有關〈港英其實都只係一舊屎〉一文嘅一啲回應

小弟〈港英其實都只係一舊屎〉一文發表之後引起咗唔少討論,所以有啲野想回應吓。

1. 有人話八八直選一事入面,中共威脅英國,搞到香港到91年先至有立法局直選,所以英國人就冇責任。但點解釋當時中共容許91年25%議席直選,但港英最後88年推嘅政改入面,91年只係得17.8% 議席直選?又點解釋英國不斷向中共出賣香港人?

為咗88年政改,港英曾經「隆重其事」特登成立一個叫「民意匯集處」嘅機構搞一場政改「諮詢」。但最後原來根本成件事係假嘅,枱底一早英國同中共就傾好咗「諮詢」結果。港英到頭來得出黎嘅「諮詢」結果竟然同所有坊間民調嘅結果相違背,話支持八八直選嘅市民唔係多數。香港人民意就咁樣比宗主國擺上台,又再一次成為中英之間枱底交易嘅棋子[1]。英國夾埋中共咁樣玩弄香港人民意,係絕對應該被譴責嘅。

更何況,《中英聯合聲明》無講過97前香港搞政改要經中共同意,一定要同97後政制銜接。彭定康之後喺90年代更加逆中共意喺香港搞政改搞搞到天花龍鳳,可謂「激嬲共產黨」嘅祖師爺。激嬲完共產黨,香港咪一樣天下太平,中共都冇出兵香港。可見香港97前基本上都仍然係英國人「主場」。港英治下香港冇民主,港英「非不能也,實不為也」。頂多只係怕得罪中共,令英國自己生意上有損失咁話。而英國看似向中共「跪低」,實質只係攞中共做擋箭牌,攞黎做藉口掩飾佢冇心喺香港推民主,延續殖民地統治。

2. 喺97年前香港大部分時間都係冇民主嘅。咁當然,香港冇民主,都有好多中共嘅因素[2],依個亦都係好多人幫英國辯解嘅理由。但係唔代表港英自身就冇任何責任。

尤其1946–47年,港督楊慕琦曾經提出同埋公佈「楊慕琦計劃」嘅政改,俾香港華人直選選出三分一市議會。(事實上,根據「楊慕琦計劃」,華人都只係二等公民,只係佔香港人口好少數嘅非華裔人口同華人竟然同樣能夠選出市議會三分一直選議席,而且立法局絕大部分議席仍然會由委任產生。)但楊慕琦卸任之後,接任嘅港督葛量洪治港理念同楊慕琦南轅北轍,佢認為香港華人受「仁慈獨裁」,令到最後政改即使已經得到倫敦批准但仍被推翻。喺依件事上面,港督取態先係成個政改失敗嘅主因,而唔係國民黨或者共產黨反對。

3. 又有人又話「冇英國人的制度與做法教化香港人呢班『生番』,香港 80年代全部直選,已選擇了與中共合併,一國一制」。首先嘅係香港人當時根本冇自決權,而當時英國亦都好明顯係唔俾香港人有得喺依件事上面自決。第二就係,80年代主流民意都係唔希望「回歸」,有得自決又點會以「一國一制」告終?

4. 我篇文提及英國人發明功能組別到今日千秋萬世;港英「行政主導」(即係行政霸權、行政獨裁)嘅殖民地政制俾港共繼承,以《基本法》嘅模式延續到今日,所以喺今日特首同往日港督一樣都係大權獨攬因為咁,我喺文章入面話,英國人係真係送咗份「大禮」俾我地香港人。有人反駁話「殖民政制人地用得令到香港人唔覺俾人殖民喎,生活好左喎,有埋身份認同喎,有咩問題?」

人係向前看,人係會隨時代進步嘅。「XX年前啲人覺得冇問題,亦都冇話要爭咩民主」,咁你唔好攞番咸豐年啲人返黎講?如果你滿足於殖民地政制,咁就唔需要爭取民主,咩民主運動都可以早抖,索性改名叫「爭取再殖民運動」,或者「爭取好皇帝運動」啦。

5. 最後都想講番,香港依個地方雖然係英國建立嘅,發展成今日咁發達嘅地方,英國當然係有不少功勞,但依樣野並冇改變英國殖民者嘅本質。香港人依然係「帝國」入面嘅二等公民。指出大家喺港英治下都係被殖民緊,只係大英帝國嘅二等公民,請問有咩問題?唔好講話咩自決權,民主選舉,甚至示威集會嘅自由都被剝奪。港英治下甚至有「政治部」依啲特務組織去搞啲本地民運人士。

觀乎不少對我篇文嘅回應都係批評話「冇英國當初割香港番黎香港都冇今日,咁多要求做咩」。難道「冇英國當初割香港番黎香港都冇今日」就等於香港人賣咗身俾英國人,英國殖民者嘅黑歷史就可以合理化咩?如果你老母今日同你講「你食我嘅住我嘅,我要你盲婚啞嫁有咩唔得」,而你又明白你老母咁做有咩問題嘅話,相信唔需要再多解釋。

又有啲人會講:「呢塊土地係英王與清帝簽條約搶來的,關你班移民咩事?」OK,等我認真答,咁49年後到今日好多人都已經係香港出世香港大,土生土長,如果係唔滿意個殖民政府可以移「番」去邊?唔滿意港英依個殖民政府提出問題又有咩問題?

俾英國殖民雖然係比港共治下冇咁差,自由啲,但都談不上係值得懷念。難道又要陷入”The lesser evil”嘅二元邏輯嗎?中共依個邪惡恐怖集團今日統治香港,難道就代表香港人都要endorse港英依個”the lesser evil”嘅殖民嗎?

我寫依一篇文,想做嘅不過係指出,港英作為殖民者同樣係非常醜陋。最終只係想帶出一點,就係香港人自己發展民主,甚至建立自己嘅國家,只會係自己嘅事,要假手於一個殖民者係不切實際。當然可能喺某啲時機可以借「外國勢力」嘅力爭取民主/主權,但前提都係自己爭氣,有「命運自主」嘅覺悟先,先至有可能最終為香港爭取到獨立自主。如果唔係只係好似幾十年前咁,成為大國角力下嘅棋子。

〈港英其實都只係一舊屎〉全文: https://medium.com/@julianho/%E6%B8%AF%E8%8B%B1%E5%85%B6%E5%AF%A6%E9%83%BD%E4%BF%82%E4%B8%80%E8%88%8A%E5%B1%8E-a70584e5d96c

註:
[1] Gary Cheung, “Britain, China forged 1987 deal on direct elections for Hong Kong, archives reveal”, SCMP, 30–12–2016 http://www.scmp.com/news/hong-kong/politics/article/2058018/britain-china-forged-1987-deal-direct-elections-hong-kong

[2] 見毛來由〈為何英國不早給香港民主?英國檔案提供的答案〉http://www.vjmedia.com.hk/articles/2014/01/11/60039/