在公司上唔到位，點算？外加感人小故事數則
Facebook 專頁有更多短文: https://www.facebook.com/ivanliresearch/
金融時報呢篇（篇文在樓上，要log in）．不錯，雖然都係職場雞湯，但人哋鬼佬就係寫得比較好（咁都有啲唔好嘅，唔好嘅我咪唔貼，幫你揀埋，幾咁好）
先講自己經驗，其實都係算失敗經驗。首先我冇做咩大公司MT（唔知係乜，大學時掛住上網睇波寫文溝女睇書，好爽的，到知係乜時人哋已返緊工），好多人都知我最初係教書嘅，然後碌下碌下入咗金融界。遇過幾個好老細，就後話。
即係如果係做MT嗰類精英（唔係我呢啲second撈華嘅），分分鐘有人舖埋條路畀你（其實仲有冇呢支歌仔唱？），亦照計叻過我，唔使睇呢啲文。
但一般嚟講，我覺得年輕人，三十歲前，轉多幾份工，轉行都冇乜所謂。三十歲前應該係唔知自己想點的，至少我係啦。況且亦都比較易同人解釋，無論係同老母定同條女，定同HR解釋．況且，最重要係人工低，機會成本細。本人教書時，一萬九千蚊人工。到我轉做銀行，萬二蚊。你計下減幾多％。但我都仲做得到。因為銀碼唔係話太大（都，好撚大了，實不相滿我第一年做銀行就搞到借Ｐ窿）。但你搵緊五皮嘢叫你轉行減三份一人工？就梗係減你老母啦。
三十歲後又點？「就習慣了」。講笑的，三十歲後應該揀定一個方向，就算唔係一間公司，都應該知道自己想點。點解係三十歲？冇架，貪齊頭。現實啲諗，三十歲嘅，應該點都做咗六七年嘢。一路做同一間公司固然好，唔係嘅，應該都轉過工，甚至轉過行，有足夠嘅時間畀你去試去諗。三十歲仲話人唔知自己想點，人哋會白你眼（雖然，係會發生嘅）。同埋，同一原因，你唔好彩遇著仆街公司廢柴老細嘅，都應該轉過工（冇嘅，就諗下你個人有乜問題可以容忍七年）。咁轉得幾次工，份份工都廢柴老細仆街公司賤格同事嘅，多數都係你自己問題。
講遠咗，三十歲後，理應搵個山頭坐，特別係做企業嘅。好多人就開始玩呢個爬樓梯嘅遊戲，畢竟做企業都係想升職加人工，更高嘅位，更大嘅權力。唔係為呢啲嘅，應該一早做NGO，去咗海地食非洲雞（OK ，海地唔係在非洲的）
我在舊舊舊（唔使數係咪真係對上第三間）公司，做咗八年，當然係玩呢個遊戲。最後係算失敗嘅。我話失敗就失敗啦下。畀人炒仲唔失敗？我又唔係Steve Jobs，況且冇人叫我返去。之後再轉咗一兩次工咁，舊年去到而家公司，其實冇得玩架啦。唔係話論資排輩，但，人哋個個玩咗十幾廿年，你連邊度排隊叮飯都未知。
咁，位就有限嘅，想要嘅人就實多過位，基本經濟定律（位多過人嘅，畀你都唔好去）。盃就得一個，睇少啲咩波事春秋又冰島精神又巴拿馬精神嘅飛機文，你好有熱誠？哦。上得呢啲位嘅邊個冇熱誠？你好叻？上得呢啲位嘅邊個唔叻？
咁總之，有啲人就係爭咁啲嘢，係上唔到嘅（爭乜？我點知。知就唔係在呢度寫文啦）。神射手得一個，世界盃冠軍得一個。衰咗嗰啲點算？望下自己幾老（美斯？），又望下新阿頭幾老，條友擺明在呢度老樹盤根做到死架啦。今次含得撚了（對唔住，呢篇比較粗俗，但你明的）。而係唔會有人理你嘅。等於美斯射失球十二碼，就已經冇人理佢上屆勇奪，嗯，亞軍。
臨門一腳玩完嘅，以下係五個建議。鬼佬的，唔係我畀
１．問下自己到底其實你有幾想要 — 好多人都想呢樣，想嗰樣，但得個想字冇用。往往係好大犧牲。細路生日派對都冇得去。有個故事話有日成龍忽然父愛爆棚，去祖名間小學接佢放學，等極都冇人。打畀祖名，祖名話「仆街，我升咗中學啦」。有冇講仆街唔係重點，成龍係咪仆街老豆都唔係重點。重點係，你係上咗位嘅，就唔會有時間好似我咁寫文（同埋好似你咁睇文）。點解人哋做到你做唔到？可能因為你冇人哋咁渴望。冇得講的。講個個都好想要，但你可以付出幾多？你係尊尼亞講「work嚟把撚」，就大把同溫層嘅同你圍爐，上到高位嘅，講嚟就真係把撚。邊撚度有「work嚟把撚」。有一期我日日六點幾返到中環（對，五點幾起身），發現係已經好Ｑ多人的。有錢嘅有高學歷嘅有叻仔乜都有。人哋日日付出多你咁多，你work smart就得？即係你係天才球員唔使練波都勁過Ｃ朗？睇少啲咩「有能力的人絕不加班」啦
