一八年

「希望」

每年嘅第一日都會寫今年會做啲乜,不過今年應該唔會再講希望今年會點樣。抱著平常心過每一日應該係最好,因為無期望就無失望。所有嘢都隨遇而安,可以將上年嘅問題解決晒就已經好好。所以今年只係希望做好每一件事,繼續開開心心咁睇住郭大少成長就已經足夠。當然心底裏依然有無數嘅希望,最希望嘅係搵到一個新嘅方向可以令自己舒服啲。

「開始」

新一年新開始,希望大家今年繼續開開心心,健健康康咁過每一日。一年嘅時間真係可以過得好快,亦都可以過得好慢。今年希望可以有多啲時間靜靜地去思考同計劃人生。繼續堅持?另覓出路?無論係點相信今年一定會好過舊年,最起碼今年已經有好多嘢計劃好。係時候做返應該做嘅嘢,因為時間無多,期限將至。唔諗唔諗還需要諗,係時候要收復失地!

「堅持」

今年真係要堅持繼續每日寫一篇文,希望繼續記錄每一日嘅大小事務。雖然仍然有好多嘢上年積積埋埋未寫,所以要係今個月將之前未寫嘅都寫返先,如果唔係只會繼續累積落去!雖然未知今年會係點嘅一年,但係最起碼頭三個月已經有好多嘢要做。相信今年又會係好忙嘅一年,但係真係要改變一下生活模式,唔係嘅話只會重蹈覆轍。期待二零一八嘅改變!


Originally published at Kenneth Kwok (郭嘉俊).

One clap, two clap, three clap, forty?

By clapping more or less, you can signal to us which stories really stand out.