一歲啦

「一年」

一年前嘅今日我同老婆都好期待一個新嘅生命嚟到呢個世界！我哋兩個都因為太緊張所以瞓得唔好。不過仲好記得你嘅第一下喊聲，第一次擘大眼，第一次笑同好多好多嘅第一次。而最感恩嘅係你平平安安嚟到嚟個世界同健健康康咁成長。雖然你對我哋嚟講係一個挑戰，但係我哋每日都努力學習，希望將最好嘅嘢俾你。話咁快你已經一歲啦！真係快得驚人！

「一歲」

郭大少生日快樂！你大個仔啦！一歲啦！希望你以後都開開心心，聽聽話話，唔好咁曳曳！今個月學嘢好似快咗，而家識得自己揸住嘢自己食，不過依然食得好少。同佢去上堂再無咁黐身，總算可以俾其他人抱下。不過當媽咪一係屋企就會非常扭計，攪到媽咪超級煩躁。係我眼中你仍然係有少少與別不同，因為你由出世咁耐，你都係好鍾意笑面迎人！希望你大個之後都會係咁啦！

「懷念」

其實爸爸對你只有一個期望就係開心做人，而你個中文名同英文名都係有同一個意思！雖然有時唔知你係唔係叫我，但係我會懷念你而家每朝同我係客廳到玩，雖然好多時我都好攰，瞓係旁邊，但係見到你開心就心滿意足。同你出街嘅時候，大部份嘅時間你都會黐實我，要我抱你。依家仲識得同我拍手同錫錫，不過唔鍾意我嘅時候就搵手撥開我。有時真係無叫錯你做郭大少！

Originally published at Kenneth Kwok (郭嘉俊).