一個北京話母語者喺香港見到嘅粵語嘅現狀
0. 引言
我覺得粵語，作為一個非常之龐大嘅群體嘅母語，並冇佢應有嘅母語環境。粵語母語者嘅母語畀普通話同英文侵佔得太嚴重，而且越嚟越嚴重。
1. 母語嘅重要性
母語係一個人用得最自然、最舒服、最自在、亦都係表達意思最精確嘅語言。我覺得喺比較廣闊嘅領域之中都可以自由地運用母語，係一個人基本嘅人權。
2. 我喺大學入便嘅親身經歷
我2022年嚟香港，喺浸會大學讀本科，2023年入中文系。而家嚟香港已經兩年。
2.1 老師、助教
浸會大學中文系都有比較多老師、助教係只係識得講普通話，而需要本地嘅同學遷就佢哋講普通話。有啲老師認為喺香港當中文老師、助教係需要識講粵語嘅，所以佢哋對於自己唔識講粵語呢件事抱有住歉意，而且都開始學。而有啲老師、助教就冇咁樣嘅認知。
有一次，一個助教話一組同學犯咗一啲基本嘅錯誤，有一啲字讀錯咗。但係佢哋係用普通話，而唔係廣東話。如果佢哋係用廣東話，唔知呢啲字會唔會讀錯。
有一個本地老師話，心入便用廣東話寫文章之後，要用普通話讀一遍，睇下用普通話讀會唔會唔順口。
喺大學比較專業性嘅presensation講自己唔係咁熟悉嘅語言，呢種尷尬、緊張、不安，我都深有體會，體驗非常之唔好。我有幾次都嘗試用廣東話做pre，做完之後，有時候老師都會同我講，「廣東話講得唔錯呀，冇乜口音喎。」我倍受鼓勵。但係，本地嘅同學用普通話做pre，我印象中好似都冇老師、助教讚佢哋普通話好，好似呢個係佢哋嘅本分。
2.2 課程
大學中文系中嘅「現代漢語語法」課程，係指普通話嘅語法。而粵語嘅語法並冇涉及。（除大學之外，中、小學亦都冇教粵語嘅語法同語音。）粵語教育嘅缺失，令到粵語母語者好少機會由語言學嘅角度了解自己嘅母語。
浸會大學入便有粵語堂，亦都有普通話堂。粵語堂得兩個，而普通話堂有好多。我讀晒嗰兩個粵語堂，老師教得都幾好，不過我覺得就唔係好足夠。反而普通話堂更加「充足」。而且粵語老師都非常之鼓勵我哋大膽講，讚我哋講得唔錯。（其實我知我哋嘅水平嘅。）有幾次本地同學攞佢哋普通話堂嘅功課俾我睇，我覺得有啲不必要地難，譬如話：佢哋要求兒化音。但係我認為絕大部分嘅兒化音唔係普通話，而係北京話。對兒化音嘅追求係冇必要、過度、甚至乎刻意為難嘅。
2.3 打字
作為一個北京話母語者，用拼音輸入法對於我嚟講非常之自然：基本上就係我點講野，就用拼音點打字。但係嚟到香港之後，我先發現原來漢字都有好多種輸入法。而香港人打漢字，可能都唔係好容易。
最簡單嘅打漢字嘅方法應該就係字音輸入法，因為點講野就點打字。但係由於好少有學校教粵語嘅拼音系統，粵語母語者使用字音輸入法嘅比例並唔高。
香港最多人用嘅輸入法應該係倉頡同速成。我都學咗速成，但係感覺冇粵拼輸入法咁簡單，所以慢慢就少咗用。倉頡同速成係字型輸入法，即係以漢字嘅字形嚟打字，要記住漢字點寫、而且要背字根、規則等等，比較麻煩。所以有時香港人都唔想打漢字，而係會打（港式）英文，呢個都幾有趣嘅。
3. 粵語嘅語言現狀
