唔知幾時開始，有一輪香港出現咗一堆用日本動漫作品名去做歌名嘅廣東歌，但係內容又同套作品無關。
呢種歌同動漫作品嘅粵語主題曲唔同，同套動漫作品幾乎冇關係，只係借用動漫作品名去做歌名（或者有人話係「咁啱撞名」），衍生出另一種主題。
當我留意到呢堆歌嘅時候，仲喺幾間漫畫出版社做緊小薯，因為鍾意日本動漫作品，幾乎聽晒呢啲廣東歌。老老實實，就唔係首首都啱聽，而我又衰嘅，我多少有啲將原本動漫作品嘅印象塞咗落去首歌度，有啲歌會令我覺得唔係好啱feel，首歌想講嘅內容又演繹得唔係咁好。不過當中當然有好多首係個人好啱聽嘅作品，無聊睇吓我嘅playlist，最常loop嘅係以下5首。個人重口味，幾乎都係ROCK嘢。排名不分前後左右忠奸。
《鐵拳之道》 KOLOR
KOLOR x 梁柏堅嘅作品，永遠都言之有物，睇吓聽嘅人點解讀啦。
呢首《鐵拳之道》表面上用番漫畫作品嘅內容，一聽覺得好熱血，想講「堅持」嘅重要性。
聽多一兩次，編曲ROCK得嚟又有種沉重感，突然叮一聲諗起，「呢首歌喺雨傘革命之後作嘅」。
係我唔好啦，我又諗多咗囉。呢兩句聽到眼濕濕…
我只有一對舊拳套
不棄守我的小領土
《賭博默示錄》 KOLOR
係呀又係KOLOR x 梁柏堅，呢首舊少少，係2012年嘅作品，原本係港台節目《賭海迷途》嘅主題曲。
