【韓國旅遊】濟州島機場、市內外交通全攻略

9 min readJun 15, 2018

近幾年濟州島成為咗大家嘅新歡，自然景色同純樸嘅氛圍唔單止係韓國人嘅「後花園」，更加吸引咗世界各地嘅遊客，每年扶搖直上嘅觀光人數促使韓國政府不斷改善島上面嘅交通。想自由行玩轉濟州島，就等KKday小編帶你由機場交通到市區巴士、跨區巴士、牛島渡輪一次過搞掂！

＃香港飛濟州島航班

飛濟州島通常有兩個方法，一係喺首爾金浦機場／釜山金海機場轉韓國國內線飛濟州島，另外一個就係直飛濟州島～香港直飛濟州島嘅航班唔算多，但每日都有至少一班，如果搶到平機票亦都唔貴，大家可以多啲留意下機票消息～

＃濟州島上交通概覽

島上嘅公共交通工具得巴士，所以一定要買張T-Money或者Cashbee，喺機場7–11就買得到，唔止濟州，喺韓國好多地方都會用，就好似香港嘅八達通咁方便。

你亦都可以揀用外國人專用嘅M-Pass，M-Pass分為1、2、3、5、7日券，一日最多可以用20次，儲值咗之後除咗交通卡嘅功能之外，仲可以好似T-Money咁喺便利店同的士用嚟比錢。

如果你要離開韓國或都唔再需要用到T-Money或者Cashbee嘅時候，你可以喺GS25、CU、7-eleven、Mini Stop、Withme、Buy The Way 等等貼有標誌嘅便利店進行退卡，退款嘅時候會扣₩500手續費，再退還押金同餘額。

︎卡費：
(1) T-Money & Cashbee：空卡₩2500（₩2000押金，₩500手續費）
(2) M-Pass：1日券/2日券/3日券/5日券/7日券價錢分別係₩10000/18000/25500/42500/59500，除咗卡片費用，仲要比₩5000（₩4500押金，₩500手續費）

︎小編提醒：今年濟州島巴士已經由08月26號起大改版，市區市外巴士路綫號碼將會重組，而票價統一為₩1200起價。另外亦增加咗直通機場嘅急行巴士。最正嘅係每架巴士上面都有Wifi，等各位唔洗再驚蕩失路啦～

︎官網：濟州島公車改版

雖然濟州島巴士系統啱啱先改版，網上唔多更新咗嘅資訊可以搵到，但都唔洗太擔心到時唔識搭巴士。因為官方都有配合新系統嘅相關配套，例如喺巴士站就有搜尋電子牌。電子牌分韓英介面，可以比你搜尋巴士路線、搵到你所在巴士站附近嘅相關資訊、同尋找方向等等。

＃濟州機場至市區

【急行巴士】

由2017年08月26號起新開設嘅急行巴士，巴士號碼係1字開頭，紅色車身。會由機場出發直達濟州島各大區，再沿原路返返機場，橫跨好幾區，大約一個鐘就可以繞行全島。但係站就比較少，只會停大站，有啲觀光景點就未必去到，而目前總共有12條路線。

︎車費：₩2000~₩4000（每5km增加500）

︎搭乘處：入境大廳出口

︎官網：官方巴士路線下載

【機場巴士】

機場巴士600號，途中會經過濟州島市區、中文觀光園區同西歸浦區。車上位置大，適合帶住大行李嘅旅客，車內有亦有中文廣播。

︎班次：往市區06:20–22:00，往機場06:20–21:50，18–20分鐘一班。

︎搭乘處：Gate5 出口機場2號停車站搭車

︎車費：₩4500-₩5500

【支線巴士】

途經機場嘅支線巴士有400、465–2號等等可以直接去到濟州市外巴士站。市區巴士雖然平啲但車上面就冇中文廣播，比較多韓國人搭，而且停嘅站成日會有變動，建議事前要做足功課，同埋上車前同司機確認咗先好搭。

