就咁睇個名，睇怕响香港無乜邊個知佢乜水。但如果哼起「有怪獸，有怪獸，纏著我….」呢句洗腦級歌詞，相信大家嘅反應會係「哦…. 原來係佢」。
對香港人而言，徐懷鈺的印象比梁靜茹可能更陌生。但佢响台灣樂壇，當年可謂一炮而紅，而且係大爆發嗰隻。被封為「平民天后」源於被發掘嘅過程同當時有如鄰家女孩嘅形象；佢的確有齊外型 (唔算靚，但有氣質)、唱功 (尤其是聲底靚同音域闊)、舞蹈、衣著造形嘅爆紅條件。
但不知是天意還是人為，甚麼恃紅驕縱、耍大牌等所謂人紅事非多之餘，仲發生一連串合約糾紛，不到幾年就人氣急跌到近乎消聲匿跡，罹患嚴重抑鬱症。
直到兩年多前終於復出螢幕，拍住吳宗憲主持綜藝節目，發佈單曲新作品《我還是那個我》正式重投音樂事業。我睇過 Youtube 佢近兩年的演出，就算演唱「洗腦級」舊作如妙妙妙、怪獸等，現場觀眾都非常投入而氣氛熱烈；FANS 唔只資深的追隨者，亦有年青的，人氣的確重新爆發。
但比較復出初期同近期的表演片段，復出初期可能適應問題同不知樂迷反應而有點怯場，到近一年左右就完全揮灑自如，甚至能完全控制現場氣氛，可見佢不單熱衷投入歌唱，亦似乎已擺脫之前幾年的噩運的陰影。
我對佢唔算好 die-hard，專輯都無買晒 (原本仲有《LOVE》，但可能搬屋時遺失了)，但對佢作品類別廣闊有幾深嘅印象。事實上，除咗那些「洗腦級」跳躍動感的作品之外，慢版情歌的演繹蘊涵嘅感情亦相當吸引。以台灣較多人認識 (香港，算吧啦) 的《愛像一場重感冒》、《我不要》之外，超陳年的《溫習》除咗算是催淚彈，亦證明佢嘅唱功唔係差；「後期」少少的《友情卡片(P.S. I Love You)》，或是帶點小調曲風嘅《分飛》，都可以睇到佢嘅作品多元化同唱功實力，由「平民天后」升級到「國民天后」並不算笠高帽。
再睇埋台北捷運杯街舞大賽代言人表演《Oh My!》又唱又跳，不單唔會為意就嚟「四張」而相反地覺得仍舊吸晴；五月尾將在台北開演唱會，宣傳海報散發出一股由自信而出的女人味，add-on 於仍有的少女味道，確實好吸引。最重要嘅係仍然唱得。真心覺得自己早在廿年前已留意台灣華語音樂，係正確嘅選擇。
