香港嘅豐田毒到底有幾深
Sep 8, 2018 · 6 min read

在審議放寬小巴座位期間,尤其是19定20嗰陣,我猛烈炮轟政府同豐田「有路」,仲創造出「豐田霸權」呢一個有朋友話我知已經家傳戶曉到連街市賣菜婆豬肉佬都識講嘅slogan出嚟。有啲私怨大過天嘅人就以為純粹因為我同皇冠車行有牙齒印而「係都要搞佢」,但我响運輸行業打滾咗好多年,真係「見識唔少」,唔止係「霸權」背後好多唔見得光嘅嘢,仲有由私家車到商用車,大量「中豐田毒」而且毒發攻心嘅情況。姑同當講故仔 (以至講笑話) 同大家分享一下。
所謂「豐田無得頂,豐田無嘢整」,在某程度上錯唔晒,事關留意下中東、非洲啲新聞,塔利班、IS之類嘅「戰車」十居其九都係Toyota。而响中東嘅地理環境,路面又爛、周圍又沙塵滾滾同越野賽無分別,機械損耗其實非常之大;再者,資源匱乏物流服務落後,無零件又少車房,唔好話「換油CHECK車」,用到壞都未必有得整,無得整咪成架劏咗佢。但所謂爛船仲有三斤釘,劏咗嘅車而無壞嘅部份,就可以做「器官移植」......

