下水禮

Kenneth Kwok
2 min readMay 8, 2016

--

「夏天」

係未有郭大少之前我同老婆一到夏天都會好鍾意去海灘曬太陽同游水,基本上只要天氣好啲我哋都會去。不過上年咁啱有咗郭大少,所以都無乜點去個海灘游水。當然我老婆陀住郭大少嘅時候我哋都有去過海灘幾次,所以郭大少未出世就已經去過海灘,只不過係隔住個肚皮。不過佢出世之後真係好似唔怕水,因為一般小朋友都唔鍾意沖涼,但係郭大少就好唔同!

「游水」

今日第一次真正帶郭大少去游水,對上果次只係同佢去嗰啲專俾小朋友玩嘅大浴缸游咗一次,之後就因為冬天一直無去游過水。最多都係沖涼嘅時候玩水咁大把。其實我都驚佢咁無真正去啲游水嘅地方佢會驚,因為始終唔同係屋企玩,點知佢果然同我哋兩個一樣都係咁鐘意玩水。雖然今日只係去屋苑會所去試下玩水,之後希望天氣好啲再去沙灘玩!

「旅行」

下個月就會帶郭大少去旅行,今次嘅目的地就當然係去啲渡假嘅地方。而最近香港而且可以揸車自遊行嘅地方就當然係得沖繩啦!因為之前睇過好多人話帶小朋友去旅行,亦要準備嘅嘢都唔少,所以先搵個好似比較渡假嘅地方試下先。去得沖繩就當然會去海灘游水啦,所以希望去之前等郭大少可以熟習下先,希望去沖繩嘅時候佢唔會驚啦!

Originally published at Kenneth Kwok (郭嘉俊).

--

--

Kenneth Kwok

到處奔跑的香港人,畢業於澳洲麥覺理大學工商管理碩士,近年專注數據分析行業推廣同發展。曾從事平面設計,網站開發,企業管理及商業諮詢等工作。早於 2009年開始舉「香港數碼分析星期三」同「亞洲數碼分析高峰會」。於 2010 年創辦 Beehive Strategy ,為亞太地區不同企業提供數據分析服務。