Image for post
Image for post

我喜歡歌手除咗徐懷鈺,仲有梁靜茹

唔講唔覺,梁靜茹對上一張專輯《愛久見人心》轉眼間已經係七年前嘅事。在這七年裡面,靜茹由單身到拍拖到結婚到做咗媽媽,普遍歌迷雖然未見佢有新作,但未有離棄佢,至少巡迴演唱會依然每場都高朋滿座;甚至為她的人生變化默默送上祝福。

七年之後,靜茹終於推出新專輯 《我好嗎?-太陽如常升起》。對歌迷嚟講簡直天大喜訊,我亦當然唔會錯過。上個月台灣同香港推出專輯CD預訂,我就夾埋幾個都鍾意靜茹嘅朋友「團購」,本來在5月16日正式發行,但佢所屬的環球唱片表示因為包裝處理要押後至5月21日 (數碼音樂下載仍然在5月16日),所以到今日隻碟仍然未到手。本來諗住「忍手」等 CD 到手先至欣賞,但實在太多好評 (包括網上同身邊朋友),終於日前忍唔住手從 iTunes 下載數碼檔案「頂住癮」先。

三首「派台歌」── 《微光》、《我好嗎》、《慢冷》,旋律同編曲可以話係有靜茹嘅影子,但靜茹嘅演繹方法同歌詞嘅題材就有所突破。靜茹今次嘅聲線運用有一種悠然自得嘅輕鬆嘅感覺,比以往作品更自然,已是一個突破。至於歌詞,雖然靜茹過去嘅作品都是情歌為主而題材已經是多元化,但單係呢三首「派台歌」嘅題材是在「講自己的故事,講自己的想法」,就是另一個突破,尤其是《慢冷》講述一個從來將情感收到好埋嘅人有所覺悟,發現一直承受著沉重嘅痛苦,渴望可以改變、將情感釋放出嚟,呢種題材真係好罕見。呢首歌唔單止證明梁靜茹有新突破,亦足見填詞嘅姚若龍嘅功力是何其厲害。

唔打算「劇透」詳細分析十首歌,但要講今次呢張專輯 十首歌,可以話係連貫地講故事,串成一個主題 ── 回望過去之後放下一切做返自己,原來先至係最自在最開心。

從漆黑中的螢火蟲的點點燐光的顧盼自憐到晨曦 微光 開始有個醒覺,然後問抱住過去的事會 我好嗎;繼而發覺自己在情感上的 慢冷 原來係一種缺失但唔知點放開,到發現執意於過去而未能放手的痛苦不如 如愛所願。即使 平行時空 從頭開始都未必得到想要嘅人或事,再相遇而 以你的名字呼喊我 應該淡然面對,因為知道I were not the right one of you 的 類情人,終於完全清醒過來。於是明白,不論心情、思緒如何 太陽如常升起,又知道自己是 子非魚 而不懂魚之樂,倒不如就做返真正的自己,做回 完整的我

由此可見,今次呢張專輯並唔係單純一張要嚟聽嘅 CD,係一張有完整鋪排、可以用心感受同體會嘅專輯。絕對係充滿誠意之作。

姑且當係賣廣告,未訂購的未下載的,真的不容錯過。如果未聽過梁靜茹嘅朋友,亦可以嘗試從呢張專輯入手。還是有 hesitation 的話,不妨就從《慢冷》嘅MV 開始,

Image for post
Image for post

我相信你聽過之後必定會同意梁靜茹絕非泛泛之輩嘅歌手。


Image for post
Image for post

堂堂 Skytrax World Airport Award,我竟然咁踩法?唔係呀嘛?

無錯,樟宜機場真係好靚,但去過就知,真係得個靚字。呢個機場根本膠到核爆。膠之所在除咗我响新加坡《聯合早報》鞭撻過連接市區嘅交通差到爆之外

仲有其他膠到我真心覺得嘔血嘅情況。或者先講返交通,有人話有地鐵......

無錯,但搭兩個站到 Tanah Merah 就會聽到 This train will terminate here
即係點?過對面月台轉車囉。

Image for post
Image for post

又無錯仲有巴士,但以香港比喻,就係昔日啟德機場,行出去太子道搭1, 1A, 5, 9 先至出到尖沙咀嗰隻。拎住一喼二箱抬上車,車上又無行李架,你搭啦!

Image for post
Image for post

再又無錯,有所謂 Hotel Shuttle Bus,即類似香港 Airport Hotelink 嗰啲,半個鐘一班都算,仲要坡紙9溝一位,的士通常連埋附加費都係廿溝左右,不如搭的士算啦。仲有呀,今次返香港之時,本來打算响酒店試吓搭 Shuttle Bus,但 Concierge 話要 Advance booking in 4 hours before.......
仲唔係「除了德士以外你們沒有別的交通工具」呀!

=======================================

其實响客運大樓,已經好多「頂你唔順」嘅嘢,其中一樣而我覺得最黑人憎嘅就係鋪地毯。我去過晒四個 Terminal,除咗 T4 移民署入境大廳係鋪地磚之外,其餘都係地毯。

Image for post
Image for post

係呀,睇落好靚,但當你拉住個轆喼發覺個轆好似啜住嘅時候,就唔慌唔靚喇!

