再唸過

「供求」

其實做任何生意都係講緊供與求嘅問題。只要有市場需求先至有得做，至於市場嘅需求有幾大，有幾多競爭對手，等等嘅問題其實係主宰一間公司嘅方向。好多時或者有啲嘢諗得太過簡單，只不過如果簡單複雜化嘅話，諗得太多可能機會已經過去咗。所以好多時好多嘢都係邊做邊學，摸著石頭過河。當然會有跣腳嘅時候，但係要成功過河嘅話，好多時要折返再諗過一個新嘅方法過河先至得。

「諗野」

有時我承認我諗嘢係過份簡單，好多嘢都係行咗先再決定下一步點行。有啲人會覺得無計劃，無方向，難以適從，但係環境不斷變，好多嘢無可能計劃到百份百完美先至去做。就算今日俾你計好晒，但係今日唔知聽日事，如果樣樣嘢你都計到嘅話咁就唔係人生。所以有時以為某啲方向得，但係試完唔得，咁就要重新諗過，諗下啲問題點解決，再重新試過。因為成功在於失敗，在於嘗試！

「心急」

有時真係太過心急，一心諗住市場仲未有，自己就快快手做咗先，但係忘記咗其實個市場都仲未有人認識，仲未有需求。而另外一個問題就係香港其實真係對價格定位十分敏感。而有時真係唔係太明啲人嘅諗法，當然一話免費嘅就爭住搶，一話要俾錢嘅就算係一百幾十就耍手擰頭，但係有啲去到幾千蚊美金嘅就覺得物有所值。真係摸不著頭腦，唔知啲人點諗。

Originally published at Kenneth Kwok (郭嘉俊).