補一句，其實有啲人覺得，呢種想法，好易會成為葡萄。明明自己唔掂就話自己其實唔稀罕。請睇下一點。
２．接受，其實好可能，就係你未夠班。是真的。上到呢啲中高層嘅位最難接受就係自己唔夠班。喂我試過乜乜又點點，我知，呢啲同HR鳩吹嘅故事我都有大把。但行家一出手便知有沒有，你拍埋去真勁人度，就會知自己真係唔夠人勁。你冇試過？咁恭喜你，一係你就係個勁人，一係你身邊啲朋友都係廢柴。你估下邊個機會高啲。我諗起細個打波朋友講，學校總有幾個籃球男神，萬千少女嘅偶像，在學校無敵 — 出去打學界咪畀人數咯。你好勁？But don’t forget that there are many guys like you all over the world! . 你好勁？邊個唔係好勁？好勁同好撚勁之間嘅距離，遠過李嘉欣咁嘅樣同李嘉誠咁嘅樣嘅距離
好多人會以為，因為我間大學唔出名，因為管理層唔識貨，因為我唔埋堆，因為我係女人，因為佢同大老細上床。其實同你三十歲前遇人不淑一樣，一次半次，可能係你唔好彩。幾次，大老細都同第個上床唔係同你，即係你唔夠班咯。明冇？正如見親工都唔掂，即係你overpaid．
３．呢個我鍾意，鬥長命。黃興桂嘅名句，It’s not over until it’s over。條廢柴升咗上去，肯定在呢度做過世了。但，你點知呢？可能佢聽日死撚咗呢？可能有更大嘅傻仔請佢佢去間更大嘅公司呢？可能佢生花柳呢？可能佢搞大大老細老婆畀人炒呢？
我鍾意個故事，個死囚同國王求請，話自己有特異功能。國王心情好，問，你有乜特異功能？死囚話我識教隻馬寫沽空報告，畀一年我。國王話，好呀，就睇你點。人人都笑死囚低Ｑ能，一年後咪又係死。但死囚話：你點知呢？可能一年後國王死咗呢？可能一年後隻馬死咗呢？可能一年後我死咗呢？可能一年後佢亡國呢？或者，可能一年後隻馬真係識寫沽空報告呢？睇日本故事都知，德川家康冇嘢叻，但等得，鬥長命。馬哈蒂爾都可以出返嚟玩。一日未死一日唔知邊個笑到最後（所以，記得保持身體健康）
4．咁如果國王又冇死隻馬又冇死自己又冇死咁點呀？咁，就仆街咯。咪做第樣嘢咯。上到呢啲位然後又等咗咁耐嘅，照計唔使話Benz for the mouth為口奔馳。係，我知，幾十萬人工都可以唔夠洗，羅兆煇都破產啦。但be realistic，玩到呢啲遊戲嘅，真係唔係憂柴憂米，係餵唔飽自己個大過馬撚嘅Ego啫．（按：馬撚，一般係用「串過馬撚」。「大過馬撚」呢個用法係我發明嘅，在舊公司講是非時，我話某同事個Ego大過馬撚，另一同事話「我冇見過」。我話：你指冇見過佢Ego定冇見過馬撚）．等唔到嘅，轉工咯，做KOL咯，去多幾次日本咯。唔發現好多財金界人士出嚟咩整蛋糕開餐廳咩？
5．最後，好老土一句，工作唔係你生命全部嘛。正常嚟講，你仲有屋企人，有愛人，有朋友，有你嘅興趣。仲應該有唔少錢。大把嘢可以做啦。當然有人覺得呢啲只係loser嘅藉口。但又引返舊文，係咪真係搵好多錢就開心？係嘅，如果你人工係一百萬以下。但去到幾百幾千萬嘅，其實只係養你個ego啫。宮崎芒果八舊水一個，咁係咪好食過普通芒果Ｎ倍？咁梗係唔係的（對，我又已經進化到唔知普通芒果幾錢一個，幾好的了）
Facebook 專頁有更多短文: https://www.facebook.com/ivanliresearch/