雖然T1, T2, T3, T4 响 Airside 都有 Moving sidewalk,但都係過晒啲商店林立嘅範圍先至有,某程度係有意無意地迫你買嘢嗰隻。 T4 更簡直痴膠花,有同無係無分別。因為得一頭 (G3-G2) 一尾(G14, G15) 有。試過搭因航返香港而閘口係G18,拉住個喼行到講粗口。

另一個膠爆嘅問題係Terminals 之間嘅接駁。獨立 Terminal 規劃其實响世界各地好常見,例如台灣桃園就係兩個 Terminal。正常嚟講,機場應該安排有接駁交通往來各個Terminal,例如台灣桃園就有無人駕駛列車。樟宜機場都有APM列車,不過只限T1-T2-T3之間;Terminal 4 就只有巴士,都唔緊要,事關 Heathrow 都係咁,但樟宜機場的,只係連接T2。

即係點?好似我返鄉下咁,搭 SQ 响 T3 落機,轉 AK 响 T4,先要由 T3 行過去 T2,然後先至上巴士囉 (反之亦然)。仲唔嘔血呀!講緊剛呢一次因為舅父擺大壽,一喼衫褲鞋襪之外仲有一喼攝錄器材,我點可能唔火山爆發吖!

我唔知樟宜機場管理局有無收到投訴,但T4 啟用咗一年半,就好肯定班坡佬無意識到咁嘅規劃係問題。或者班坡佬覺得「Can reach T2 then can walk to T3 and T1 is enough nei」。

講真,香港機場都係衰架喇,但真係唔好覺得樟宜好狠勁囉!


Image for post
Image for post

連續幾天不斷落雨,仲要日間氣溫唔高過20°C,正宗濕凍天氣,真係好惡頂。要搵啲方法舒緩吓情緒,對我嚟講,聽歌係方法之一。

要搵同雨天有關嘅歌,其實大把。但都有共同特色,就係歌詞離不開情歌,旋律都係帶點悲傷嗰隻。

會唔會越聽越頹?睇你點聽嘅啫。我依家聽歌嘅習慣唔會只集中於歌詞,編曲係另一個欣賞重點。

第一首 《雨絲‧情愁》 譚詠麟

Image for post
Image for post

以雨天為題材,點少得呢一首。舊係舊咗啲,五輪真弓作曲及編曲,真係夠晒經典。Out 唔 Outdate 就見仁見智、各花入各眼。但撇除晒所有 bias,掹走晒啲歌詞,真係一聽就知係「幾呀年前」嘅產物。

不過,無話舊嘢唔好。尤其是填詞呢科嘢,响1980年代真係好講究填詞人嘅修養同功力。向雪懷寫到嗰種在雨夜中想挽回舊情人,但唔止失敗收場,仲要係「 可惜聲浪 被大雨遮掩你未聞」講到連個天都唔鍾意我嗰隻,真係幾入肉。

第二首《分手總要在雨天》 張學友

Image for post
Image for post

落大雨想尋回舊愛,咁當然要有「分手」啦。但分手之後,總會有觸景傷情嘅時候。所謂「諗返起當日」嗰種仇緒。

同樣係改編日本作品,陳少琪嘅詞唔係話唔好,不過純粹「講故仔」而無咗《雨絲‧情愁》嘅場景描繪,相比《雨絲‧情愁》好似少咗啲深度。

張學友仲有《藍雨》都係同雨天有關,林振強嘅詞就齊晒場景描繪同個人思緒表達,果然「強伯即係強伯」,無得輸。

第三首─《雨中的戀人們》黃凱芹

Image for post
Image for post

睇怕無乜幾多人記得黃凱芹出過唱片,甚至唔記得黃凱芹呢個人。

講返首歌。桑田佳祐作曲,又係日本改編作品,改編自 中村雅俊《戀人も濡れる街角》。今時今日聽返旋律同 Richard Yuen 本地編曲,雖然都係「一聽就知係舊嘢」,但仲算可以接受,唔係嚴重 Out 嗰隻。

簡寧嘅詞,又係齊晒場景描繪同個人思緒表達。今時今日活躍嘅填詞人有邊個有呢啲級數?唔敢話無,但真係唔多囉。始終「工廠式生產」What seven you want?!

第四首《雨一直下》張宇

Image for post
Image for post

眾所周知我有聽開台灣歌,所以唔會少得呢首。

早陣子同朋友出嚟飲嘢,講開大家啲聽歌喜好。不約而同都係進入1990年代中後期,轉晒去聽台灣歌。我嘅其中一個原因係台灣歌嘅編曲嘅層次感比香港豐富,進取大膽,尤其是低音嘅處理同運用。又當然講到填詞,大家都認為台灣嘅填詞質素追上香港。張宇呢一首,就同時符合晒呢兩個條件。

第五首《雨傘》徐懷鈺

Image for post
Image for post

我講到台灣歌,點少得徐懷鈺!

