有1億仲玩半邊燒鵝髀？

Facebook 專頁有更多無聊短文: https://www.facebook.com/ivanliresearch/

冇乜人特別關心嘅新聞 : 一樂燒鵝大埔店摺埋。標題黨當然又以為加租迫死小店，但其實人哋個舖自己嘅，標售1億。

Told ya。之前Facebook Page 講中環威記唔做咪講過咯，呢啲店唔死就梗係因應自己買舖。一樂大埔就自己，中環就唔係。

（的確目測七八成係大陸人，, 但唔係靠佢哋點交租? 旨意你啲百幾蚊寧願食一風堂嘅網友？）

一樂中環店我估唔頂到好耐，係頂都係靠大陸人。鵝髀飯百二蚊你班文青嗌晒救命，隔離一風堂豚王啲拉麵一舊水就好抵（利申：成日食）。更唔好講噢媽卡些又幾千米芝蓮法餐又幾千。旨意你班友就仆得街。同條女半邊燒鵝髀？食完法餐噢媽卡些上蘭桂坊酒店慢慢玩

（其實幾貴，建議你去我公司附近間「Mingle at the Eden」，有房，又平，仲有得時租。我點知？我趕死線咪會放工去訓陣）（絕無收取利益）

（原來冇影Mingle at the Eden，比張半夜四點的放工相你睇頂住先）

講返，一樂朱家做得最啱係兩件事。第一，1984年140萬買咗大埔間舖。其實2000年醫病賣過，1000萬。但第二件醒既事係沙士時1200萬買返！而家個舖值成億。

（所以真係唔好天真望沙士股災雷曼金融風暴，歷史話你知，呢啲大跌次次都係機會 — 有錢人既機會。每次都係財富再洗牌，富者更富）

然後情節熟口熟面啦。1億喎。要賣幾多碗瀨粉？玩半邊燒鵝髀玩到收經都得。你有1億你朝朝起身掃麥芽糖上鵝髀？掃大髀好過啦

後人，就梗係唔做啦，叫你Facebook啲文青去廚房做丫。然後個撚個上網屌一樂全部都係大陸人 — 但至少人地有幫襯

（有圖有真相，全部我自己相的。左上灣仔甘牌，右上元朗天鴻，右下鏞記，左下深井裕記）

（再利申：食過兩次一樂，完全唔覺好食。灣仔甘牌深井裕記元朗天鴻甚至隔離跌watt鏞記都好好多。當然我兩次都食唔到燒鵝髀，不能apple to apple geese to geese ）

（一樂的燒鵝飯，唔係例牌半隻全隻，冇得同上面比。不過最令我抓狂嘅係對面條友 — 居然可以拎兩隻唔同顏色嘅筷子，直叫強迫症嘅我發癲。係喎，「都係咁食之嘛」，你唔著鴛鴦襪出街? 「都係咁著之嘛！」）

Facebook 專頁有更多無聊短文: https://www.facebook.com/ivanliresearch/