل بحر واحس اني بلشانة، كني وحدة قالت هاتوا لي قلم ومساحة وفجأة قطوا عليها مقلمة كاملة !
👨🏻: ههههه ايوة بالضبط جبتيها هذي الخطة الحين ان شاء الله اخذ الشهادة واشوف.. يمكن تجي فرصة ادرس برا وان ما حصلت الحمدلله انا قاعد اشتغل تمام بدوامي.
💡: حلو، الله يوفقك ويسهل امورك.. حاول تلاقي السبب اللي يخليك تستمتع بشغلك.. لانك ان لقيته تعتبر نعمة كثير يتمنونها.
عبدالرحمن طلع من حلم الجيل السابق (المهندس/المدير الكبير) ووجد الفرصة او الفرصة أوجدته بمجال مختلف، وهو الآن يتعلم رسم حلمه الخاص.
