蘋果和脫星：我希望大家多啲留意我演技，唔係睇我個胸
Facebook 專頁有更多無聊短文: https://www.facebook.com/ivanliresearch/
上篇文講過蘋果業績根本唔差，但股價依然急跌，我又話合理。咁點解？
固然，有時股票係無緣無故咁升同跌。但蘋果作為全世界最大嘅公司，萬億美金市值，唔係兩港紙市值嘅細價股，好難操控。產品又人人見到，數字又相當公開。當日市況亦唔係特別差，出完業績跌5%，應該唔係無緣無故或正常波動。你唔同意個理由，可以。但你話無緣無故？唔似。
咁咩回事？上文講過，業績唔差。iPhone銷量係低過預期，但只係少少，唔應該令股價咁郁。
但仲有一樣嘢未講。
又重覆金句，冇所謂好定差嘅業績，只有好過同差過預期。點解？因為股票永遠係炒預期，睇未來（其實所有資產都或多或少係）。唔好話三個月，三日後你拎住份舊業績已經冇意思，乜都消化晒。真係以為人人唔知你知？
咁業績，其實係「未知」，但唔係將來。第一份工鬼佬老細將Forecast 同 Estimate分得好清。業績，例如賣到幾多電話賺到幾多錢，係未知嘅嘢，但唔係將來。所以業績重要，但仲有嘢更重要。
就係展望同指引。
香港公司比較少做呢樣嘢，亦都因為法規不同。但美國公司（日本都好似係）好多時都會。
蘋果畀市場嘅指引係，下一季收入預890億至930億美金之間。咁就出事啦。因為市場估緊大約有930億。即係就算蘋果去到自己估嘅最樂觀上限，先僅僅達到市場預期。
咁或曰：你啲華爾街分析員亂咁估關人鬼事咩。係。但市場就係咁運作的。而佢哋得出呢啲估計，唔會係完全亂作，或多或少都同管理層溝通過。掉轉頭，蘋果知道未必做到市場估嘅呢條數，而家早早講出嚟，總好過下次做唔到先見家翁。而家一次過講咗好過。
另外，蘋果有提到點解個指引咁保守。主要係因為佢哋認為新興市場銷售會麻麻地，以及匯率損失。呢啲對成個市場嚟講都唔係好消息，因為全世界最大嘅企業都認為前景麻麻，亦見到強美元衝緊擊部份公司。
另一致命傷，就係蘋果宣佈，唔再公佈iPhone嘅銷量。呢個都係一大負面消息。股價唔跌就假。
作為上市公司蘋果當然要公佈各種財務數據，一年幾多收入賺幾多錢呢啲要公佈，同其他公司一樣。但好多其他資料就只係自願公佈，等分析員或者投資者有得睇，唔係法例一定要的。正如蘋果話齋，其他廠商都冇公佈。
之但係，你蘋果唔係 其他公司嘛！你一開頭就自願公佈。我唔會天真地認為蘋果有幾有良心，咁主要都係為投資者著想，我哋賣得好怕乜畀人知。正常都係咁丫，唔係必要嘅資料，公司畀得你睇嘅，梗係靚仔先畀。
正如蘋果都只係公佈iPhone iPad 同Mac機銷量。其他產品例如Apple Watch就唔公開 — 咁你可想而知並唔係太好賣。咁而家，蘋果明明之前一路公佈開iPhone銷量，而家忽然話唔公佈，難免畀人覺得係因為銷量唔靚仔。似乎都係。
公司當然大條道理解釋，最方便，你同我都諗到嘅理由就係：希望大家唔好聚焦落呢度，希望大家聚焦返去成盤數。呢種講法係好冇力嘅。等於啲女星夾晒胸條裙短無可短然後「希望大家多啲留意我演技」。你對波都有戲乎？你蘋果就係最初公佈呢啲數字嘛，唔想聚焦，最初做乜公佈？
明顯，即係脫星咁，而家唔想人睇，就收返埋，希望大家「聚焦返去我演技」。
咁冇話唔得嘅，法例冇強制蘋果要公佈，正如都冇強制女星要露肉。不過畀人噓就梗。在我分析員或評論員嘅角度，就當然唔鍾意呢種作風啦。公司係咪咁冇信心？你畀埋條數話埋人知賣幾多電話，人地就唔識睇返條大數只會鋤住你嘅銷量？
但掉返轉講，噓都係一時啫。與其下次出個iPhone銷售又要同你慢慢解釋，公司長痛不如短痛，連埋下調下季收入指引一齊講咯。引爆晒所有嘢，都只係跌7%啫。
最後，其實好多科技股呢排都「見光死」。業績差嘅固然，但有啲業績好嘅都照跌。原因好簡單，一個字，貴。我Facebook Page都有寫。貴就唔係話蘋果兩百蚊美金一股嗰種貴，係講市盈率
所以，我幾有信心蘋果唔會好似其他科技股咁大瀉。冇錯，公司增長係慢咗落嚟（今日先知？）。但市場投資者唔係今日先知。蘋果估值唔貴，講緊廿倍市盈率唔夠，投資一早預期咗佢增長慢。
就唔同有啲股票幾百甚至冇PE，業績一走樣就出事。甚至業績唔走樣都好，市場風險胃納一變就出事。市好錢多就話聽你講夢想啫，市差錢少，就梗係搵啲有派有有錢賺嘅股票啦，仲講夢想？（亦因為呢個原因籨來我都鍾意騰訊 多過 小米美團 等等）
Facebook 專頁有更多無聊短文: https://www.facebook.com/ivanliresearch/
