可重複

「時代」

做生意就當然希望長做長有,但係無一樣嘢係唔會被淘汰。因為時代嘅進步,科技嘅發展都慢慢將好多唔同嘅行業慢慢淘汰。可能你今日賺到盆滿缽滿,但係你唔知幾時會蝕到趴係咗係到。其實就算係日常嘅必需品都會有同樣嘅問題,因此你會發現好多公司都會不斷擴展唔同嘅業務,同當初開業嘅時候都會好唔同。專型係需要時間,唔係一時三刻話變就變。況且而家嘅經濟環境,有時未必係自身嘅問題,反而係政策嘅問題。

「模式」

要建立一個令客戶不斷搵你嘅商業模式係一件非常難嘅事。所以好多時要創造一個生態環境,令到客戶係唔同嘅階段都需要你嘅產品同服務。有時就算幾忠心嘅客會仲有一日因為某啲事而離開你。一個連鎖式嘅商業模式需要一段比較長時間去建立,有時甚至乎同自己本身嘅業務無關,所以會遇到嘅挑戰同困難亦都比較大。但係當你成功嘅話就可以延長自己公司嘅壽命,而世界上有幾多間百年企業?全球依家唔超過五百間,有啲好多人應該聽都未聽過!

「市場」

當然無老闆希望生意只係做一次,因為每個市場都有一定嘅空間,做晒個市場就無。就算好似教育咁,其實本質雖然都係傳授知識,但係過去咁多年都會因為環境而改變。就好似補習咁,其實每年都會有學生需要補習,但係今日做補習同十年前甚至二十年前做補習就好唔同。所以點解咁多人都會話創業難,守業更難,就係咁解。當然自己都希望可以做到咁嘅營運模式,但係過咗七年都仲未搵到方法可以長做長有。只可以話繼續努力啦!


Originally published at Kenneth Kwok (郭嘉俊).

Like what you read? Give Kenneth Kwok a round of applause.

From a quick cheer to a standing ovation, clap to show how much you enjoyed this story.