［技術文］台灣人均GDP高過日本韓國？是真的，但點解？
Facebook 專頁有更多無聊短文: https://www.facebook.com/ivanliresearch/
完全係平平無奇嘅新聞，但仍然令人覺得幾震憾。即使係我都有啲奇怪（可能讀者水平高過我會話一早知道）。
講嘅係，台灣人均GDP（國內生產總值），居然係高過日本韓國！在亞洲其實名列前矛，就只係輸畀澳門，新加坡，汶萊，同埋.......香港。你可以計埋卡塔爾，科威特，阿聯酋，沙地阿拉伯，巴林嘅，如果你當中東係亞洲。
成件事，依然係好Amazing．留意以上人均GDP高嗰啲國家/地區（唔好去大陸舉報我喎），基本上兩三種特質。
第一，產油國，中東嗰堆全部係。仲有汶萊都係。第二，金融中心，「城邦」，香港新加坡固然係。澳門都類似咁。第三，人少。除左新加坡澳門香港外，仲有一堆不在亞洲嘅盧森堡聖馬力諾之類。北歐幾國亦都類似。三個特色，有時相關有時又獨立，只得一個又有，三個都有亦有。得咗。
問題嚟啦喎，香港人好有錢係我寫文成日出現嘅主題，不用多講，新加坡亦差不多。中東同埋汶萊就得天獨厚石油識變銀紙 —好似，全部都同台灣好唔同喎！成個feel都唔同啦。慳家食四十蚊（梗係台幣啦）魯肉飯嘅台灣，同中東油國或者新加坡香港澳門，完全唔同種喎。勉強比，可能同上面未提嘅愛爾蘭比較似（特別係科技產業），但愛爾蘭五百萬人，台灣兩千五百萬人喎。仲要高過日本韓國？當真？
首先，做少少fact check，我冇去睇原本嘅報導，但望過下維基，數字唔會爭太遠。特別留意嘅係，一個國家／地區（唔好拉我呀）GDP有兩種計法。其中一種係nominal，名義。另一種係Purchasing Power Parity （PPP），購買力平價。至於人均，就冇乜好特別，就係除返個人口咯。
報導有講明，呢個人均GDP超越日韓，係指PPP，唔係Nominal．樓下呢個圖睇到，計Nominal，台灣就排在日本同韓國後面。
咁Nominal 同PPP有乜分別？簡單嚟講，係計及返物價。台灣物價平過其他地方（例如香港）咁多，同一舊錢，好洗啲，生活水平高啲，大約係咁概念。所以物價相對低，窮嘅地方，計PPP後嘅排名多數都升。例如台灣
下面兩個圖，係計PPP雖然都係維基，但一個係CIA嘅數，一個係IMF，同一結論，應該冇乜錯—計PPP，台灣人均GDP的確高過日本韓國。
先唔好講人均GDP高唔等於幸福，香港人有共鳴啦。問題係，至少你知道香港澳門都係有錢（成個社會啦，點分配下面講）。而台灣，你完全唔會覺富貴過日本韓國喎！（幸福度就可能OK）。銀碼上固然唔會係，即使計入較低物價你都唔覺得台灣人生活水平高過日韓。但明明PPP人均GDP就高過人哋喎
既然數字冇錯，咁就係我哋觀感有錯啦。數字好似唔準？咁點解唔準？好大約咁用人話講下，GDP係乜，又唔係乜。GDP，國內生產總值嘛。好多計法，個人層面可以係消費加儲蓄加稅，成個社會層面有人用消費＋投資（留意唔係炒股票嘅投資，多數係固定資產，起橋起路）＋凈出口（即係出口減入口）。鍾意嘅可以慢慢睇，但我估冇人睇
講完，都唔係好知係乜。而大家亦可能聽過好多關於GDP計法嘅不足之處。地下經濟冇計呀，無償工作（例如家庭主婦）冇計呀之類，仲有其實好難估得準。但最大問題：呢個會影響數字，但唔應該對排名好大影響：因為大家都係咁計架啦！除非你某國特多黑社會或特多主婦。多到可以影響排名？唔多信。台灣數字特別假？又唔似係
十分明顯地，GDP唔代表國民工資。工資透明度相對高，而台灣人工低大家都知，計埋物價都係。冇可能高過日本韓國。你可以理解GDP係成個國家嘅東西，工資佔多佔少可以由好多因素決定，例如有冇立法，科技水平等等。
GDP雖則有缺憾，但大體嚟講都係靠譜嘅（況且，你有冇好啲方法？）。事實上如果講成個國家經濟規模，爭議反而比較少。所以你見台灣媒體同網友，都係針住一樣嘢：評平均數冇意義。某國一人平均一粒睪丸，但基本上唔會搵到剛好一粒嘅人。
呢個矛頭就直指貧富不均，大家都話自己拉低咗，郭總郭台銘一個拉高晒。聽落好似係幾有道理的。等於你睇香港「人均」收入都好係嘢（例如霍建寧嗰份拉勻落嚟），但大家知道講收入我地多數講中位數嘛，免得畀呢啲打工皇帝扭曲咗。一個社會貧富不均越勁，「平均」就扭曲得越多，香港正係咁。不幸地，人均GDP從來都冇得計中位數，只有大數除人口嘅平均
