香港進入3P年代 : 12年第一次加P，只加八份一厘
Facebook 專頁有更多短文: https://www.facebook.com/ivanliresearch/
趕住上機，其實係瞓一粒鐘就上飛機，組織唔好或有錯見諒，頭盔帶足。況且有一定時間性，呢篇文過三日寫我估就冇人睇。但我而家唔寫就應該三四日後先得閒寫。
昨日今日嘅金融甚至頭版大新聞，當然係加息。原本美國加息唔會有乜人理，其實都加咗N次，但今次因為香港「跟加」，十二年第一次喎，特別多人講。得罪講句十二年前好多分析員記者甚至基金經理都未入行。
成日講香港加息加息，我都係要簡單講101先．加息，視乎你講乜息。香港行聯繫匯率，冇自己貨幣政策，外判咗畀美國。你唔會見到香港有班友開會坐低講加唔加息（美國就有，大陸都有）。寫親呢句就總有啲一知半解嘅整條link話我知，喂，金管局話加咗乜乜貼現利率喎，堅係煩。呢個東西有點難解，但總之，係唔關事的。你見以往N年美國聯儲局加息金管都跟加，咁又何來有人講 十二年第一次加呢？
好啦，另外兩種真係關事嘅息口，先講港元銀行同業拆息（HIBOR，H）。呢個十分簡單，銀行拆借嘅息口，每日不停變，一日都幾百口價咁變，同股價一樣，完全市場力量，就唔存在邊個銀行加咩息。正如你掛一千蚊一股去沽騰訊唔係叫做加價。
所以一般講，都係講最優惠利率，（Prime，P）。但呢舊東西十二年冇郁過，難免有人陌生啲。你見大家最關心嘅供樓，以前就係同P掛勾。咸豐年代有P加幾多幾多，近代（即係我做嘢開始）已經係P 減幾多幾多。聯儲局QE放水減息後，因為低息，銀行就開始推H按，同H掛勾，H加乜乜乜（冇見過有H減乜乜乜，有嘅話我知我轉去）。近十年做嘅按揭絶大多數都係呢種。但頭先講咗H基本上係市場力量，可以好大上落，銀行為免你驚，亦畀一個封頂位你。H加乜乜乜，但上限係P減點點。所以H按一樣受P影響。而同樣地，正如湯文亮提過，話冇跟加息嘅自欺欺人。根本唔使等加P，供樓嘅就已經畀多咗。其他貸款亦都係，唔少亦都係跟H的。使鬼等銀行出嚟講：好啦，我哋今日加息。
事實有供開樓嘅會知，今年較早前好多H按一早去到封頂位。亦即係話銀行其實「賺少咗」。同好多人以為嘅唔同，銀行幾時都可以加P減P，唔使等美國議息（事實美國亦都隨時可以加息，唔使定日子，非常時期非常有法嘛），亦唔使任何人批準，唔使任何理由。你樓下間茶餐廳加價邊使理由？但銀行唔係開善堂，點解明明賺少你都唔加P？原因亦等於間茶餐廳點解唔收你兩百蚊個茶餐咁—因為你可以幫襯第間。好多人以為銀行係合謀定價，好似油站咁，但其實種種證據話你知，唔係好係。
再講深啲就係大家睇報紙都有講嘅，香港銀行體系好多結餘，水浸，所以美國加幾次香港都冇加。大銀行有錢唔賺怕生意走，細銀行更加no say．呢個就係過去兩三年嘅事。
由於始終係聯匯，港美嘅息口總唔會太過背馳，爭在幾時跟上咁解。因為種種理由（主要係銀行體系結餘跌），今次美國加息大家都預香港銀行會卒之加P。結果亦都係。但比較有趣嘅係，匯豐恒生，居然帶頭只係加八份一厘，0.125。美國加四份一，0.25，香港就跟一半，呢個夠意外。
點解咁怪雞，問返匯豐先知。但由於歷史原因同埋規模，匯豐在銀行同業市場被稱為「阿爺」（正如瑞信係叫做金牌，呢啲就行家先知），一般行都只會照跟。加得八份一，明顯就好似唔多想。有分析話只係象徵式應酬下政府，我又覺得太陰謀論。政府幾時大權力到可以叫得郁匯控？我當你叫得郁佢，你叫唔郁中銀下話？中銀阿媽邊個先？阿媽個阿媽又邊個？所以冇錯有啲財金官員（都唔係全部）打晒開口牌，但相信好大程度都係銀行自己決定。
加八份一，明顯係有啲顧忌，唔多情願。亦都因為其實銀行體系仲係好多錢，甚至唔加P都仲得（所以亦難怪有人覺得係應酬出面啲壓力）。
咁，個題嘅3P又何來？（明顯好多人因為呢句嘢走入嚟）
是咁的，3P，就真係市場而家有3個P。每間銀行有自己嘅P，一直如此。咁有人會話間間油站都自己標價但咪又係合謀。Yes and No。冇錯，中午我先寫話匯豐恒生加八份一厘，中銀未出聲，唔通今次唔跟？叔叔又成最大贏家了（我嘅樓按正係中銀）．話口未完中銀都跟加0.125，有朋友就話都係加德仕，前後腳咁啫。
