＜101次求職＞ 幻想中的Sure Lam成為事實
Facebook 專頁有更多短文: https://www.facebook.com/ivanliresearch/
話說我在開工不足 做中年Slash嘅同時，都仲未放棄過金融行業，都仲有搵下工嘅。
但今次呢間公司真係極品。先係個嚟約見面嘅小妹妹，堅持我係楊利星先生（請睇本頁個名），但明明我份CV係有中文名嘅。算。呢樣嘢亦唔止出現過一次。另外小妹妹將Analyst讀成Analyse，都唔緊要，鴨脷洲口音啫，唔好歧視。明就得啦。
然後個安排都係比較混亂，我更加驚嘅係條女9分鐘後打咗6次畀我（如圖）。為嘅就係因為我未覆佢email。問題係佢個email係五點半send畀我嘅。唔使咁心急下話？可能趕收工啦。最後好似係佢定另一同事夜晚八點幾再打比我。
咁做乜要覆email？唔單止確認一次我收到見面地點時間（好貴租嘅寫字樓喔 — 否則我真係唔再同佢癲）。仲係因為，佢叫我早三十分鐘去。原因？做筆試
做 — 筆 — 試？
有機會再講，但多年前我已經唔玩呢味嘢。亦都其實近幾份工都係人地介紹或人地搵上門。咁當然我都有主動搵，但事實證明識人好過識字。
回想金融海嘯前，最美好嘅日子，工搵我唔係我搵工嘛。有次某人直接搵我（即係摩連奴打畀奧巴美揚咁啦，是但）。上到去個HR叫我填form。我直頭話唔填，企圖轉身走。最後個HR姐姐幫我填埋。何等臭串何等威風呀。
但，金融海嘯前嘛。而家就又話支爆又話貿易戰樓又跌股又跌。
所以呢，筆試呀？原本我想學伊巴謙莫域咁答佢Zlatan doesn’t do auditions。但而家Zlatan 冇工開嘛，唯有將就下。筆試咪筆試。最多見唔對路就走人
結果就真係好唔對路！
好啦，當日我上到去嗰楝舊幾水一尺租嘅寫字樓（中環大把寫字樓過一舊水啦，灣仔都有）。填form啦。都話金融海嘯後咯。況且，我唔係好敢用普通話講「我唔填你填撚飽佢」。即係當年金融海嘯前我都冇用廣東話講啦
然後張form 第一格就係咁嘅嘢。And I was like …….WTF
你係我你會點？我做咗多數香港人會做嘅嘢 — 影相，然後send畀信得過嘅朋友。朋友笑到反肚。我梗係知，因為我當場都忍唔到笑。
點解咁好笑？原本Surname打成Sure name都唔係咁好笑。看官有所不知。呢個係我個人FB網友都知嘅故事。簡述如下:
話說舊公司，有條Ｏ靚，十級極品。心地好性格好，盡責勤力，但工作能力奇低，中英文亦都好恐怖（當然，唔係我請的）。此人叫做林生。但佢明明唔係姓林？咁點解叫林生？
有次佢初加入，我點佢去Bloomberg上堂（係呀，有堂上的，有嘢食，以前有三文治添，而家得啲三角朱古力）。佢上完返嚟，我好似老豆見仔放學咁，問佢有乜得著咁。佢話原來要填資料（接待會要你登記影相），但佢填錯。
我問佢答錯乜，佢話填錯個Sure Lam。我諗咗陣，乜春Sure Lam？
原來係：Surname
即係我唔係毛孟靜唔係語文塔利班，name lame不分，大把香港人係咁，我絶對OK。但可以Surname變成Sure Lam ，真係奇過Kinder出奇蛋。自此，我就叫佢做林生。
估唔到今日，呢個咁嘅Sure Lam 重出江湖!!
幾個朋友收到張相，都叫我起身走啦，呢啲公司點做呀。但我睇在嗰百幾蚊尺租份上，繼續等面試者出現。
幸好，出現嘅唔係林先生。係一個正常到唔正常嘅香港人，仲同我幾好傾添。
所以真係唔好judge a book by its cover．正如睇女仔唔好只係睇樣 — 身材都好重要的。
又其實，由於同面試者真係幾好傾（傾到我會講粗口喎。係喎，我見工會講粗口的）。我其實幾乎想問佢，「其實HR請唔請人」？
後記：真係大檸樂。呢個《101次求職》，其實係我在英國某大學（陶傑嗰間）畢業返嚟後，想寫嘅一本書。首先當年係911之後，但主要呢，都係本人當年實在極之柒碌，完全係出現啲唔記得自己見乜位呀，寫錯公司名呀之類。搵好耐先搵到工十分合理，請我嗰個先有眼無珠。
但又因為我份CV以畢業生嚟講都算幾省鏡。高考高材生喎，香港最高學府喎（地理上），陶傑喎。所以又成日都有工見。而當年我真係唔止見過100次工。最後呢個《101次求職》，同傳說中嘅《楊枝甘露的誔生》，都係活在我腦中，有題目但未寫過一隻字嘅書。
蔡智恒（對，痞子蔡，網絡老嘢應聽過《第一次的親密接觸》）有個習慣，就係每本小說寫第一隻字之前，都起咗個題先，唔起好題佢唔開始寫。我都係，所以我一隻字都冇寫。
不過掉轉頭，我曾經諗過一大堆專欄名，最後又居然都有用到。例如在商台年代你見到嘅《仙力之城》，01嘅《袋鼠法庭》，甚至而家嘅《華麗后台》都係。「一個人的戰爭」畀我拎咗嚟做twitter名。仲有《絶色哥基》《日理萬姬》同埋《元華盡洗》可以用。好似元素週期表咁，你都未發現隻元素，已經預測定個名同屬性。
總之，今次真係惡有惡報，若然未報時辰未到。以為起咗嘅題唔使用，居然我而家四十歲人又可以寫《101次求職》。人生真係充滿荒謬。
又，如果當日在舊幾水尺寫字樓打開門in我嘅係林生，我一定會訓在地下慘叫。好似見到隻巴斯光年識講嘢咁
Facebook 專頁有更多短文: https://www.facebook.com/ivanliresearch/
