《就算世界我為敵》—在伊朗，唔係你欺壓人，就係人欺壓你，冇第三條路
幾個楔子先，呢幾個故事我都成日提，亦得到好多共鳴，當然同正文都有關。平時睇開我文嘅必定聽過，可以跳去正文。
先係關於緬甸：
緬甸有這麼一個傳說：有一條惡龍，每年要求村莊獻祭一個處女，每年這個村莊都會有一個少年英雄去與惡龍搏鬥，但無人生還。又一個英雄出發時，有人悄悄尾隨。龍穴鋪滿金銀財寶，英雄用劍刺死惡龍，然後坐在龍屍身上，看著閃爍的珠寶，慢慢地長出鱗片、尾巴和尖角，最終變成惡龍。 -緬甸尋找奧威爾
然後，係關於英殖當年總警司葛柏貪污：
貪污就像一輛巴士，你可以上車跟大夥兒同流合污，否則只能夠站在路旁默不作聲，若有人試圖擋在巴士前面，只會被巴士「撞倒」
最後，就係我成講嘅屈原故事（咁淺唔使語譯啦？）：
屈原既放，遊於江潭，行吟澤畔，顏色憔悴，形容枯槁。漁父見而問之曰：「子非三閭大夫與！何故至於斯？」屈原曰：「舉世皆濁我獨清，眾人皆醉我獨醒，是以見放。」漁父曰：「聖人不凝滯於物，而能與世推移。世人皆濁，何不淈其泥而揚其波？眾人皆醉，何不餔其糟而歠其釃？何故深思高舉，自令放？」屈原曰：「吾聞之，新沐者必彈冠，新浴者必振衣；安能以身之察察，受物之汶汶者乎？寧赴湘流，葬於江魚之腹中；安能以皓皓之白，而蒙世俗之塵埃乎？」漁父莞爾而笑，鼓枻而去，乃歌曰：「滄浪之水清兮，可以濯吾纓；滄浪之水濁兮，可以濯吾足。」遂去，不復與言
有時真係唔係話扮文青扮非主流，但啲「小眾」片往往都不少好嘢（當然啦，唔係因為康城又未必有人理）。情況就係港產片有地利有親切，鬼佬片有軟實力有龐大發行宣傳機器有慣性收視，但其他片呢？千揀走得出嚟嘅，好多都係好嘢。
呢套《就算世界與我為敵》，我知道時已經相當遲，得返一星期一場特別放映，但我都仆去睇（聲明：無任何利益，張飛我都自己買，唔係優先場之類）。嚟緊都仲有場，記得去睇。
我地先睇官方簡介，其實都劇透咗大半（本文都係，唔想劇透嘅唔好睇）：
面對強權壓迫，人該如何抉擇？瑞扎為人正直不阿，因替工人爭取權益而丟了工作，唯有遷到伊朗北部郊區養金魚維生。他以為生活從此平靜，怎料大財團覬覦其家園，為搶地威迫利誘無所不用其極。他漸漸發現，與他為敵的不只企業，還有政府、法庭，甚至鄰居……導演自2010年起被伊朗政府下禁拍令，今次不惜犯禁以戲喻己，成果震撼人心，一舉勇奪康城影展「一種關注」單元大獎。
個人認為，套戲嘅中文戲名唔係好掂。原本嘅波斯語戲名，我冇理解錯就係個地名，故事發生嘅地方，咁當然冇得直譯。但英文戲名A Man of Integrity 就好，開宗明義，首尾呼應。中文名呢？《就算世界與我為敵》唔知點嚟，聽講係歌詞定乜，但，個中文戲名好似幾正能量，不屈不撓，而套戲唔係嗰回事。可能譯《當世界與我為敵》會好啲。
咬文嚼字完，講個母題。導演亦好成功，差不多所有討論呢套戲嘅，都會提到呢個母題： 「在伊朗呢，唔係你壓迫人，就係人哋壓迫你，冇第三個選擇的」（亦所以我貼屈原同葛柏）。
同樣地，唔怕劇透，話埋你知，我自己對號入座嘅母題就係：人總會變成自己起初最討厭嘅人。（所以我貼緬甸屠龍嘅傳說）
故事其實唔複雜，唔使點 「用腦」畢竟唔係推理劇。但起初用咗少少嘅倒叙法，你睇官方簡介就知主角在德黑蘭原本係知識份子衣食無憂，但搞抗爭被迫去到伊朗北部，歸園田居做陶淵明咁滯。咪講笑，真係養金魚咋！幸好仲有賢妻（錢冇咗可以搵返）同埋生性嘅仔，都算小確幸。戲入面呢？一開始就係在北部，去到好後先話你知點解主人翁搞到咁。我覺得呢個手法係好的。
然後講過啦。有人話 「你討厭政治，但政治會找上門」，不完全正確，亦唔係導演真係想講嘅嘢。我諗起嘅係；
在金融界工作的時日愈長，愈明白這世界能令你生活更好的人很少，大部份人只會為你生活添加麻煩，甚至當你只想自求多福，做好本份時，都會有人惟恐天下不亂，故意走過來為你增添煩惱。