唔少人對 Yuki 嘅印象都係集中响快歌,而其實,佢唱慢歌更加一流。

陳國華作曲同編曲,今時今日聽唔算新,但亦唔算 Out,相信未必會諗到首歌係早到响2000年嘅作品。姚若龍填詞不嬲都係信心保證,呢首歌雖然都係情歌,都係觸景傷情,但唔止「講故仔」,亦唔止有場景描繪,仲有心路歷程嘅表達,透過「有人表達關心」映照出難捨舊情。正如我之前寫過,好有電影場景 Feel

第六首《偶陣雨》梁靜茹

Image for post
Image for post

講台灣歌,除咗 Yuki,仲會有梁靜茹。

首歌本身唔係以雨天為題材,陳沒嘅詞係以雨過天晴過後一切恢復過來,比喻感情告終之後唔一定係仇恨、抱怨,可以係期待有更美好的未來。

仲有,啲詞係有啲「古文 Feel」。例如呢兩句

呢啲都係填詞人功力嘅表現。

于京延嘅編曲,同歌詞及陳韋伶嘅作曲旋律,將成首歌要表達嘅意境、思緒變化,我就覺得係 Perfect matched。

要數當然仲有,但有啲恕我真係一時三刻記唔起,或者記得起都唔係好想寫。點解唔想寫?唔想咪唔想囉,駛解釋咁多咩!


Image for post
Image for post

昨日西隧九龍入口宗嚴重車禍,又惹起疲勞駕駛疑團。巴士公司出咗聲明話咗唔係;當然,真相係點有待調查。但好多香港人都只會膝撞反應,聽到就不加思索,繼而KOL、評論員上身。但講咁多又點吖,公共運輸機構唔夠司機就係事實,與其你一言我一語質問「點解請唔夠司機」,不如全香港反省以下嘅一堆問題。

撇除巴士公司係咪無良僱主,如果巴士公司話經過市場評估,要出到月薪 港紙$30000 +大量福利,先可以請返晒足夠司機,但要加價最少30%,你願唔願意俾呢筆錢?

乜話?巴士佬拎堂圜逗三萬蚊人工?乜嘢新鮮蘿蔔皮呀!
相信好多香港人,特別係平時我寫評論講嘅港燦同港豬,必定會咁講。事關 「細時唔讀書,大咗做運輸」呢十個字,實在太深入人心。

甚至會有怪獸家長話 巴士佬三萬銀一個月?我仲點叫我個仔俾心機讀書呀!咁仲成世界嘅!
但其實,如果唔係一個「唔讀書(好似係)無出色嘅巴士佬」坐响司機位,你啲咸魚行路啦你!

唔搭巴士咪自己揸車囉。係呀,咪就係你自己「拎堂圜」囉!同埋巴士佬要受嘅路面風險,咪你自己受囉!

香港地就係太多人唔識得逆地而處,自以為是,狗眼看人低,踩低人抬高自己......

目前香港巴士車長月入大約$23000至$25000,但每週工作時數起碼50小時;對應埋外國嘅公共運輸制度而要睇埋嘅專線小巴,車長平均月薪未到兩萬,仲要受埋港燦港豬 (好唔想响呢度用呢啲字眼,但真係無辦法)嘅白眼,以至咸魚嘅挑釁,自不然無太多人想做巴士佬。

======================

港紙$30000 係咪好高?不如比較下外地嘅情況。

Image for post
Image for post

倫敦巴士佬,新牌入職起薪£12/HR,每周基本38小時。每日OT 上限10小時,每週總計唔超過50小時。兩年年資月薪已經接近 £4000。

Image for post
Image for post

德國巴士佬,€13/HR,工時同英國差唔多。基本月薪€2800,另加公司代支社保醫保,總計接近€3500。

香港人實會話「唓,你講歐洲,梗係高人工啦」。我有一個朋友就是倫敦巴士佬,家住 Zone 3,窩居 400呎,月租 £700。德國西部大城市Apartment式住宅窩居約800呎,月租€600-€1000。

要講返亞洲鄰近香港的嘛?

Image for post
Image for post

新加坡巴士佬月入約3000-3500溝,保證10.5小時可以收工;居住使費唔駛再多講啦。

Image for post
Image for post

台北巴士佬月薪約60000-70000台幣,兌匯率係返港紙15000-18000,但萬零台幣都住到15坪(約500呎),LUNCH 食得豪都先至200台幣,一般百零蚊可以填飽個肚。只不過台北啲巴士線規劃係痴膠花,成堆有如KMB 53 但元朗開車出荃灣再兜返入元朗 接近4個鐘先有得落地疴殊殊嘅路線,仲要唔健全嘅駕駛保險制度,先至人手不足。

相比起嚟,加埋啲港燦白鴿眼同咸魚肆虐,香港巴士佬其實係奴隸都不如囉。

所以呢,下次又有巴士脫班要抦巴士公司,甚至再有不幸事件發生而又涉及疲勞駕駛嘅問題的話,唔好再講咁多喇,知無?!

就算唔問願唔願意俾貴啲車費都好,都問吓自己,願唔願意掉咗「細時唔讀書,大咗做運輸」呢十個字落咸水海、挖咗你雙對巴士佬嘅白鴿眼出嚟?

恕我長氣,唔該記住:
無巴士佬坐响個司機位,行路啦你 死‧港‧燦!


