太深入就唔講啦，大家都淨係會想知個實際定義係點區分。根據Hong Kong Nutrition Association定義：「部分認可大專院校設有營養治療學及／或食品及營養學課程，完成課程並取得相關學位（學士、碩士或博士）的人士可成為營養學家」。營養學家英文係Nutritionist，就係要有認可學歷，然後去進行健康推廣同基本飲食建議既人。筆者係香港大學Food & Nutritional Science畢業生，所以就係一個營養學家Nutritionist。
營養師，英文係Dietitian。個分別位係佢係一個更嚴謹既制度，要攞牌，會接受過臨床營養學同飲食諮詢輔導實習訓練。所以佢職能上唔只係好似營養學家咁做日常健康飲食推廣，而係更偏向於病理同治療方面既臨床工作，佢地真正有資格給予病人專業飲食建議，例如糖尿病人，厭食症患者等等。因此平時有啲朋友會問我有咩咩病應該點食，我都會講返我無咁既資格去比意見，戴左頭盔先。
至於點去成為註冊營養師Dietitian，簡單講就係去英／澳等地讀返認可課程加實習，攞埋個資格，就可以返香港做野，叫自己做英國／澳洲註冊營養師。而香港唯一就係有個HKU SPACE營養治療學深造文憑可以成為香港認可以營養師，但國際認受性去到高唔高，我就無特別研究了。
值得一提，市面上有啲人連認可學歷都無就叫自己係營養學家，其實係有問題的。營養學家雖然無營養師實習到咁in-depth，但都唔係你話自己係就係。
總結而言，想講返我係一個推動健康飲食既營養學家；但如果你已經去到有病，需要飲食治療意見，我就無資格去幫你架啦，搵返醫生再轉介你去註冊營養師啦。
Follow我Instagram啦：https://www.instagram.com/hkfoodnu/