導演想講嘅，唔只係伊朗強權，而係小人物，唔止係政權，係每一個人，鄰居朋友，都同你為敵。當然亦都幾肯定導演避重就輕，話晒呢套戲都係拎咗官方批文先拍（所以有出晒啲工作人員名單，以前呀伊朗的士司機啲片冇的，只出自己名）。你班友在香港梗係把口勇武，但人哋在極權之下拍戲，一定要小心。踩過界呢，自己收監事少，以後冇得拍戲話畀人聽事大。所以好多導演都係刷邊球：千錯萬錯呢，都係地方政府錯，制度錯。拿，千萬唔好質疑中央。你見伊朗片係咁，大陸片《嘉年華》，《我不是藥神》都係咁，總之係地方政府／前朝嘅錯。你可以話滑頭或者跪低，但，定你寧願冇得拍？《戰雲密報》（The Post）話頭， The only way to assert the right to publish is to publish
主角好簡單，就係死牛一面頸，有原則，不同流合污，A Man of Integrity。一開始講佢在北部養金魚嘛，好啦，借咗銀行錢要還，但冇錢。正路嘅做法係賄賂銀行職員，自然有人搞掂，在香港嘅你聽落好離譜，但在伊朗明顥係常規。最後主角都係唔肯，寧願賣車照畀罰息，人人都覺得佢傻仔。
但，你堅持，可以堅持得幾耐？財團睇中佢養金魚嘅地，想買（邊度都有地產霸權！伊朗北部爛地都係！）。你唔肯嘛？就有人截停啲水。主角就去同人爭執打交，照計只係好少事，但又越搞越大。因為佢唔肯行賄，要訓臭格。對面仲買通埋法醫做假報告，法官就只能「公事公辦」。搞到主角一身蟻。然後呀主角誓不低頭，堅持大衞對哥利亞，高風亮節，頂天立地。但現實就話你知A Man of Integrity，在伊朗有乜後果。真正嘅你反抗越大，成個建制（由政府到鄰居，所有人）就反彈更大。最後？魚都畀人毒死晒，錢又冇得還。再玩大啲？直頭屋都畀人燒埋。家破（但人無亡，導演仲係唔玩呢啲煽情嘢）
仲未夠絶？絶在就係主角肯妥協啦，好啦我賣啦我賣啦—丫，「而家我老闆又唔想要啦喎」。「不過我可以私下幫你半價要嘅」。令人拍案叫絶。
但重點並唔係主角點慘，而係成個社會點樣迫到你扭曲自己。主角老婆其實真係善解人意，百般容忍，成日叫主角唔好咁有原則，仲有份不錯嘅工，在學校做校長，仲成日可以走出去營救主角。但佢老婆正係示範咗咩係「受害者一樣係加害者」。對住異教徒嘅鄰居，佢一樣踢人出校，「我都係跟規矩做嘢」。仲有，佢一樣濫權，一樣搞小朋友，同仇家個女講返去同你爸爸講叫佢唔好玩嘢，否則就我搞你—最後當然唔夠人鬥。
（嚴重劇透）
最後係點？由於套戲真係唔係《就算世界與我為敵》，而係A Man of Integrity。所以結局當然唔係圍埋燒嘢食公義彰顯（睇少啲荷里活片啦），導演唔係要你食兩個鐘爆谷然後好似拎到啲哲理返屋企咁（睇少啲超級英雄片啦）。結果當然係，就連我哋呢位正直不柯嘅主角，A Man of Integrity，一樣都係被迫入邪道。體現咗「在伊朗呢，唔係你搞人就係人搞你，冇第三樣嘢」呢個母題。
唔止，主角憤怒爆煲後，就真係抗爭無底線。你見人哋都係搞佢啲魚搞佢間屋，冇話傷及佢家人之類。佢就威咯，買通獄卒，隊冧埋個仇人。呢度嘅處理同《雷洛傳》有異曲同工之妙，講一個原本正直嘅人，點樣同流合污，係貪，我就貪夠五億！
更諷刺嘅係，個結局十分之咁《黑社會之以和為貴》。主角做低咗仇家，梗係去埋喪禮洗脫嫌疑啦。點知一早有人知佢做緊乜，但唔緊要，「以後你就接替佢個位啦」。至此，呢個A Man of Integrity，完全成為佢以前最鄙視嘅人。
好多影評都提到戲入面嘅象徵。係有幾幕都幾震憾嘅，佢先拍周圍，人嘅反應，聲音，然後先畀個大圖你睇。金魚死晒係咁。燒屋都係咁。仲有好有意象嘅西瓜釀酒。
伊朗當然禁酒，但主角就私釀。留意電影中用咗唔少時間特寫佢扭榨西瓜汁，正如有影評指出，呀主角啲西瓜沖越嚟越濃，扭都扭得越嚟越大力，呢個代表佢嘅憤怒越嚟越勁。
最具象徵意義當然係最後一幕：話說主角但凡唔開心，就自己拎個背包，袋住啲西瓜酒，去一個自己先知嘅山洞，入面浸溫泉飲西酒。留意，之前金魚畀人毒死晒佢冇喊，甚至間屋畀人燒埋佢都冇喊。唯獨係最後佢正式由「被壓迫者」成為「壓迫者」，佢就大喊一場了—因為佢卒之守唔住自己咁多年嘅信念，卒之成為自己討厭嘅人。
