Maestra

Jeanu Rey
Jeanu Rey
Nov 7 · 1 min read

Ako midako sa karsada

Kauban pirmi ang mga barkada

Inig magtapok sige ra’g katawa

Magabin-an pa ug uli panalagsa

Tungod niining sistema-a

Ako naanad nga dili mamostura

Naanad nga wa’y pake sa itsura

Kay lage ang kauban ra pirmi kay ang barkada.

Ug sa dihang nagkakorsunada

Niining maanyag nga dalaga

Iyang kutis murag porselana

Perti rabang gwapaha labi nag mukatawa

Sa akong pag ukoy-ukoy ka niya

Akong namatngan usa siya ka maestra

Ang pagtudlo sa mga bata ang iyang kursonada

Ug sa wa damha naa pod siyay gitudlo sa akoa

Tungod sa akong gibati para sa iyaa

Na kamao ko mamostura

Nga bantayan nako unsa akong itsura

Inig mag stambay ko didto sa karsada

Tungod sa iyaha ako namatngon

Nahimo kong suki didto sa Watson

Sa mga pampatisoy nga panaliton

Kulang na lang mupalit kog blush on

Ako na kamao magbutang ug tawas,

Niining ilok aron inig panington Dili manimahong aliwas

Ako na kamao man-toothbrush,

Niining ngipon aron inig storya Dili manimahong kopras

Ako na kamao maligo kada adlaw,

Ug manlugod aron inig laag Dili manimahong kabaw

Ako nangandoy ug nanghinaut

Kining batan-on nga medyo maot

Tagaan niya’g atensyon ug pagtugot

Akong intensyon nga dli makadaut

Ug pananglitan di gyud siya kaangay

Niining mala-Daniel P. ko nga dagway

Ang importante kay ako misuway

Ug dool sa iyang kasing-kasing ug kana dli angay ikamahay.