Image for post
Image for post

剛由台北返港,今次逗留咗三晚。心水清嘅朋友會估到此行有乜搞作。

响台北住開嗰幾間三星級飯店 Fully booked,另外兩間住開嘅四星級飯店 (價錢唔算貴),其中一間爆滿,另一間的房租「海鮮價」升到過千港幣,就梗係唔住啦!改咗一間我以往都會成日經過但又未住過嘅,即管試試,但早餐要另外加400台幣......

不過咁,有去開台北玩嘅人都知,大多數食店只做午市同晚市,無幾多間有開早市。但我計過度過,都係出街食好過。正如一年前所講,我依家去台北嘅心態有啲似响當地生活咁,所以搵到乜就食乜。

第一朝去咗台北人叫嘅「早餐店」食包,TWD100 好飽,飽過香港茶餐廳。

Image for post
Image for post

第二朝想搵其他嘢食。其實我知有檔賣豆漿油條嗰類「古早味」 (唔係永和、大王嗰類集團店),不過要行15分鐘,都係唔去。响附近周圍搵,得一檔賣越南河粉有開,就「是但啦」行咗入去。

Image for post
Image for post

碗粉嘅味道同响香港食開嘅有少少分別,但都入得口嘅。不過無得要碟仔辣椒青檸就爭咁啲。聽到店內兩位女士講越南,大約都知係過埠新娘嗰一類人。

台灣同香港都有中年人外地尋妻嘅情況。香港麻甩佬就北上深圳河以北,台灣佬就經媒人中介去搵越南妹。不過港、台兩地嘅情況有好多唔同。越南新娘要去台灣家庭團聚,個台灣佬要接受移民署「秤身家」;另外,台灣政府有多個部門由語言、文化等多個範疇向台灣通稱新住民提供支援,俾佢哋融入台灣社會。並周不時舉辦活動,俾啲新住民同台灣本地人一齊參與,而啲活動通常都離不開食。而我响唔同縣市見過唔少越南菜食店,就係呢啲越南新娘响台灣落咗腳之後開設的。

即係咁,我真係唔想一碗生牛河都講咁多嘢,但又真係一碗生牛河就睇到台灣同香港兩地嘅「過埠新娘」嘅差異。嗱...... 唔係又歧視排外法西斯,但香港真係無乜「家庭團聚」有最起碼帶來美食囉。係咪咁話先!


Image for post

每逢農曆新年,好多平日無乜嘢都唔會見、唔會聯絡嘅所謂親朋戚友都會蒲頭,拜年講嚟講去十居其九都係仔女讀書幾叻、住間屋幾大幾貴幾靚、架車幾多錢;問長問短來來去去幾時畢業、幾時買樓、幾時結婚、幾時生仔……唔係晒命就互相抽水。食飽派完利是就學歌星開演唱會 (或支聯會六四晚會)話下年再見。有人話唔明點解農曆新年總係講埋啲咁嘅嘢,但試細心諗吓,就係隨時一年裡面有364日都唔知你搞乜,除咗咁仲有乜好講有乜好問。一年裡面唯一一日刷存在感,就點都要搵啲不著邊際、無厘啦更嘅嘢講吓架啦,係咪咁講先!

講到農曆新年刷存在感呢科嘢,又點止啲所謂親戚朋友吖,就是你住嗰個偽豪宅屋苑個啲管理員,平日就算唔係黑口黑面,大年初一都必定烚熟狗頭咁嘅面口同你打招呼「乜生乜太早晨呀,祝你.......」

再除咗响你屋企範圍之外,成個香港四周圍都大把人要借農曆新年刷存在感。

第一種係睇相佬/婆。雖然,平日啲報紙總會失驚無神搵啲大師出嚟廢噏兩句,例如英女皇面相就是大富大貴衣食無憂,邊個新樓盤嘅風水局夠晒豬籠入水買咗嘅必定發達,但通常都無乜人留意佢哋 exactly 講乜。只不過去到農曆新年,一講啲乜嘢十二生肖來年運程,來年地運邊度財位、文昌位啲風水佈局,就大把人當聖訓咁追住要聽要睇。

但講真嗰句,真係了解玄學而知道生肖只係運程嘅1/8,就會知道頂多聽咗就算,甚至衰啲講得啖笑啦。只不過香港人普遍都係俾$1想得$10嘅「咸魚」,以為聽咗嗰1/8當係全部,啲大師唔趁農曆年講兩句,有幾多人真係記得佢哋嘅存在吖。

第二種我想講嘅係營養師。每逢過時過節,總係走出嚟講啲「傳統食品」點樣高糖高脂高鹽高熱量叫人食得健康啲。無錯,除咗農曆新年,仲有端午糉、中秋月餅,啲營養師都可以廢噏,但農曆新年嘅「美食」有年糕蘿蔔糕,油角煎堆,再仲有糖冬瓜糖蓮子(雖然都無乜人食)之類,種類比端午中秋多好多,端午、中秋講一次,新年起碼可以講三四次喎。

Image for post
Image for post

但又講真嗰句,營養學係日常生活需要有嘅知識,但啲營養師平日只係識得話煎炒煮炸唔健康、清蒸白水烚最健康,叫人食之無味,阿水得Q閒聽佢廢噏咩。講埋啲terms 都無乜人聽得明,淨係「幾多『份』」呢個單位,唔係平時嘅幾多斤幾多両,阿水都無得閒聽佢講啦。喂阿哥阿姐,新年咁多高糖高脂高鹽高熱量,話之平日無人聽,唔趁新年出多幾次鏡、有多幾篇稿,點捱得過平時無人理嘅日子呀。

