星爺電影入面嘅「黯~~然銷魂飯」,香港人未食過都聽過。
噚日我又去咗一間馳名黯然銷魂飯嘅茶餐廳一試真假,一行入去,舉目四週都係黯然銷魂飯嘅捧場客,我諗都唔諗,自然就梗係跟隊啦!我食過最好味嘅黯然銷魂飯,係炭燒燶邊厚切叉燒配埋都係燶邊嘅荷包蛋,食嘅時候將蛋篤穿、當蛋汁撈落一粒粒嘅米粒入面,再配埋特製葱油,一啖飯一啖叉燒,淨係諗起都令人欲仙欲死,唔怪得連Captain Nancy都一試難忘…
喺我仲沉醉喺幻想中嘅美味之際,一把聲將我拉返嚟殘酷嘅現實…
「點解我講嘅一定係錯?」坐喺角落卡位嘅中年男人激動咆哮…話都冇咁快,對面傳嚟一個阿叔「曉以大義」嘅聲音:「你聽吓人講先,得唔得?」坐喺阿叔隔離嘅阿姐即時附和:「係囉,冷靜啲先。」
哦!原來係一對父母同個仔嗌緊交!嗱,如果有人「懶」理性嘅話,一定會話平和啲嗰一方比較理智同講道理,所以,邊一邊搶先達陣,嗌咗一句「冷靜啲先」就一定有著數。
但係嗌交就係嗌交,未聽清楚件事,都係唔好咁容易下判斷,或者好似掌門人咁講SUPER,所以我姑且都係食住啱啱嚟到嘅黯然銷魂飯繼續聽落去…
「你覺得你講得啱,但我覺得你講得唔啱吖嘛!」中年阿仔繼續高分貝嘅聲浪,意圖解釋自己嘅睇法。「吖!點解你咁萌塞,唔聽人講嘅呢?」對面阿爸試圖以錄音機嘅口吻說服中年阿仔…「如果我覺得你講嘅嘢係唔啱呢?」中年阿仔將個爭拗帶入哲學家嘅討論世界入面,但係由於聲浪過大,周圍嘅食客都不禁望向佢哋…
「你聽吓人講唔得㗎喎!」「我有聽你講,但我覺得唔啱吖嘛!」「點解你係都唔聽人勸、唔聽人講?」「啱嘅我就聽,唔啱嘅我就唔聽!」…
如是者,我嘅黯然銷魂飯已經食到最後一啖…
「我唔理你啱唔啱聽,總之阿爸阿媽講嘅嘢就一定啱!」阿爸聲如洪鐘嘅一句,一錘定音!
全場即刻耷低頭繼續食,阿仔亦終於冷靜落嚟,中止呢場哲學思辯…「咁冇嘢好講喇!」
佢黯然嘅一句,伴住我黯然銷魂飯嘅最後一啖叉燒,一齊吞咗落肚…
辯論家會教你,當你同人理論嗰陣,最好有理有論;但當你同人「理論」無限loop嗰陣,只要加上「我唔理你XXXX,總之XXXXXXX」呢句句式,你一定sure win…至少喺你嘅自我世界入面…
「我唔理你啱唔啱聽,總之女朋友講嘅嘢就係道理!」(設計對白)
「我唔理你啱唔啱聽,總之老細落嘅order就一定要跟!」(設計對白)
「我唔理你啱唔啱聽,總之客人嘅說話就一定是對的!」(設計對白)
「我唔理你啱唔啱聽,總之生舊叉燒都好過生你!」(設計對白)
呢個招牌黯然銷魂飯果然入味呀!~~~