取其一

「方向」

今年其實就預咗起起跌跌，但係無諗過下半年一開始，整個人完全無晒方向。對上個次我諗係七年前啱啱返嚟香港嘅時候，不過最起碼嗰陣時還有一個目標。或者依家要考慮嘅嘢比起七年前還要多，好多嘢都唔希望淨係取其一。係唔係所有嘢都只有一條路？當然我唔相信人生只有一條路，而唔係個個人都會捨易取難。雖然選擇咗嘅嘢係無得返轉頭，但係最起碼有一個決定。真係希望人生可以輕鬆啲，平淡啲，咁就好了。

「選擇」

人生要做嘅決擇何其多，但係嚟個世界係永遠唔會有完美，所以不論你做啲乜嘢嘅決定都會有得同有失。而要係人生咁多嘅選擇入面取其一，其實真係有啲難度。最難嘅係當你要決定犧牲啲乜嘢嘅時候，因為你可以犧牲時間，犧牲金錢，犧牲家庭，等等嘅嘢。而好多人都希望可以將所有嘢取一個平衡，但係世事如果真係咁完美嘅話，咁就唔係人生啦。如果你真係要取其一嘅時候，你又會用乜嘢嚟做選擇嘅準則呢？

「決定」

我其實係好驚做決定，當然係工作層面又係另一回事。點解兩者有分別？因為工作就係工作，所有嘢都係以工作嘅出發點去做決定。但係當要幫自己嘅人生去做決定嘅時候，好多時都希望平衡所有嘢，永遠都俾自己一條逃生嘅通道。時間一去不返，活在當下，享受人生，其實係每個人都希望做到。所以我通常到最後都係順其自然，諗太多只會令自己煩惱多啲，倒不如開開心心，平平淡淡享受人生嘅每一天？

Originally published at Kenneth Kwok (郭嘉俊).