做新聞

「頭條」

《頭條日報》於八月二十日以頭條報道,引用消息指教協與多個資訊科技組織達成協議,將教協嘅一千五百名會員轉移成為資訊科技界選民。而選舉事務處提供嘅官方數字,對比二零一二年選民登記冊,選民登記冊上由教育界轉投資訊科技界嘅選民只有七十二名。只不過係前兩日,《頭條日報》仍然堅持指有一千五百名教育界選民轉至資訊科技界。真係以為重點要講三次!

「報紙」

其實依家嘅資訊咁發達,樣樣嘢都可以尋根究底,點解做報紙嘅連基本嘅專業操守都無?當然每個行業都會有競爭,都希望有好嘅銷售量,但係作為一個傳播信息嘅媒體,係唔係真係淪落到一個要誤導公眾嘅地步?其實如果報導錯咗就應該道歉同澄清失實報導!點解可以連續幾日嘅頭版都繼續報導錯誤嘅訊息?真係以為自己講一百次就係啱?真係離晒大譜!

「無恥」

究竟一份報紙可以有幾無恥?唔通佢哋收咗錢做新聞?香港其實真係仲有好多人相信報紙嘅報導。老實講我依家好少睇香港報紙,因為實在太多炒作。不過話雖如此,其實而家每一個人都接收緊好多唔同嘅資訊,所以好多時真係要小心求證,唔好相信片面之詞。同意亦都要睇清楚資料來源,如果唔係真係好容易被誤導。


Originally published at Kenneth Kwok (郭嘉俊).

Show your support

Clapping shows how much you appreciated Kenneth Kwok’s story.