但，當真？梗係唔係啦。唔使供樓嘅都可能知，香港好長時間都有兩個P，中銀匯豐恒生一個，細P。其他銀行另一佪，大P ．大細P就爭0.25。咁點走出嚟？聰明嘅你大約估到，就係某一次（確實時間懶搵，但應係2004-2006之間，因為我應該做緊銀行有份見證），有人加，有人唔加（當年係加息週期）。當然係有存款基礎，存款成本低嘅大行「以本傷人」。
對，呢啲嘢唔係必然，唔係一開頭就咁。大細P之前，就真係一個P。唔止，再早少少時間，根本就係有利率協議。呢啲先係真正合謀嘛。後來取消咗呢樣嘢，咁銀行當然面對更多同業競爭，利潤受壓，咁點會咁順攤？當年就係利益交換，容許銀行做埋股票保險—對，銀行戶口買股票，亦唔係好長時間嘅事。
講遠咗少少，但既然最初單P，後來變大細P，咁何來合謀定價？今次仲勁，頭先話匯控一出其他人基本全部照跟，但總有例外。今次坡佬（對，變咗坡佬了）華僑永亨就加夠0.25．背後有乜盤算就唔評論，但客觀現象，就係導致市場而家有3個P。三大行匯豐恒生中銀嘅5.125，其他嘅5.375，同埋華僑永亨嘅5.5。暫時未見記者或地產經紀起名，但我估不外乎都係會叫細P中P大P，或者將麻鬼煩坡佬嗰一個叫做坡P，甚至鳩P （如蒙採用記得畀credits我）。
3P唔夠好玩？仲有4P可以玩。你睇部份報導其實話你知有4個P添，好玩過Cookies 4 play。不過其實係搶下眼球啫，做乜明明3個又變有4個？因為有個別行未宣佈啫。咁正路佢地都跟架啦。但其中一間未出聲嘅正係我舊東家星展，同華僑永亨又係坡佬呀下。咁如果星展係唔加，或者減（發夢冇咁早），或者加夠0.375之類，就真係可以4個P了．但我估唔會。戴安娜話齋，3個P都已經係a bit crowded，仲玩4個？
留意之前都有講，美國加咗好多次息，香港都冇跟。好多人都估有冇一個「追加」嘅風險，即係會唔會加要追返以前？甚至美國停埋香港都唔停？匯控嘅梁兆基講得好，留意返，其實美國減息時，香港咪又一樣冇跟足。所以跟唔跟足，睇你用邊個時段嚟睇啫。
最後少不免，都係大家最關心嘅，樓。但其實講嚟都係有啲嘥氣，覺得升嘅依然會覺得升，覺得跌嘅依然係覺得跌。我只試下搵啲其他角度，或啲客觀事實講下。
首先，幾肯定嘅係，息口對樓價嘅影響，唔係好大。固然雷曼爆煲後嘅QE印銀令到樓價升，亦不止香港。但，唔好歷史由我開始。之前呢？我都大大話話由美國開始加息見到佢減息而家又加返息，但幾個週期後—其實樓都係升的。明顯地有啲其他嘢更有決定性（好可能係：大陸人，另文討論）
第二，好友會覺得，我超，加八份一厘息我好鬼死春驚呀。一百萬供多六十蚊，一個月供多幾百—真係去次旅行燃油附加稅都唔止（對，同日嘅新聞）。淡友覺得，唏，溫水煮蛙啫，八份一厘你唔覺痛，下次呢？三次呢？四次呢？加夠兩厘就可能係一兩千，就唔係飲餐茶喎。
但又不過，其實有理由相信，真係溫水都好，啲水都唔會煮到太滾就熄爐。上面已分析咗銀行好似好不情願咁先去加八份一厘，所謂「追加」可能性亦唔大。
但更重要嘅係，美國其實仲會加幾多次息？當然難估，聯儲局自己都唔知，畢竟局勢隨時有變，冇可能今年估到幾年後嘅事。但在呢刻，best effort，睇返聯儲局嘅預測。2018年加4次，即係再加多1次。2019年加多3次。2020年加多一次，然後收皮，2021年唔加（上面個圖冇寫，但其他報導有）
咁計下數，由2015開始，1+1+3+4+3+1，總共13次加息。到呢一刻已經加咗8次啦喎，下半場中段都嚟緊，如果咁都只係溫水，咁段估啲水都唔會好熱。贈多句，我認為2020嗰次應該係唔會出現的，我估你問其他人多數都會覺得真實加息少過13次嘅機會，大過多過13次．
當然，捱得過之前8次，唔等於捱得過之後5次，壓倒駱駝都係最後一根稻草。正如我成日講你急屎忍到半個鐘但往住就在見到廁所嗰最後30秒最危險最易失守（特別如果入到去發現格格都有人，基本上你死硬）。但話香港今次先第一次加P，所以唔應該計8—5，唔係下半場中段，係1-4，戴志偉話齋比賽先啱啱開始，我就好有保留：之前咪講咗，供樓嘅唔係要等P先開始供多啲嘛。
最後，為免畀人覺得呀作者成篇文最後都冇立場（事實成日都冇，我亦覺得冇問題），簡單答你，短期睇跌，但唔會跌得多。原因又不多講，但留意嘅係其實未有咩加息之前你已經見到種種跡象樓價係回緊，好明顯的。原因又係好多，但我不認為真係同加息有關。你話係禍不單行，我覺得就只係巧合啫。
Facebook 專頁有更多短文: https://www.facebook.com/ivanliresearch/
