伊朗明明勁過摩洛哥：睇下點從Elo rating搵到馬會(市場)錯價
Facebook 專頁有更多無聊短文: https://www.facebook.com/ivanliresearch/
呢篇文講點樣由Elo rating 搵返「合理」嘅賠率，然後睇下有乜係錯價，同埋有乜搵食機會。換句話講，即係睇下，有咩隊係被明顯高估／低估，令到個賠率太偏離基本因素。例如（而家冇了）可能Ｎ年前人人鍾意買英格蘭，高估佢實力，整熱晒個賠率，咁就其實買對面合理啲
建議先睇咗呢兩篇教學文：唔講戰術人腳，純數字分析世界盃分組同奪冠，劇本決賽就係巴西對德國，巴西捧盃，報仇成功。得睇再睇埋：比馬會更準的估波必勝法
又再示範一次，點解Elo rating 咁重要，又或者任何根據國際足協排名嘅分析都其實可以不理。就睇昨晚場波，俄羅斯5-0大炒沙地阿拉伯，比數令人意外。但唔使馬後炮，我估大多數人都估到俄羅斯贏，賠率都明顯係。
但你睇FIFA 排名（右圖），沙地阿拉伯高過俄羅斯。信佢就死了。掉轉，睇Elo Rating，唔止話你知俄羅斯勁啲，仲要勁一截下。類似嘅唔同系統打交情況，我在之前啲文都講過，多數都係Elo Rating最有預測能力。
好啦，馬後炮冇用，睇嚟緊嘅波，睇下點。睇下呢六場波（對，星期五同星期日，最初唔知點解冇星期六，可能我襟錯制收埋咗，但冇乜大影響）
睇賠率話你知，熱門係烏拉圭，摩洛哥，西班牙，塞爾維亞，德國，巴西。呢個全不意外，除咗摩洛哥嗰場，基本上你唔睇波都估可以估到。（摩洛哥嗰場好特別，陣間會開一段講）。
問題係，鬼唔知德國巴西係熱門咩，但，係咪太高估佢哋嘅勝算？掉轉，都估到葡萄牙瑞士下風，但係咪太低估佢哋勝算？
所以我哋拎晒啲Elo Rating出嚟計數。
Elo Rating點計，唔再解。但每場波後都更新，所以冇時效問題。咁就好冷血，高分嘅贏面大啲（如果結果唔係嘅，之後分數就會反映）。另你見到個Diff就係Elo Rating嘅差距，兩個數相減。
在Elo Rating嘅世界，有呢個差距就計到兩隊嘅得勝機會。是咁計的，亦都兩個機會加埋會係一。我就幫你計埋了
留意就只係個分數差距最重要。即係話，2000分同1800分對碰，實力相差，就等於1400分同1200分相距的（亦因為咁，Elo Rating可以對比唔同年代嘅球隊，甚至唔同界別嘅隊伍，例如2014德國出機啲定係佐敦年代嘅公牛屈機啲）
咁你話，和波呢？是冇的。呢個你可以話係Elo Rating用落足球度嘅最大缺憾，所以你見我舊文其實去到淘汰賽先用。但而家急不及待寫文。留意Elo Rating原本係用落圍棋呀，打拳呀，打機之類唔會和局的遊戲。所以可能用落NBA好過足球。至於點處理個和局，好多學術文（對，真係好多）提出過，但未有一家成為絶對主流，亦太深，不講了
討論啦喎，貼多次個圖先：
首先講第二場，摩洛哥對伊朗。明顯呢場波最趕客，好可能一條友你唔識。但就計數角度最過癮係呢場波。因為馬會（即係市場）係估摩洛哥熱門，都有啲分野，2.2 vs 3.6．但掉轉，伊朗嘅Elo Rating係高過摩洛哥，仲都爭成五十幾分。即係差不多係六四波—但伊朗六。睇下最後開乜。好玩的
另外睇第一，第五，第六場，烏拉圭，德國，巴西。咁明顯係名牌強隊，鬼唔知係熱門。但睇第一同第六場，Elo Rating話你知巴西烏拉圭得勝率應該差不多，亦都即係埃及同瑞士勝率差不多。但賠率上，巴西熱過烏拉圭不少，瑞士又冷過埃及不少。即係話，個市場，似乎係過份睇好巴西／過份睇淡烏拉圭（相對地），或者係，太過睇高埃及（因為大家識沙拿？），睇低瑞士（瑞士好似屆屆都畀人睇低）。所以就賭波角度，烏拉圭瑞士抵買，巴西埃及唔抵。當然，冇包生仔，到時埃及大炒烏拉圭都好，唔使出嚟抽水。
睇德國嗰場，Elo Rating話你知，佢地得勝機會唔夠八成，低過烏拉圭同巴西。但你見德國勝賠率熱過烏拉圭。同樣邏輯，即係可能睇低烏拉圭，或太睇得起埃及。又同時太睇得起德國，太睇唔起墨西哥。留意德國嘅Elo Rating近幾個月跌咗唔少，因為成堆熱身賽打和（反而對沙特嗰場冇減，贏一球都係贏）
最後睇第三四場，雙牙大戰，同埋哥斯達黎加塞爾維亞。西班牙塞爾維亞熱門。西班牙有六成勝算，但塞爾維亞得五成半的，但西班牙勝係 1.9，塞爾維亞係1.88 — 請將上面我講嘅嘢自己寫一次。
呢篇文完工於星期五下午四點半，我會星期五晚夜晚七點半左右貼。踢晒六場後就會最尾打多段驗證下。
最後補一句：只係學術討論。唔係唔鼓吹人賭博，而係我想講，呢類分析好多人會做—但，冇人會在香港買咯！我係買梗係買外國賠率啦，好分好多的。職業賭波先唔會在香港買，除非真係有啲好本地嘅錯價，例如個個發癲買英格蘭，或者買香港隊
Facebook 專頁有更多無聊短文: https://www.facebook.com/ivanliresearch/
（星期六淩晨更新）驗證先。呢段打於葡萄牙對西班牙後。之前三場波（俄羅斯沙特，埃及烏拉圭，摩洛哥伊朗），都係Elo Rating高嗰隊贏。咁俄羅斯烏拉圭唔令人意外，但伊朗我呢篇文講係被低估，結果險勝一球。係有啲運，但三分就三分。帶住呢個優良記錄去到第四場，我當然都係估西班牙勝。甚至半場落後一比二我都仲好有信心至少追和甚至反勝—如果冇最尾球罰球就好了
好啦，但最後和波，即係inconclusive。係廢話，但我始終相信場波踢多次都係西班牙上風，事實今次亦係，葡萄牙多得西班牙兩個犯錯（一個小錯，一個大錯）。
可以睇埋星期日塞爾維亞。賠率就好熱下，但實際rating唔係咁強。至於德國同巴西，正路大熱勝出，但兩隊要有一隊翻船嘅，應係德國。（星期六淩晨更新完）