第三種嘅係環保L。香港啲所謂環保份子,十個有九個都係用石器時代、侏羅紀時期嘅概念,總之任何現代嘅生活模式就係破壞環境;再唔係就例如地X之友嗰啲擺明「收錢做嘢正仆街」提倡埋啲根本係有破壞無建設嘅建議。平常周街俾人喊打都仲係要講,農曆新年又有年宵市場賣剩桔、用好多紙造利是封,仲有小農基因要食剩餸,大魚大肉破壞生態...... 又係一個過年可以講幾呀劑,仲唔衝出嚟搶鏡頭咩。

第四種係政客,講緊嘅唔係平日都算勤政於民嗰啲,係平日唔見人嗰啲。農曆新年可以開檔寫揮春,同街坊拜年做藉口先至出動,仲唔趁過年蒲吓頭,到選舉時阿水記得你咯。當然仲要講嗰啲沒落嘅政客政團政棍,趁過年開返個檔名正言順叫人入錢入錢入錢。

當你睇到香港嘅過年,除咗啲所謂親戚問問問晒晒晒,再睇埋社會上有一堆二堆三堆四圍都係嘅人只顧抽水刷存在感,搞到農曆新年嘅氣氛變晒質,仲會鍾意過年咩。聽朝年初四,今晚早啲瞓啦,唔好唔記得山竹颱風之後「我好鍾意返工」嘅精神呀!


Image for post
Image for post
停機坪角度,梗係我影架啦

得閒無事快閃台灣,尤其是台北,係當今好多香港人嘅習慣。千零蚊機票錢加幾百蚊一晚酒店錢,就可以逃離香港啲烏煙瘴氣、疏導吓工作或生活嘅怨氣。香港-台北嘅班機數目又夠多,幾乎可以話「話行就行」。

現時經營香港-台北有四間航空公司 ── 國泰(連埋港龍當一間)、中華、長榮同香港航空。除咗 HX 因為係中国共产党而打死都唔會搭之外,其餘三間我都搭過。

最原本我多數搭長榮,事關國泰的票價通常稍貴三兩百蚊但得「因航雞卷」、中華就是國民黨的嘛...... 最主要原因其實係張國煒呢個「機膠」,佢主政期間長榮嘅服務質素真係無得彈,有「正餐」唔在講,每日五至六班機多數係330或777嘅大機 (之前仲有744 Combi);搭過飛機就會明白Twin-aisle 機艙空間感引伸「舒服」呢兩個字嘅重要性。

Image for post
Image for post
長榮當年的 747-400 Combi

但自從張國煒在2016年3月11日被家族驅逐之後,長榮啲服務開始一落千丈。雖則香港-台北航線只係長榮業務一個好細嘅 portion,但所謂見微知著、一葉知秋,進入「後張國煒時期」嘅長榮,可以話無眼睇。

對我嚟講,飛機餐响來回台北唔算好重要,但無咗「正餐」得返兩件蛋糕,仲衰過「因航雞卷」,呢啲擺明縮皮所為已經核突。

Image for post
Image for post

另外,大機為主變細機 (A321)主力,除咗乘坐感覺唔舒服,香港-台北嘅貨運需求係「多多都有」,所以張國煒唔太理會客艙Loading 堅持用大機飛香港,反映張榮發大房班二世祖根本就唔識做航空公司生意,即係唔駛預計啲服務質素會有改善嘅可能,我就開始「轉台」。

本來因為 SQ Krisflyer 儲哩數 (雖然唔多,但積沙成塔嘛) 仲會搭吓,不過見到條 Pre-flight 片,已經唔想再搭。

Image for post
Image for post

條片响度跳現代舞,啲Safety advises 訊息模糊到不堪。呢個唔係我吹毛求嗤嘅執著,而係飛行安全係一個Hardcore topic,真係「無情講」。當 SQ 嗰條都俾我鬧爆,BR 呢條對於無搭慣飛機嘅人嚟講直頭係靠害,進一步證明張家班二世祖根本唔L識經營航空公司。再加埋近期癡肥鬼佬疴屎單新聞,終於明白長榮啲 Crew 啲面口點解越來越難睇,因為啲士氣差到一個點。所以可見將來我都唔會再搭長榮了。

因炒燶期油而要縮皮嘅國泰航空,搞到台港線無「正餐」俾人鬧爆而啲客走晒去其他航空公司,確實係自作孽。後來將响 Meal time 嘅班次提供返「正餐」,總算做返少少嘢。逆地而處去諗,香港-台北嘅機票價錢比我仲篤緊 ABACUS 嘅年代無乜變化,唔可能期望班班機都有「正餐」食啦。但 CX 啲 Crew 嘅服務水準的確仲係「爛船三斤釘」,衰極有個譜。

因航嘅777 座位佈局由3-3-3 改 3-4-3,搞到連小巴公司都抽佢水,又確實係抵佢死嘅。但中華嘅777 一早就係 3-4-3 layout,又唔見有人出聲囉。或者中華仲幾乎肯定有「正餐」,的確可以「收買人心」。平心而論整體服務質素都仲算可以,但始終搣唔甩嗰陣「國民黨除」。或者係我寫咗好多年評論,仲要係有响台灣報紙寫而產生嘅思維吧。

