一歲半

「性格」

而家啲細路真係唔可以用我哋以前嘅標準去衡量。佢哋學嘢嘅速度一定比我哋嘅年代快。有時同郭大少去返學真係睇到唔同嘅小朋友係有唔同嘅性格。不過雖然佢個性比較急，但係見到佢有進步都好開心。而家佢真係好有性格，除咗有自己嘅主見之外，食嘢真係呃佢唔到。佢食之前會望下係啲乜嘢，慌死我哋呃佢咁。其實要郭大少食嘢兼且坐定定嘅話真係難過登天，每日都攪到我哋兩個筋疲力竭！

「歲半」

郭大少今日一歲半啦！咁啱撞正年三十晚，所以今晚除咗同屋企人食團年飯之外，就係同郭大少慶祝！又到咗每月做記錄嘅時候。而家佢已經重過個保齡球，有時長時間抱佢真係手都軟。相信之後打返保齡球一定覺得啲波好輕！今個月終於學識玩拼圖，講多咗好多嘢，認得好多物件，但係繼續睇心情同揀嘢食。唔知點解近排除咗朝頭早之外，好多時都唔要我淨係要扭媽咪抱！

「慶幸」

我最興幸嘅係佢鍾意睇書，因為我真係可以睇睇下書會瞓著嘅人。郭大少嘅佔有慾好強，而每次當我哋同其他小朋友玩嘅時候佢都會呷醋，之後就推開人唔俾我哋同其他小朋友玩。最嚴重嘅係連我拖老婆隻手都要撥開我，真係呢。不過都開心嘅，因為證明我哋係佢心目中有幾緊要。希望佢大咗之後都咁黐我哋啦，如果唔係我哋使乜咁辛苦自己去湊大佢。講到尾都係希望俾最好嘅成長環境佢啫！

Originally published at Kenneth Kwok (郭嘉俊).