潛台詞，一般人即係話：台灣整體係好富有，但集中在郭董郭台銘或呀邊個身上，貧富不均，資本家仆街，下刪一萬字。
聽落好似有啲道理，而且易入耳。但真係咁？
台灣當然貧富不均，在極端左膠（哈，出呢個詞了）眼中，根本全世界任何行資本主義嘅地方都不均架啦（而我話你知行社會或共產主義往往仲不均）。問題根本唔係有幾不均，而係，喂，同隔離比呢？
你話台灣貧富不均，郭董一個拉高晒啲人工，「平均」關我叉事，我理解。但，點解台灣貧富不均就可以解釋到？日本一樣貧富不均，韓國一樣係。每個國家都有呢個問題。除非你話我知，台灣比起日本韓國嚴重地更加不均。
但有冇咁嘅事？好似唔係好肯定。你見講嚟講去都係郭台銘一個咁大把，講唔講出台灣第二大富豪？日本夠有孫正義仲有一大堆財閥，韓國亦都係喎。
點量度貧富不均？其實呢個比起收入同GDP更加難去計，但無論如何都有人計。大家都會聽過堅尼系數Gini Coefficient，越高越不均．其實仲有其他計法，例如計R/P，最高收入嗰10%嘅收入，同最低嗰10%嘅收入爭幾多倍。一樣，個數越大，越不均，代表高收入搵嘅係低收入嘅好多好多倍
台灣只得兩個數，好易睇。先睇右邊數過嚟第二個column，堅尼系數。首先想講，日本韓國台灣，都低過世界平均水平，即係比較平等！哈哈。但諗真啲不意外，呢個表上半板有中國，有美國，有印尼，有巴西，有墨西哥，同埋一堆非洲國家。全部都係人口又多，不均又嚴重。日本韓國台灣其實都係比「平均」更平均。而，台灣嘅堅尼系數仲低過日本同韓國咯，即係仲平等過日本韓國。
另外，睇埋右邊數過嚟第四個column，R/P。最高收入嗰10%嘅收入，同最低嗰10%嘅收入爭幾多倍。呢個台灣就高過日本韓國，但唔算極明顯。
結論，你話台灣貧富不均所以表面望落PPP人均GDP高，實際上悲慘世界？似乎說不過去。明明台灣唔見得比日本韓國不均好多喎。
咁到底點解？「其實我都唔知」。篇文最開頭已講，你見人均GDP高嘅地方，好少好似台灣咁情況的。
要我亂估，我估同一個相當技術嘅問題有關。就係GDP不同GNP。「又up乜呀？」。簡單嚟講，維基教嘅，GDP係屬地，GNP係屬人。在台灣入面生產嘅東西，就係計入台灣GDP，話知你間廠係日本定美國廠。相反，只要你間公司係美國公司，你個廠在鄭洲定長洲，都會計入美國GNP。應該係咁理解（對，其實我係唔識的）
用呢個個方向就大約估到解釋到，亦知道點解台灣咁「獨大」。因為大家都知台灣係代工大國，好可能有好多生產值係在台灣創造，但其實係外資公司嘅—咁而相當明顯地，呢堆生產值，唔係幾惠及到台灣咯。點解？唔知噃，請人唔夠？啲勞工質素低？或者抽稅太輕？就搵啲真係識嘅出嚟講
係架，都唔記得同你講，其實我從來都冇讀過經濟的。大學一年級「經濟101」都算嘅，拎A添 ，不過只係上咗幾堂。其實，真係唔識的。
咁到底有冇PPP人均GNP嘅數字？好似係有，但我一路都搵唔到比較可信又可比嘅資料。維基英文版就冇台灣 (GNP同GNI基本上同一樣嘢，唔解了），中文版有台灣，但年代久遠，同埋個數唔知邊度嚟，唔多信
但睇返台灣新聞報導，呢篇就講明計PPP人均GNP（即係GNI），韓國應該高過台灣。咁而日本明顯係高過韓國。
Bingo! 計PPP人均GNP（即係GNI），就真係台灣低過日本韓國的！
至於計GNP（即係GNI）定GDP準，計PPP定Nominal好，呢啲一百萬嘅問題，答案都係：睇情況，其實係度緊唔同嘅嘢。但在呢個情況，有理由相信你見到嘅台灣PPP人均GDP超過日韓，根本唔關貧富不均事，唔關郭台銘事—或者你可以話關佢事，但唔係因為不均—係因為台灣嘅GDP好大舊係外國廠代工，計入台灣的GNP，但背後舊錢唔係你的。
抱歉寫得比較長，但，睇標題就覺得「台灣有錢過日本韓國」固然係懶思考唔要得。不過出嚟講「人均數冇意義」「郭名銘拉高晒」嘅，都係五十步笑百步啫。
Facebook 專頁有更多無聊短文: https://www.facebook.com/ivanliresearch/