回顧返「恐龍時期」嘅台港航線,除咗固有嘅國泰同中華之外,仲有 TG、SQ 嘅第五航權班次,仲要各每日兩班;另外仲曾經有 BA。再遠古啲去到1980年代,日本航空因為國際政治因素需要而另立牌頭嘅 日本亞細亞航空 (Japan Asia Airways, IATA:EG),其實比今時今日更加精彩。

Image for post
Image for post
Source: Wikimedia, free media repository

客觀咁講,台港航線某程度上已經正如歐洲內陸機咁「巴士化」,唔可以要求咁多。但始終香港人對「搭飛機」呢三個字嘅認知,仍會對所謂服務質素有所期望,咁就唯有等張國煒間星宇航空預計2020年開張,睇吓會有乜新搞作出嚟。不過記住「羊毛出自羊身上」嘅道理囉,唔該。


Image for post
Image for post

每個人由走出校門踏入社會之後,就必定陸續見證朋友拍拖、結婚、生仔;而要是到咗我呢個年紀的話,亦點都好難見唔到離婚、爭撫養權、拗贍養費......

有人話離婚率同城市化發展有關,因為相比農村,城市人能接觸更多的人同事,有更多嘅誘惑。呢個講法某程度上錯唔晒,亦的確剩係講「生活」呢兩個字,城市嘅條件狀況比農村更複雜,所謂「要諗多好多嘢」。但係人本身有思想、有智慧,面對所謂嘅誘惑,面對生活衍生嘅問題,係可以去做選擇。俗啲講即係「無人揸住枝槍指住你個頭迫你去做或唔做某一件事」。

當前嘅香港,婚姻好似變咗一條方程式,而條方程式嘅script形成好多條件,好多香港人會去追求要用得到。例如30歲左右就要結婚,免得女方要做高齡產婦;為咗要生仔,就要有安定嘅生活;生活要安定就要買樓。再加埋日後奶粉尿片供書教學樣樣都要錢,同埋「結婚產業化」之下催生「一生人一次點都要豪」嘅思想而要使嘅錢,所以「經濟能力」係好重要嘅條件。所謂「貧賤夫妻百事哀」,兩個人一齊真係無可能有情飲水飽,「生活」真係一個好現實嘅問題。

無錯,客觀講所謂兩情相悅唔能夠單純用錢去衡量,但兩個人一齊唔係剩係為咗生活。可是因為「生活」呢個現實,就使到撇除拜金主義,好多人在感情關係建立嘅過程當中,就輕視甚至忽略咗「愛」呢個字同引伸出嚟嘅心靈連繫,呢樣感情關係嘅真正關鍵元素。

我聽過唔少人講「結婚嗰個唔會係最鍾意嘅嗰個」,原因係「結婚要嘅係一個適合嘅人」。何謂「適合」?我試過打探講呢啲說話嘅朋友嘅口風,十居其九講到尾都離不開「生活」呢兩個字;而「生活」就係去返「結婚方程式」嗰堆script。於是乎,對住一個「好有感覺,感情好好,一齊好開心」但就覺得fulfil唔到「結婚方程式」嗰堆script而放手,然後就覺得「都鍾意佢嘅」嗰隻意識就選擇咗嗰個「適合嘅人」;

恕我講得血淋淋,為咗「生活」而選擇「唔係最鍾意嘅嗰個」,根本係退而求其次。或許有人認為「魚與熊掌」嘅道理,人生就係要有所取捨。但試諗諗,對住一個唔係自己嘅 first choice,內心總會有「依家呢個硬係『爭咁啲』」嘅潛意識。

何謂「爭咁啲」?就是衰啲講,食飯睇戲行街SHOPPING,在心理學所指「行為」嚟講,你同邊個一齊你都係咁食咁行咁買架啦。點解你會揀某君陪你行街食飯?有錢幫你找數但去食嘅、去睇嘅、去買嘅唔係你鍾意嘅,即使你阿Q地抱住「有錢幫你找數」而呃自己覺得滿足,平常時無事無幹就當然唔覺有問題存在。但當「誘惑」出現,即使係一個未必好有能力經常請客送禮,但每次都同你去食去睇你鍾意嘅嘢,嗰股潛意識就會驅使你追求返嗰少少「爭咁啲」。三角關係其實係咁樣嘅狀況之下形成。

再甚至講得Erotics一啲,撇除道德觀念枷鎖,造愛只是例行公事,只顧宣洩生理需要;甚至乎父權啲咁講,男人要射之嘛,是但一個窿都射得啦;撇除女性嘅生理滿足有較多成因來自心理,而其實男性都有心理因素,無理會對方嘅感受,同邊個做又有乜分別?!