粵語口語唔畀官方視為一種正式嘅書面語。教育系統中，唔可以用粵語口語作文，要用「書面語」。而「書面語」，其實差唔多就係普通話。以粵語口語寫作比較正式嘅文章，即係「粵文」，亦都存在，不過就非常之罕見，只係限於圈子入便。
香港除咗粵語同普通話，英語亦都極之流行。而且，「高級」、「正式」嘅場合更加偏向英文，譬如話大學。
4. 我對於呢種情況嘅反思
廣東話嘅呢種情況，的確擴大咗我嘅認知。自己心入便嘅語言、說話唔畀接受，會唔會令到粵語母語者感到自己唔畀接受，感到壓抑、封閉。對於人嘅心理健康是否都有一定嘅影響？
我覺得粵語母語者用書面語寫文章應該係彆扭嘅。我自己都試過心中講粵語手打書面語，覺得太麻煩，打咗一陣就轉咗普通話。
我作為一個北京話母語者，係天然嘅既得利益者。我好似生發出一種因自己冇得自由選擇嘅優勢，而人哋冇得選擇嘅劣勢嘅不公平嘅，不由自主嘅愧疚感。
由而家嘅情況睇，我覺得書面語（本質上係普通話），好似係粵語語言系統內部關係緊密嘅一部分，以致我之前嘗試過教一名外國同學粵語，我唔係只係教口語，而係口語、書面語平行咁教。（所以我推薦佢粵語、普通話一齊學。）如果唔教書面語嘅話，佢可能睇唔明香港大多數寫落嚟嘅漢語，因為香港大多數寫落嚟嘅漢語都係書面語。口語同書面語咁複雜，以至於我做咗一版ppt嚟介紹佢哋。見圖（而家睇返都覺得可以再改進）。
（佢睇YouTube可能睇唔明字幕，但係聽得明。其實我之前一直都唔係好理解香港YouTube片配書面語字幕嘅用意，因為唔講粵語而知道書面語嘅人，即係講國語/普通話嘅人，應該都好少嚟睇粵語嘅片。點解要為咗照顧佢哋而配書面語字幕？不過之後我發覺其實唔係咁樣，呢個其實係粵語內部嘅語言現象。呢種情況就導致我啱啱開始學粵語嗰陣時非常之不便，因為字幕唔係佢哋真正講嘅嘢，如果我有啲嘢聽唔明我都唔知係咩字嚟嘅，所以就好難學。不過我都搵到過一啲陪口語字幕嘅片。）
5. 粵語語言現狀嘅背景
5.1 白話文運動
1915年新文化運動之後，白話文取代文言文成為書面語，達到「言文一致」，即係書面語同口語一致。但係，所謂嘅「白話文」，其實只係北京話嘅白話。對於官話地區嚟講，的確係達到咗「言文一致」；但係對於其它漢語，係由寫文言文轉為寫北京話，雖然北京話相比起文言文更加接近今日嘅其它漢語，但係都唔係寫緊自己嘅口語，而係寫緊人哋嘅口語。本嚟，大家都唔係「言文一致」，都係寫文言文；但白話文運動之後，只得官話地區達成言文一致，而要其它漢語寫北京話，好似就變咗做北京話對其它漢語嘅壓迫。
5.2 漢字強大到恐怖嘅能力
能夠強大到統攝咁廣闊嘅地域，維繫咁多嘅語言嘅文字系統，應該得漢字一個，獨一無二。但係我覺得呢種強大，已經去到恐怖嘅地步：一個橫跨空間、時間，仍舊巍然屹立嘅巨人，令人震顫。具體嘅不便多講。
同漢字相似嘅應該係阿拉伯文（用嚟書寫阿拉伯語嘅）。阿拉伯嘅情況同白話文運動之前嘅情況差唔多，即係大家都寫文言文（正式場合中）。
5.3 英語霸權主義
