飛鵝山呢處，好多人即時想到的關連字是「車震」，但除咗呢個「土地問題」之外，上飛鵝山仲有好多事可以做，亦有好多事要留意。
N年前第一次有私家車，就耐唔時上去。上去做得最多嘅事係睇風景，早、午、晚都試過無數次；凌晨四五點上去等日出又有，傍晚五六點睇日落又試過。不同時段嘅景色產生唔同嘅感覺，論最靚嘅還是日落餘暉。
相對港島山上所見到的城市景象，尤其是夜景，飛鵝山嘅優點除咗地勢高度比太平山、渣甸山、柏架山高之外，就係同市區高樓大廈距離更遠，視野更一望無際。唔好話凌宵閣側邊、盧吉道觀景台望落去成座中銀大廈同IFC 2 篤眼篤鼻，就算渣甸山(金督馳馬徑 / 港島徑) ，時代廣場同利園二期都係好硬眼。
上飛鵝山可以睇到九龍市區同港島嘅景色之外，行上去觀景台仲可以望到成個西貢，同市區另一個強烈對比。概括咁講，上到去就是可以俾自己放鬆心情，而且手提電話訊號 almost to be zero，堅係可以乜都唔駛理。
要上飛鵝山嘅方法不外乎行路或揸車 (的士 / Uber 無話唔得。錢多都唔係咁使啦)，揸車的話，由「舊清」清水灣道往西貢方向，過咗德望中學之後嘅燈位左轉就係飛鵝山道，但路面狹窄而且多急彎，駕駛技術唔太得嘅奉勸唔好上，但要「操車」嘅無話唔得，但如果後面有車「啄尾」就要讓車，唔好頂住晒。
咁多年嚟，不論上下或落山都遇過騰晒雞嘅司機以龜速進行，記憶中試過最高記錄「頂住」六架車，上到山頂俾人問候娘親是必然的。又例如好次尋晚咁，前面呢架凌志落山密集式狂踩迫力而車速不過30km/h，有讓車處又唔埋去，就搞到我火都滾！
查實上山或落山路段，都有「讓車處」。除咗如一般鄉郊「單線雙程行車」道路「停車彎位」式避車處 (但無路牌) 之外，幾乎每一個左彎的右邊都有足夠空間可以「讓車」
當然，香港嘅考車牌制度之下，「生手牌」或「雪藏牌」沒見到「讓車處」路牌就唔會識得採取適當行動，再加埋奉行「慢就是安全」、「有乜事就踩迫力停車」嘅「信仰」，就俾人問候娘親唔好怨。
又不論落車睇風景定解決「土地問題」，亦要緊記停埋路邊唔好阻礙路面；掉返轉，如果發現停低嘅車的車身在搖動，亦無謂打搞騷擾。雖然有所謂「公眾地方行為不檢」嘅法例，但客觀地講真嗰句，人哋响車上做緊乜嘢對你有乜影響先？既然無影響到你就無需要干涉人哋啦，啱唔啱呀！
我就未試過行路上去，但沿住車路步行要注意安全嘅事項，都係常識而已。沿路山邊有多處有山水流出，飲唔飲得就唔知，自行判斷啦。
有話說香港是山城，所以真‧土地問題係必然存在 (然後起勢話要填海)，但又就是香港咁多山，先有呢啲居高臨下嘅景致。要享用上天俾香港嘅呢啲恩賜，還是要記得「幸福唔係必然」