「造愛」呢個詞彙嘅精髓在於個「愛」字。愛係由心而出,透過行為去表達,更重要嘅係雙向的。只顧滿足自己,甚至只係基於小農奴隸基因之不孝有三無後為大所引伸出嚟嘅觀念,唔少夫婦忘記咗「愛」呢個成份,只顧「造」。當如果遇上一個「對手」而過程中滿足到嘅唔止生理,仲有心理,就算唔係性愛高手,意識上好自然就想同後者「搞」。出軌外遇,說穿了都係失去咗「愛」而導致,唔係拎住道德兩個字就可以作出裁決然後無事發生。

我覺得最大問題唔係日常生活同床上嘅相處所反映嘅感情關係狀況,而係為咗「適合」無視咗自己嘅真正感受,繼而在不知不覺間失去咗自己,以假面具對住個「適合嘅人」都唔知,或是以為成功麻醉咗自己。但只要當人生歷程出現一啲微妙嘅變化而「麻醉藥失效」,痛苦就只得自己承受,「手尾」亦係要自己處理。

因此,與其認同以「適合」二字將「結婚嗰個唔會係最鍾意嘅嗰個」彷彿變成合理之說,然後麻醉自己,到頭來不論好定唔好都係自己受,點解唔係諗清楚自己嘅需要?!

當對住唔係 first choice 嘅對象,然後用「生活」等各種藉口說服自己,可會是委曲求全?我唔敢一刀切下定論,但純粹從人性角度,「結婚嗰個唔會係最鍾意嘅嗰個」,就衍生咗一大堆潛藏問題,就係不爭的事實,「爆鑊」係正常不過,唔爆唔係你好彩,只係時辰未到。或者當下嘅香港,就係「生活」為上,心靈滿足唔可以當飯食;加上小農奴隸基因嘅集體主義,即係俗啲講「人哋死就要跟埋去死」,結果咪無乜人覺得 not the first choice 唔係問題囉。


Image for post
Image for post
飛鵝山嘅日落餘暉,只得幾分鐘時間可以捕捉

响2018年最後兩日,回望年初寫到「無謂諗咁多,順心而為對得住自己,就已經足夠」,真唔知對住個天要講多謝定係「多L謝」。

舊年聖誕在新加坡古晉渡過,實踐對自己嘅承諾之餘,仲有從舅父、表哥表姐等人身上,了解到更多事情。其中的,終於參透到點解以前屋企人每逢返到去,都會「由落飛機到上飛機之間」幾乎一個仙都未使過,甚至成個大喼土產特產手信禮物帶返香港。原來人心總係想對一啲遺憾作出彌補,所以我就諗「更加要去彌補逾30年嘅過失」。

Image for post
Image for post

有乜「逾30年嘅過失」?由細到大,我只係知好多親人响古晉,但從來唔知道點解會咁,因而唔覺得呢個地方有乜重要性。唔好話自己買機票,阿媽返去都無話要一齊。到近年對南洋歷史做咗好多研究,過程中同時發掘到屋企嘅故事,繼而明白到古晉對自己嘅重要,再發覺過去源自無知嘅忽視其實有幾唔啱,甚至可以話不孝。

如今兩個仍健在的舅父亦年事已高,要爭取時間盡能力去彌補。失而復得,就是要好好真惜同把握,起碼同自己「有所交代」。

今年另一個最大嘅「失而復得」,就係徐懷鈺 Yuki

Image for post

由佢演唱會門票開賣之後,唔少朋友見我成日講佢「唔知我黐咗邊條線」、迷佢迷到上晒腦 short 咗咁滯。

之前講過,原本我無買齊佢嘅碟,或更實在嘅係,佢嘅CD多年來只係書櫃中的「擺設」,幾乎唔記得佢啲碟响度。當得悉佢開演唱會,我嘅反應係抨地一聲雷 ── 沉靜咗咁多年竟然無消失,仲要開Concert!!!

跟住諗返起佢當年初出道之時我都幾「迷」佢,只是家教形成嘅意識而無出去「追星」咁解;然後的,終於捨得摷返佢啲CD出嚟擺落部Hifi,當年嘅記憶返晒嚟,包括呢世仔第一首聽到喊嘅歌 ──《溫習》。繼而出現咗一種想要「尋回失去的」嘅意欲,於是唔理三七二十一訂購演唱會門票。

再之後到無心插柳的出席台灣歌迷會為佢舉行嘅生日會,同台灣、香港、以至馬來西亞嘅歌迷朋友交流。唔計「追星」嗰啲或八卦新聞,佢啲音樂作品,尤其是我未有機會聽過嗰啲,發覺自己missed好多嘢,並真係挑起我條癮。然後先至係台灣嘅歌迷朋友幫忙搜羅返我唔見咗、無買到、買唔到嘅專輯。

Image for post

「集齊全套」之後聽返晒啲作品,原本有响手嘅當然有新嘅感受;之前未有聽過的歌曲,不單止有新發現,其中收錄在《Bad Girl》專輯的《心中的遺憾》,將隱藏咗响內心世界深處嘅一啲歷史痕跡「扯」晒出嚟。心情淪陷咗好一段時間之後,進入「清空負累」嘅狀態,終於可以同自己講重新上路。

可以話徐懷鈺唔止係失去過重新擁有,甚至得到比原來的多;另加上台灣嘅歌迷朋友講返 Yuki 嘅經歷同故事,實在無限感觸,所以就「迷」到「痴漢」咁而講唔停。

得回唔少失去過的,確使人欣喜,但工作、生活屢現危機,就使人透不過氣。颱風山竹更使我損失慘重,堅係有擔心唔知能否捱過。雖然目前還未恢復元氣,加埋所謂「大環境」,一切只能見步行步。

