Pangantin wan Hantu Buhaya
Wayah napa kah samalam tu ti ada nang baucap, “urang kita wayah naya harat aja disuruh bapandir Basa Banjar, tapi mun disuruh manulis panjang, bisa tacampur basa laut.” Makanya am ulun cuba na, bujur kah tacampur… kaina katahuan haja jawabannya pas sudah pahabisan.
Rahatan manulis sampai sia gin sabujurnya karasaan banar ngalihnya, asbabnya kita karancakan pakai Basa Laut wayah sakulah bahari. Ada ae balajar manulis Basa Banjar rahat SD, tagal satumatannya, pelajaran Mulok bahari ngarannya, tahu am lah ada kah masih wayah naya pelajarannya. Nah, 12 tahun sakulah tambahnya 4 tahun kuliah tabiasa manulis wan mambaca basa laut maulah kita ni ngalih banar manulis basa banjar. Maginnya kami nang bagana di Banjarmasin ni, tacampur-campur urangnya, tacampur-campur basanya, sagin tahun sagin barasa jauh pada basa surang.
Ulun ni bujur bagana di hilir, tagal kuitan badudua urang pahuluan, makanya am tacampur-campur jua sabujurnya basa; tacampur banjar kuala, banjar hulu, wan basa laut. Jadi maklumi ae lah. Lamun sampian tatamu ulun, handak sampian bapandir basa pahuluan kah, kuala kah, atawa laut kah, insyaallah mangarti haja. Asal laut nang paparak haja — maksud ulun basa Indonesia — mun laut jauh kaya Inggris atawa Arab, paksa mambuka akan google translate dulu.
Daripada kada ba hulu kada ba hilir, baik ulun bakisah haja gin. Lagi kakanakan, nini suah mangisah akan kami sapadingsanakan, judul kisahnya “Pangantin wan Hantu Buhaya”. Bismillah…
Dikisah akan bahari di Rantau ada lalaki wan bibini hanyar kawin. Di kampung nitu ada papadah buhan tutuha nang hinggan naya masih diasi urang, isi papadahnya “pangantin nang hanyar kawin pamali turun ka batang limbah kadap ari”. Biar kada tapi masuk di akal papadahnya, tapi ngaran nang mamadahi ni buhan tuha, buhan pangantin biasanya maasi haja, ngarannya gin bagana di kampung urang jua. Tapi kalinya bibini nang hanyar kawin ni kada maasi, tagasnya inya urang kota, urang sakulah, jarnya mun kadap ari kawa haja basuluh. Banaran jua jaku han baucap dalam hati.
Pas itu kadap sudah ari, nang bibini ni kalinya kasakitan parut handak bahira. Jar nang laki ditahani haja, sambil maingat akan nang bini papadah bubuhan tuha tadi. Tagal… ubuyyy ae, dimapa caranya manahani handak bahira samalaman? Kada kawa lagi nang bini ni manahani, dilikitnya suluh, bukah inya ka batang rahatan lakinya kada malihat.
Di rumah, sadar lakinya ni pada bininya kadada, dicarinya kasana-kamari sampai tumbur sarumahan, sampai tumbur sakampungan. Ada nang mancari ka barumahan, ada nang mancari ka padang, ada jua nang mancari ka batang. Nah, pas banar nang laki ni mancari ka batang, pas jua di atas batang tu dilihatnya tapih nang bini. Lalu bapikiran ae sakampungan ni pada pangantin bibini nih tinggalam di sungai. Bubuhan nang harat bakunyung asing-asingnya manyalam mancarii, buhan nang kada bisa manyisiri sungai sampai hilir. Bamalaman sampai baisukan kada jua kalinya tadapat. Bilang liwar sadihnya nang laki mamikir akan nasib bini, maka hanyar banar kawin, balum lagi sahari tapisah sudah.
Isuknya imbah makanan, datang pambakal mambawa urang sakti sagan mancari akan nang bini. Lalu lakas tulakan buhannya ka batang wadah nang bini hilang tadi. Basila urang nang sakti ni di batang sambil sasakali ditapaknya banyu sungai. Limbah nitu baucap inya lawan nang laki, “bini ikam masih hidup, inya dibawa hantu buhaya ka dunia lain, mun ikam handak bini ikam tabulik, bawa akan damini jua sabalum kadap, sabigian kapala hadangan nang hanyar digantal. Hari naya haja lagi batasnya!” nang laki imbah mandangar kaitu langsung inggih pun. Tulak nang laki ni ka Danau Panggang mancariakan hadangan nang paling ganal awak wan kupalanya.
Pas itu masih tanghari, nang laki bulik sudah ka rumah mambawa kapala hadangan nang sudah digantalnya, lakas ae tulakan inya lawan urang sakti ka batang. Sampai di batang nang laki ni handak banar sudah batajun, lalu urang sakti tadi baucap, “aku haja nang batajun, ikam kada usah”. Tagal ngaran nang laki ni kasasayangan masih, kada maasi inya, handak jua umpatan. Baucap ae pulang urang nang sakti nih, “mun kaitu ayuha, tapi rahatan di situ kaina ikam maasi-asi ha lawan aku, apa haja nang ikam lihat, ikam harus maasi”. Inggih pun ae nang laki. Limbah dirajah akannya nang laki ni oleh urang sakti, lalu batajun buhannya badudua ka banyu sambil mambawa kapala hadangan.
Sampai di dalam banyu, kalinya buhannya langsung baalih dunia. Dunia nang dijajak buhannya kaya dunia manusia jua, tagal liwar bagus kampungnya, rumah-rumah di situ ganal kaya istana. Di tangah kampung dilihat buhannya kurungan ganal, lalu baucap urang sakti ni “di dalam kurungan tu bini ikam, lakasi hurupi bini ikam lawan kapala hadangan nang ikam bawa, inya malam ini pacang disanga buhan hantu buhaya, makanya tu dikurung buhannya masih”. Pas baparak, kalinya palihat nang laki isi kurungannya tu bangkui, lalu inya baucap
“dusta! itu isinya bangkui, biniku liwar bungasnya, kada mungkin kaya bangkui kaitu rupa”
Mandangar kaitu lalu ae urang sakti tadi manyahut “inya dasar kaitu, diubah buhan hantu buhaya rupanya, kaina pas sudah naik ka darat babulik ae pulang rupanya. Maka ikam sudah kupadahi sabalum batajun tadi bahwa harus maasi lawan aku biar apa haja nang ikam lihat?”. Kalinya tatap kancang nang laki kada maasi pada bangkui itu bininya. Babulik ae buhannya badua ka darat.
Sampai di darat, kada lawas bah itu kalinya timbul tangan wan batis mulai dalam banyu, diitihi buhannya… kalinya batis wan tangannya masih bapacar, tanda bibini hanyar kawin. Malihat nitu lalu manangis nang laki, liwar inya manyasal tadi kada maasi lawan urang sakti.
Han tia, nang bini kada maasi wan papadah tutuha kampung, nang laki kada maasi wan urang nang sudah hakun manulungi. Kaitu pang jadi nasibnya badudua.
Nah, sampai situ haja kisah kita hari ini. Kaina mun ada pulang kisah, bisa haja kita bakisahan lagi. Wassalam.
