人揀你

「條件」

而家有好多嘢都唔係話你想點就點,睇落你好似有得揀,但係實際係無得揀。點解?因為唔係你揀人而係人揀你。讀書係學校揀人,搵工係公司揀人,搵生意係客戶揀人,樣樣嘢都係人哋揀你。咁有乜嘢係自己揀?其實就算俾你千揀萬揀,揀完之後人哋話啱嘅話,最後你都無計。當然有時係要檢視自己做選擇嘅時候究竟有啲乜嘢條件係必要,有啲乜嘢只係有會好啲但係非必要,如果唔係其實只係自己開嘅條件太過苛刻。

「現實」

正所謂你揀人時,人揀你。今時今日好多人都自信心爆棚,以為所有人都會圍住自己轉。但係自信同自視過高只係一線之差,凡事都應該有自知之明。你開條件時人哋亦都會審視你嘅條件而作出相對嘅決擇。太過自我中心,以為自己開嘅條件係理所當然,但係現實會話俾你知其實你真係諗多咗。有時唔係話你無條件去揀,只不過唔現實啫。凡事都係貼地啲好!

「請人」

而家請人真係幾難,僱主以為自己有得揀,但係又係無得揀。有時都真係幾無奈,或者而家嘅新世代嘅諗法真係唔同。不過嚟個惡性循環真係搞到好多公司而家唔會培養人,因為佢哋知道啲人做幾年就走。所以好多招聘廣告都水蛇春咁長,要啲人識晒所有嘢,睇落好變態又好唔合理。但係現實就係咁,好多公司唔再放資源落去培訓人才,到最後損失嘅係邊個?其實結果係兩敗俱傷!


Originally published at Kenneth Kwok (郭嘉俊).

Like what you read? Give Kenneth Kwok a round of applause.

From a quick cheer to a standing ovation, clap to show how much you enjoyed this story.