英語，好似自然地同「高級」有聯繫。大學入便嘅堂，除非係必須要用漢語，譬如話；中文、中醫，否則一般都係用英文教學。有時我覺得不必要：大家都講廣東話，點解要咁間接？而英文作為一個冇咁熟悉嘅工具，有時都會阻礙諗法嘅表達。如果粵語都可以好似英文咁用嚟做學術（同埋其它正式嘅領域），咁我估香港人應該會更加舒服、自在、表現會更加好。
但係，從現實角度嚟睇，用英文比起用漢語可能都係更加好嘅選擇：畢竟香港背後嘅巨人不容小覷。
6. 後記
6.1 我學粵語嘅經歷
我喺嚟香港嘅半年前開始學粵語，睇書、睇YouTube。嚟到香港之後，有咗豐富嘅語言環境，所以進步都幾快，而家用粵語基本溝通已經冇乜問題。不過聽力唔係好好。
記得我嚟香港嗰陣時，仲需要隔離。有一名入境處嘅職員打電話過嚟問我一啲情況，佢一開始就睇我着想，講普通話（講得唔錯）。我鼓起勇氣同佢講粵語，佢話：「多謝你講廣東話。」，如釋重負咁同我開始講嘢。呢句說話令我開始思考，嚟到香港，粵語係唔係一個要求？香港人自己又點睇而家香港粵語嘅現狀？
都有好多老師、同學幫助我學粵語。多謝大家。
雖然我粵語OK，但係我都係傾向於交普通話母語嘅朋友，畢竟係母語嘅力量。平時同本地嘅同學溝通，一般都係佢哋講普通話，因為我呢個年紀嘅香港人嘅普通話都唔錯，大於、等於我嘅粵語。
6.2 蒙古語嘅相似境況
蒙古語，係中國少數民族蒙古族嘅語言。雖然我自己係蒙古族，但係蒙古文並唔係我嘅母語，我嘅母語係北京話。中國北京政府並冇因為我嘅民族而教我蒙古語。我嘅蒙古語係長大咗之後對於自己嘅民族身分感興趣而自己學嘅。
內蒙古曾經用蒙古語教學，但係蒙古語嘅環境亦都日漸收縮。2020年，中國內蒙古政府宣布語文、道德與法治同歷史三個科目將使用普通話教學，引致蒙古族抗議。但星火未能燎原，抗議畀政府無情鎮壓。2023年9月起，內蒙古全面使用普通話教學，蒙古語喺教育系統中落幕。
喺中國流行嘅影片網站bilibili上，蒙古語、藏語等少數民族語言唔畀允許出現喺評論區；而如果喺影片入便出現，則要配普通話字幕。而英語、俄語等外語卻冇咁樣嘅限制。
6.3 語言嘅性質
有時我覺得自己愛嘅係「純粹」嘅語言，但係呢種純粹嘅語言好似並唔存在。語言，一定係起源於一定嘅人群，畀一定嘅人群使用，存在於一定嘅空間、時間。呢個世界上有一個大家都識講嘅語言當然係好好嘅，但係我認為呢個語言唔應該係英語、或者其它自然語言：因為佢嘅母語者有天然嘅優勢，以致不公平。世界上共通嘅語言應該係一種精心設計嘅人工語言。但係呢個諗法不啻天方夜譚。
6.4 世界各語言嘅共通局面
強勢嘅語言越嚟越強勢，弱勢嘅語言越嚟越弱勢，係全世界語言嘅共通局面，係「語言達爾文主義」嘅惡果。今時今日，世界上嘅語言加速滅亡緊，同語言一齊滅亡嘅，係文化、民族、多樣性、包容性同人類社會對於弱者，本就可憐嘅憐憫。
ps
本文基於我自己嘅觀察，如有冒犯，還請見諒。
第一次用粵語寫長文，請多指教。
成紀八一九年（公曆二〇二四年）四月十二日（金曜日）於香港浸會大學