Flight Info 航班資料
國泰航空CX288
法蘭克福國際機場（FRA）- 香港國際機場（HKG）
2021年10月30日（星期六）
起飛時間：14:08（13:45）
到達時間：06:33（06:50）
飛行時間：10小時25分鐘
機種：空中巴士A350–1000（B-LXA）
座位：22K
Preface 前言
今次坐國泰由歐洲直航返香港係意料之外嘅事，原因係疫情下香港嘅航班熔斷機制令我原本坐嘅卡塔爾航空被禁飛14日，所以最後改為取道德國返香港。國泰一共訂購咗46部A350客機，分別係28部A350–900，以及18部A350–1000。今次乘搭嘅係國泰2018年6月投入服務嘅第一部A350–1000，機身編號B-LXA。
Ticketing 出票
今次呢張飛係出發前一星期喺卡塔爾航空官網購買，原定係香港↔多哈↔米蘭來回，價錢HKD 13,996。值得一提嘅係呢張飛屬於卡塔爾航空喺2021年10月新推出嘅「Business Lite」票價（子艙位P）。雖然價錢較平，但限制亦都相對地多，例如唔可以預先揀位、冇lounge access、改票手續費較高等等。但因應航班熔斷情況特殊，客服幫我改機票嗰陣劃為子艙位D（國泰航段為子艙位I），唔單止有得入lounge，儲嘅里數亦都多咗。
Check-in 辦理登機
由於今次我係轉機，所以並唔係喺法蘭克福機場辦理登機，而行李就係由米蘭直掛到香港。記得要檢查清楚返香港用嘅PCR檢測報告格式係咪載列相關機構要求嘅所有資料，報告唔符合要求嘅話有機會被拒絕登機。
另外當日嘅載客量非常一般，反而商務艙乘客比特選經濟艙以及經濟艙加起來仲要多。當日商務艙一共有45位乘客；特選經濟艙有9位乘客；經濟艙只有20+位乘客。
Lounge 貴賓室
國泰喺法蘭克福機場T2有自己嘅商務貴賓室，但係由2019年起已經暫停營運作內部維修而未有對外開放（但門口告示寫嘅原因係疫情關係暫停）。法蘭克福機場T2另外亦有同屬寰宇一家嘅日航貴賓室，同樣因為疫情關係而暫時停運。同時整個T2航廈只有幾間餐廳同免稅商店有營業，場面相當冷清。
Boarding 登機
當日早上時段使用Gate 9嘅航班只有CX288，而且loading唔多，好快已經完成安檢。安檢原本設有一條優先通道畀商務艙乘客，但當日鑑於旅客人數唔多而未有做任何分流。閘口前有幾位國泰地勤人員會協助檢查轉機旅客提供嘅文件是否符合香港入境要求。言談間了解到經常有乘客因為PCR檢測報告「中伏」而被拒登機，特別係有關當局對報告需使用嘅字眼同語言標示有嚴格標準，對外遊非英語系國家嘅旅客嚟講，影響相當大。
Cabin 機艙
商務艙區域位於Door 1及Door 2之間一共46個座位並以1–2–1排序，每位乘客都有direct aisle access。緊接商務艙後面係以2–4–2排列嘅32個特選經濟艙坐位，最後就係以3–3–3排列嘅256個經濟艙坐位。個人嚟講我比較鍾意A350–900商務艙分隔前後cabin嘅佈局，mini cabin（第20–21行）嘅私隱度較A350–1000更高。
Seat 座位
國泰A350–1000機隊採用嘅係Safran製造嘅Cirrus III反魚骨座位，並由Studio F.A. Prosche客製化座位嘅設計同物料。今次坐嘅係22K，位置於成個商務艙尾二嗰排嘅右邊窗口位。
私隱度方面，座位外殼邊緣位置凸出，坐低嘅時候整體視線範圍都係被包圍，基本上唔大幅度向前傾嘅話都係唔會望到隔離位。另外，將座位左邊嘅扶手拉上，可以額外遮一遮走廊通道，提升私隱度。
閱讀燈、座位控制、可以控制主屏幕嘅handset都喺座位旁邊。今次留意到個handset嘅X掣已經畀人用到甩咗。。。
座位窗邊的空間亦延伸為座位嘅一部份，提升咗座位嘅闊度同儲物空間。窗邊呢個位置係成個座位最好嘅儲物空間，除咗空間充足，喺鋪咗床墊後亦唔會阻住拎嘢，非常方便。另外，座位左手邊拉上扶手亦都有一個放得落一支水嘅儲物位置。
多得窗邊呢個空間，喺躺平後嘅腿部空間非常充足，轉身時唔會好似其他反魚骨位咁對腳會左撞右撞嘅問題。加埋床墊，呢程機就舒舒服服咁大約瞓咗六個幾鐘左右。
Amenities 備用品
一行到埋位已經見到所有嘢已經放咗喺個位到，包括英國品牌Bamford嘅枕頭同床墊被鋪、過夜包、防疫用品一套、仲有Evian礦泉水一支。國泰嘅amenity kit同樣係由英國品牌Bamford出品、當中包括有眼罩、耳塞、牙刷、牙膏、漱口水等等。疫情期間，國泰亦派發每位乘客「國泰護航套裝」，包括一個口罩、兩張消毒紙巾。
Food & Beverages 餐膳
歐洲返港嘅航班一共有兩餐，上機後首先係派咗午餐，落機約個半鐘前再派早餐。上餐嘅時侯都係成個tray上，選擇亦非常充足。
我今次預訂咗個東方素食餐。但係個頭盤我望落都覺得唔對路，橫睇掂睇似雞胸多過素食。收餐嗰陣同問咗一問空中服務員到底碟嘢係咪素，佢話會去check返再同我講，但最後去到落機都冇人再搵過我。
飲品方面，本來以為雙數月份可以揀Cathay Delight，但睇menu只係見到得Pacific Sunrise。最後飲咗杯港式奶茶就算。
Lavatory 洗手間
整個商務艙一共有4個洗手間，前後各2個，後面兩個洗手間會同特選經濟艙嘅乘客共用。空間洗手間嘅梘液同body lotion同樣係Bamford出品。
Entertainment 娛樂
國泰A350–1000使用嘅係Panasonic Avionics eX3娛樂系統。電影、電視劇、音樂、遊戲等等都非常齊全。選擇除咗多元化之外亦都非常緊貼潮流，例如Mirror、ViuTV嘅最新節目都一應俱全。但我最鍾意都係A350嘅機身鏡頭，喺起飛同降落嘅時候睇特別靚！
國泰嘅A350–1000客機提供機上wifi服務，1小時嘅用量價錢USD9.95，全程機任用就係USD19.95。
Verdict 總結
國泰商務艙喺硬件上並冇乜可以挑剔嘅地方，座位嘅舒適度、私隱度以及整潔程度都十分之高。今次唯獨是畀咗碟雞胸我個東方素食餐呢到扣少少分。疫情下可以坐到自己地方嘅flag carrier返屋企唔係一件容易嘅事，希望國泰可以守得住，繼續move beyond。
