CFA難考,咁做乜仲要考?

Facebook 專頁有更多短文: https://www.facebook.com/ivanliresearch

上篇講咗,CFA都真係幾難考但唔會難到好似要你去打NBA或變美斯C朗咁。有返適當嘅先天才能,再加適當嘅後天努力,都其實,唔難(其實同「呢個世界上冇懷才不遇」一樣差不多廢,你唔掂嘅,咪話你唔夠才華或未夠努力咯,唔會錯的)。正係因為夠難,先有意思嘛。

但講到尾,考嚟做乜?點解叫你考?

首先講,係咪會加人工?我好相信,係唔會嘅。至少我做過嘅公司全部都唔會。你間公司會嘅,你好彩。但肯定唔係好似你CPA(仲係呀可?)甚至考教育文憑咁,考到即時有得加,係冇呢回事的。甚至可能係即時減人工,負現金流—因為總有啲仆街叫你請食飯。

咁,係咪會升職易啲?又真係,係唔會嘅。講過啦,我歷任老細,都冇一個係CFA,真係一個都冇,恭喜。

咁,係咪轉工會易啲?理論上,就應該係,實際上,就應該唔係好見到分別。反正,請你嗰個可能都唔係CFA(請睇上一段),而同你爭嗰個就應該都係CFA,咁你有乜著數?但你可以話,等於大學學位咁,人地冇你有,會唔會有丁屎咁多著數?好難話冇,但肯定唔係有學位 vs 冇學位咁大分別

咁做嘢會唔會用返入面嘅嘢?其實,就唔係冇嘅。不過你見CFA學嘅嘢咁多,由會計到衍生工具到股票到債券去到資產分配,點會用得晒?唯一用得晒嘅,就係教書嘅人(即係我,我教過 Finance Course的),同埋寫文鳩 up嘅人(都係我)。

會唔會型啲,易啲溝女?都可能會嘅。但在香港就唔會。千萬唔好煞有介事咁講「我係CFA」,首先,根據官方講法(拿,我熟書的),咁樣講係錯的,CFA不是一個noun,係一個adjective(係喎,當年考試考呢啲,幾撚無聊!)。你只能話「我係一個CFA 差他holder」。第二,即係,咪玩啦,一街都CFA。我同朋友(一樣係差他holder)成日講,香港地,炒栗子嘅都罕有過專業過CFA啦。而事實差他holder會幫襯炒栗子(同埋,雞,我指栗子炆雞),但炒栗子嘅(同埋,雞)唔會幫襯返叉他holder,除非炒栗子炒到上市。第三,第度都好啲,香港地真係唔識就嚇死識就笑死。反而呢,某啲地方,可能你拎出嚟都仲呃得下人。我舊公司畀台灣仔收購時,台灣老細見到我張卡片,都仲好似見到粉紅色乳頭咁,嘩,CFA喎。你咪理佢真心定扮嘢丫,但後來介紹本人都要講係CFA,即時覺得嗰年啲會費抵交。但,有冇加人工?都係冇嘅。舊文話咗你知啦,講乜都假,talk is cheap,睇佢科唔科水,就知你有幾重要。


好啦,講到咁雞,咁仲有乜用?其實都係有嘅。

會唔會易啲搵工?係真係會嘅。喂,「樓上先話唔會易啲轉工喎」。我地精準啲,行家轉工,就真係冇乜幫助架啦你做咗十年仲提住自己係CFA咩大佬,咪好似有人而家仲要講自己係學霸咁,證明你打後咁多年一事無成但新鮮人搵工嘅,應該就真係有幫助的。個情況好似你個大學學位咁,的確係張入場券,雖則你入行後幾年就冇用了

事實官方亦都當CFA好似一個學位咁,都係正確嘅。呢度我就要講金句:你要當佢係一消費,唔係一個投資。咁你就好過啲。大學學位一樣。大家明個分別啦可?消費,就等於你去學嘢去出火,有嘢入咗你度(或者你有嘢入咗人地度)你爽咗,埋單走人。投資呢,假設個過程係唔爽嘅,但將來會有回報。我認為CFA又好,大學學位又好,都主要係前者多過後者。至少你咁諗會好過啲。

點消費?好簡單。你學到嘢咯。弔詭地,呢個又搞到佢好似有啲投資價值。up乜?有三種。對於一個新鮮人(計埋做咗兩三年嘢嗰啲)嚟講,你有個CFA(或者考咗Level I or II),代表咗三樣嘢。

