永華結業:仲玩竹昇麵?玩竹昇妹好過啦

Facebook 專頁有更多無聊短文: https://www.facebook.com/ivanliresearch/

快講兩句。永華麵家執笠,咁你見都係嗰幾味例牌對白。地產霸權啦,逼死小店啦,米芝蓮死亡之吻啦(而更多人反應係「吓?原來呢間嘢係米芝蓮」,或更不屑嘅「吓?呢間咁嘅嘢都米芝蓮?」)

咁既然其他人行禮如儀,我當然都係行禮如儀。你估到了,個套路同上次寫一樂燒鵝差不多。唔止,我預告定,聽日寫美利堅京菜都係咁。

永華點解執笠或唔玩,人言人殊。有報導話同加租無關有報導就話係加租迫死佢。咁其實有時啲嘢,未必係單一死因。正如講人自殺,往往唔係一個原因。

鬧地產霸權永遠最簡單。但仲有一樣嘢,都幾肯定,冇人接手係一個原因。

舊公司樓下,只此一家絶無分店

我唔敢話對永華好有感情,但全盛時期應該一年總會食得十次八次,因為佢就在我舊公司樓下。

你睇返啲人嘅討論,包括我樓上貼嘅新聞,都仲係有好多人話「好貴」。

呀大佬,唔係我富貴,但一風堂啲垃圾拉麵(利申:成日食。但根本即使在福岡的一風堂都係唔好食的),都成舊水啦!我唔明啲人點解覺得四十幾蚊雲吞麵係好貴,而舊幾水嘅拉都就抵食要排隊。

當然作為一個自由主義右傾市場膠,好簡單,就係包裝。日本就係有辦法令你畀舊幾水去食(其實在日本唔使舊幾水,後話)。連帶美心帶一風堂嚟都可以受惠。拿,一風堂就交得起商場租啦。金鐘廊呀大佬,就我舊公司隔離。(咁我可以好多間舊公司嘅)

拿,一個月內,三張唔同嘅相。次次我都食埋紅豆沙,十分支持小店

崇日撚就會講,喂,唔好睇少人拉麵呀,人地點點點點匠人精神,背後又乜乜祖業,淆個湯又點點點,仲有冰水都點點點。我全部都知。我都一年去幾次日本,都知道日本人點認真 —但,美心一風堂咋喎!唔撚係同我講匠人精神話下?

而掉轉頭,衰嘅舖頭唔好講(一般我都唔太阻人發達)。但,永華,點解都夠有匠人精神。你估挫竹昇麵好好玩好簡單好過癮?我好肯定竹昇妹好玩啲。

講到尾,套路嚟啦喎,例牌句式啦。香港人,唔止唔尊重自己份工(大家作為消費者應該好明白)(我知低人工,但,你去日本睇吓?人地做七仔嘅幾皮嘢人工咩?)。香港人,亦都冇尊重過人哋份工,亦都唔尊重人哋嘅技藝。外國嘅還好,本土嘅?我呸,就係執咗笠個個話好可惜

請循其本,除咗上面講嘅四十幾蚊碗雲吞麵係「好貴」外,永華嘅紅豆沙先係重災區。我次次都食,但紅豆沙三十幾蚊碗,又係有人話好貴。而我肯定呢啲友平時食中村藤吉食靜岡蜜瓜唔會話貴的。唏,日本嘢嘛,匠人精神嘛。香港嗰啲就梗係唔係匠人。

「咪又係一碗紅豆沙」「我自己都識煮啦」「點解冇紅豆嘅?」

我唔止一次聽過有人話「咪又係一碗紅豆沙」(你去日本講一次丫),甚至有人話「我自己都識煮啦」「點解冇紅豆嘅?」。See? 幾時都係,睇人哋做好易的。「我都唔明美斯做乜值咁高人工,咪又係跑得快啲篤個波入網,係叻,但有幾難?」

而另一樣嘢,當然係根本冇人想接手。但呢個好難怪,人性啫。一樂篇文我都講過啦。 你有1億你朝朝起身掃麥芽糖上鵝髀?掃大髀好過啦。

成日講保育小店,有冇問過人哋係咪真係想?人哋創辦人本身就冇讀過書唔做得啲乜要捱,有冇諗過人哋係咪想自己後人都咁?我係下一代嘅,我仲神咁早返嚟 un竹昇麵,然後比你啲文青食家上網鬧「好貴」「我自己都識煮啦」?我un竹昇妹好過啦。

所以好簡單,呢個城市本應如此,個宿命就係咁。亦係應得的,亦係自找的。

係喎,下一篇講「美利堅京菜」,你都會見到我用呢個套路。但就係每次又有啲唔同嘛。陶傑都係一句「小農DNA」寫足咁多年。最緊要讀者睇得過癮。而講到尾,你估真係「咪又係寫幾隻字呃下 like有幾難?我都識啦」咩

東方呢張相實在太正,不能不偷!

Facebook 專頁有更多無聊短文: https://www.facebook.com/ivanliresearch/