停車場
2 min readNov 17, 2017
「揸車」
香港揸車遇到最大嘅問題一定係泊車嘅問題。莫講話要平時想係街到搵個位泊車，有時就連去一啲熱門嘅商場都要大排長龍，等到傻咗都未可以泊低部車。講真有時塞車都係因為大家都係等泊車，尤其係啲人多嘅區分。香港泊車位其實係嚴重短缺，你估啲人真係想違例泊車咩？就算有停車場，有啲收費真係嚇死你。有時唔係加價就可以減少路面嘅車輛，而係有無足夠嘅泊車空間。
「泊車」
如果你有揸開車嘅話，你最貴試過一個鐘頭停車場收費係幾多呢？有時真係覺得啲停車場係㩒住你嚟搶！當然有啲係明知嗰區嘅泊車位唔夠，所以坐低起價！你可以話揸車係你自己揀，你可以選擇唔揸車，但係另一方面嘅係點解你又唔掉返轉頭諗下呢？究竟邊嗰令到啲車要違例泊車，如果當初規劃好啲，又或者審批嘅過程要加入停車位嘅話，我諗無人係會想冒險去食牛肉乾！
「問題」
如果你有留意嘅話，好多地方都有違例泊車嘅情況，而點解其他國家又好似好少遇到車位不足嘅問題呢？好似日本咁，地方一樣細，但係佢哋會善用空間，當然佢哋都有塞車嘅問題，只係政府係唔係應該興建更多嘅停車場而唔係不斷拆卸呢？有時有啲問題唔係話加價就可以解決，有適當嘅發展藍圖係好緊要。香港真係買車容易泊車難，以解決交通問題其實係有好多嘢可以做。
Originally published at Kenneth Kwok (郭嘉俊).