第一,就算CFA課程其實冇任何價值(我反對)都好,至少,證明咗你嘅誠意。呢點對非金融學位出身嘅人好重要。你話你想入行嘛,點證明你想?除咗腿張開之外(而家metoo冇呢支歌仔了),你去考個試係最好嘅證明,證明你付出金錢時間。金融圈嘅人,十個有九個都鳩up當秘笈,得把口講誠意冇用嘅。

第二,息奴寧。同第一有啲似。就當CFA堆嘢冇價值,但你考到好成績,某程度證明咗你嘅才能,我請呢條友應該會OK醒目,好過請個Level I肥六次嘅。大學學位亦有呢個作用。

第三,就真係講學到嘢。因為CFA真係難考,所以考到嘅,你點都有一定水平。我唔會驚請著個原來乜都唔識嘅騎呢友返嚟。掉轉頭,又係得罪講句,你係名大學(自己定義)就話啫,你係濕鳩大學(自己定)濕鳩科出嚟嘅,真係可以好甩皮甩骨架喎。我點信你真係掂?就係靠呢啲嘢。

至於日後有冇用,就睇你做化。如果你做散仔嘅,其實未必好有用。應該話,你只會係做嚟做去嗰啲嘢,你做sell side analyst(即係乜乜摩根大通調高港鐵目標價嗰啲),咪只會用嗰啲嘢。但如果你好彩升到做老細嘅,自然咪會接觸多啲嘢,用到多啲。

To sum up,個CFA,唔會幫到你第時十年廿年做嘅嘢(世界不停進步架,學無止境,金融投資更加係永遠有新嘢,亦係我從來唔厭倦嘅原因),未必幫到你升職加人工,未必幫到你溝女。但,至少對於新鮮人,佢會幫你有機會易啲搵到工—特別係非金融學位出身嘅,再特別係如果你間大學係比較濕鳩嘅。就好重要啦。係架,冇話要讀金融學位先可以做投行,你係耶魯法律系高材生,我保證你唔識金融都有得做。但你唔係丫嘛,大佬。望下閣下間世界排名唔好提大學,加埋閣下嘅二等乙級榮譽(正係我),就要呢啲東西啦。


就梗係美金啦老細

反而最後想補多句:講咗咁多,入咗行,就夠啦。咁之後仲有冇必要續會?係呀,舊文都有講,要年年續會架嘛!三千幾銀港紙一年架!我地嗰時研究過(證明啲分析員幾咁得閒),由你第一年入會開始計,每年續會嘅錢拎去買盈富基金,睇下而家值幾錢。我由2008年開始交,而家十一年,你可以計下。都真係夠去好多次日本

(剛剛計咗,2008年,每年400美金,當12月31號買盈富基金,總付出就4400美金,34320港紙。今日應該值44261。即係十一年唔交會費,慳返三皮幾成本,仲有一皮嘢投資收益)

事實又係,估下香港而家有幾多個CFA Charterholder?懶去搵,但應該係8000左右。因為2016年就7000個。多唔多?見仁見智,但肯定多過炒栗子。不過呢七八千個唔係重點,而係,比我想像中少。因為,我拎嘅2008年,當時都好似係5000個左右。應該問嘅反而係,十年增長得咁少?

你計下條數就知,肯定係有唔少人,拎完之後,決定唔再交會費續牌的。因為對於啲打滾多年嘅人,就真係冇人在乎佢係咪CFA。你會唔會問陸東係咪CFA?陶冬係咪CFA?畢菲特係咪CFA?

咁但,自由社會咪,唔鍾意,咪撚續咯。本人既然一路都年年續,就總有原因。除咗威(都威得幾貴)之外,亦可能因為本人冇料,所要先要搵呢啲嘢壯膽。

況且,會方提供嘅東西,你問我呢,就真係唔多,但至少過去兩年(今年就冇)佢地搞咩Research Challenge 比賽,我都做咗Mentor.即係點?即係帶班大學生,佢地寫報告,閣下畀啲意見,做廢老指點江山咁。

咁我有乜so?你話回饋社會本人就不敢當,自己都未搞得掂。為咩業界發腥更加係搞笑。其實最重要就係,認識返而家啲學生,了解下年輕人諗乜嘛,好做個脫節廢老。又即係參加得嗰啲,都應該係冇咁甩皮甩骨嘅學生。例如早兩年認識咗班恒商(而家變成恒大)學生,而家都仲keep住聯絡 ,偶然食下飯仲好有火花。呢,上次篇 「靠公司自動自覺加你人工,就含得撚」,都係嗰次食飯嘅精華。仲講咗好多嘢。大家都好後悔冇拍片留底,唔知做我爆晒seed.

所以,去考個CFA吧。特別係濕鳩大學濕鳩科目嗰啲。

Facebook 專頁有更多短文: https://www.facebook.com/ivanliresearch