或者就係「大迷信」咁講,個天俾得啲嘢你,就會要「等價交換」拎走你一啲嘢...... 所謂有得必有失,人生就是不斷Give and take。只不過正如《聖經》有云「 當上帝關上了一道門,必會為你開啟另一扇窗」,即粗俗啲講「唔會要你咁易死」。嚟到年底,其實見到一啲疑似新曙光,縱使未能確定,但總算有路可行。姑且就用舊約聖經《約伯記》做下阿Q,自我安慰一吓。

嚟緊2019 年想點?老土啲講就期望雨過天晴。但其實心底裡都諗到啲嘢,亦有朋友俾咗意見,咁就同自己講「做好準備,整裝待發」。所謂機會留俾有準備嘅人嘛。


Image for post
Image for post

香港航空(HX) 同香港快運 (UO) 兩間實際係中共嘅航空公司由2006年出現,改變咗香港民航客運業的經營生態之餘,亦大幅改變香港人嘅外遊習慣。所謂自由市場,消費者因應價錢而作出選擇,係自然不過嘅事。

但所謂「羊毛出自羊身上」,機票賤價,航空公司都要有其他財路先得㗎喂。對航空業有認識嘅人都知,賣機票嘅收益對航空公司嚟講只係得啖笑,「機肚」貨倉先至係搵錢嘅關鍵。但 HX 同 UO 响貨運嘅收益有幾多,行內人大多心裡有數。

就假設一般人唔識呢啲咁專業嘅嘢,咁多年來唔係無人講過 HX 同 UO 擺明「燒銀紙」。坐食山崩遲早出事咁簡單嘅道理,香港人有諗咩?有就唔會搞到近幾日HX 「派」咁多花生啦!

香港人豈只係貪小便宜嘅小農,個腦仲充滿「咸魚思維」,成日只想「俾 $100 買到$1000 嘅嘢」,覺得「因航」offer 唔到就係唔啱,見 HX UO 直頭係「用$50買到$1000嘅Service」就狗衝,養大咗兩間實際係中共嘅航空公司。客觀咁講,撇除「因航」的管理不善,尤其是炒賣期油損手爛腳,國泰同港龍見住市場不斷被蠶食,好難唔「縮皮」喎。 根本上HX UO 壯大,係國泰同港龍嘅表現下滑嘅外圍客觀因素,但香港人望住條「因航雞卷」只會滿肚怨言。

Image for post
Image for post

更是 HX 同 UO 响「持續有大量狗衝」嘅條件下壯大,更出現壟斷嘅情況,搞到國泰同港龍唔止要縮皮,甚至要取消某啲航線,就搞到出現有啲人所謂「焗住搭 HX UO」嘅情況。但 HX UO 獨市嘅地方一定要去嗎?或者對香港人嚟講 HX UO 獨市嘅地方真係好難忍得住唔去,尤其是講緊日本喎......

好喇,去到近呢一年多兩年,有關 HX UO 及母公司海南航空集團嘅消息滿天飛,普遍人嘅反應離唔開「祖國很強大,最終一定搞得掂」嘅思維。但細心睇吓,不過是因為「我討厭政治」「我唔睇新聞」嗰種無知,所謂今朝有酒今朝醉,明天自有明天的憂慮,仲有平機票可以「狗衝」而已。當然,還少不得認為嗰啲消息只係「嚇鬼」甚至是「狼來了」。

再到近幾日 HX 「派發」海量嘅花生,終於出現較大規模嘅恐慌氣氛。驚嘅當然係擔心買咗機票去唔成食玩買瞓為主啦。但依家嘅形勢可謂熟飯快成,驚都無用架喇,做定心理準備出發唔到去食玩買瞓扑,甚至有去無回啦!另外有部份人,就開始玩割蓆,除咗有話從來都無搭過呢兩間共產黨扮香港嘅航空公司之外,亦有「一路都唔LIKE HX UO 架,不過有時無辦法焗住搭」......

正如前面有問「HX UO 獨市嘅地方一定要去嗎?」,「焗搭」兩個字已經解唔通啦!再者,HX 曾經响2016年5月28日至2017年2月11日期間開辦過香港至古晉直航,

Image for post
Image for post

而我原本計劃响16年尾/17年初返古晉探親尋親 (出咗機票但有突發事押後到17年3月),都「犯賤」地幫襯SQ經新加坡轉機。仲講「焗搭」兩個字,我唔「門+小」都周街俾人笑啦。

Image for post
Image for post
新加坡邊駛「留」11日咁多呀!下一站就梗係古晉。

兩間航空公司,十二年嘅光景,將香港人嘅人性 ── 貪小便宜、短視、自私、懶醒、唔用腦、貪威識食、有事只顧逃脫、出事只想卸責....... 表露無遺,總算在「執行黨嘅任務」之外對香港社會有所建樹。不過,國泰同港龍就真係多L謝晒喇。

About

Jacky Lim

父自汶萊母自砂磱越,但生於香港嘅所謂評論寫手。如今更是旅遊、音樂、模型、生活體驗....... 乜都寫。

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store