︎搭乘處：Gate2 出口機場1號停車站搭車

︎車費：約₩1200

【的士】

的士分為往濟州市區方向同往西歸浦方向，分為黑同銀兩種顏色，起跳價一樣。另外仲可以留意如果車身有紅、黃、綠條紋嘅的士代表佢係20年以上無事故嘅優秀司機～

︎乘搭處：Gate2 出口直行，面對停車場嘅右邊係往濟州市區嘅乘車處、而左邊係往西歸浦區嘅乘車處。

︎車費：首2公里₩2800，之後每144米／35秒₩100

＃濟州島市區交通

【支線巴士（市區巴士）】

喺08月26號濟州島交通重組後，市區巴士會改叫做支線巴士，車身係綠色，巴士路線主要分為3大類，分別係濟州市支線 (巴士號碼係4字開頭)；西歸浦支線(巴士號碼係6字開頭)；同邑面支線 (巴士號碼係7字開頭)。由於支線巴士主要係畀當地居民乘搭，所以車上未必會有中文廣播，大部分司機亦剩係識講韓文，所以最好喺去之前將目的地嘅韓文寫或印定出嚟，到時俾司機睇就唔怕雞同鴨講啦。

︎車費：₩1200起價

︎小編提醒：有啲巴士一日唔夠十班，有啲最夜九點就尾班車㗎啦，記得要查定站牌嘅時間表或者問下巴士司機呀～

【黃金觀光巴士】

由濟州市政府運營，途經各大必訪景點，例如係東門市場、黑豬肉一條街、新羅免稅店等等，車上面每個座位都配有耳機，入面有中英韓日四語導覽，站牌上面亦都有四語簡介，係專門為觀光客設立嘅巴士，咁就唔洗怕搭錯車同蕩失路啦～

︎路線：濟州歡迎中心→濟源公寓（寶健路）→THE飯店&Vegas賭場入口→濟州市外巴士客運站→濟州市廳（光陽十字路口）→濟州KAL飯店入口→濟州民俗自然史博物館（濟州三姓穴）→濟州國際客輪站→濟州沿岸碼頭→東門市場→Ramada飯店入口→觀德亭→西門市場→龍頭岩→濟州國際機場→樂天城市飯店入口→濟州道立美術館→ 漢拏樹木園→濟州Grand飯店入口→濟州歡迎中心

︎車費：成人₩12000／六歲以上兒童青少年₩10000，上車嘅時候比現金或者用T-Money買飛，一日可以唔限次數咁搭。

︎行駛時間：08:00–20:50，每個月第三個星期一公休

︎班次：每日12班，一個鐘一班，尾班車19:00

︎停靠站：循環巴士，22站一循環，全程一共一小時五十分鐘

︎官網：濟州島市區黃金觀光巴士

＃跨區市外交通

【自駕】

遊濟州島最好嘅方式其實係自駕遊，如果有睇開韓國綜藝節目或者電視劇，唔難發現韓國人去濟州島旅行嘅時候都會傾向於自己揸車，好處係島上面有好多私房景點都係自駕遊去會方便好多㗎！

︎【濟州自駕遊】韓國濟州島租車服務・現代AVANTE 5人座

除咗自駕遊之外，亦都有好多人會以包車嘅方式玩濟州島，一班好朋友出發除返開其實都唔算貴，仲方便好多～

︎濟州島包車環島，尋覓私房景點

【幹線巴士（市外巴士）】

呢幾年隨住濟州島觀光興起，市外巴士線亦都愈嚟愈多，巴士路綫重組後會將市外巴士改做車身藍色嘅幹線巴士。幹線巴士一共有3種，分別係連接濟州市同西歸浦市號嘅一般幹線巴士 (巴士號碼係2字開頭)；由濟州市出發嘅幹線巴士(巴士號碼係3字開頭)；同由西歸浦市出發嘅幹線巴士 (巴士號碼係5字開頭)。幹線巴士嘅站點密集，遍及咗全島，一般嘅景點都可以到達。所以唔識揸車或冇咁多預算包車嘅遊客唔洗擔心，出發前研究定濟州島巴士路線圖就可以玩得又慳又開心！